Ermiyaas 42 - NABUWWA KEE MALIKWA

ERMIYAAS YALLI IYYEM KEENIH WARSE

¹ Tokkel ummatak qunxa num kee kaxxa numih agantah num raaqe'kalaay, qaskar abbobtik Kareyyác-Yocanan kee Hosaqyâ-Qadaryah agantah, yakkeenimiik inkih

² nabi Ermiyaasal yemeeteeniih, kaak iyyeenimih, «Ku maganak rabe marak saaboh raaqe mara kinninooh; YALLAY ni Dageltah yani neh kallacta'gidih nemeetek; nek oggolaay macinin. Duma manguk sugne'mmay a saaku dago mari nek raaqeh yanik, raaqe marah dooqa neh ab.

³ YALLAY ni Dageltah yani raaqe marak abnam kee genxa arac nee yaybullee'gidih, Yalla neh kallac» kaak iyyen.

⁴ Ermiyaas keenil gacsemii, «Inteenim oobbeeh, akah inten innah, YALLAY ni Dageltah yani siinih kallaceyyooh, YALLI iyyem siinih warseyyo. Tu siinik maaqura» keenik iyye.

⁵ Oson too waqdi kaak iyyeenimih, «YALLAY ni Dageltah yanihiyyak kol oobu waa yaabay neh warissu waytahiyya kok cinna haynek, YALLI isih sumaq nel yakkay.

⁶ Fannaah, faxe waynaamah, YALLAY ni Dageltah yani nek aba iyyem abenno. YALLA neh kallac; ninnih kok inne'kkal, kay yab macinna. Kay yab oggollek, kullim nel amqelem naaxigeh» kaak iyyen.

⁷ Tohuk wadir tabna ayrok lakal YALLIH qangara Ermiyaasal obte.

⁸ Too waqdi qaskar abbobtik Kareyyác-Yocanan kee kaak kalah tan qaskar abbobtiiy, raqqa 'te ummatak qunxa numuuy kaxxa numuh inkih keenih seece.

⁹ Keenik iyyeemih, «YALLAY neh kallac yok inteenihiyya siinih kallaceeh, YALLAY Israayil doore Dagelta kinnihiyya siinik iyyem siinih warisu waa.

¹⁰ ‹Ama elle tanin rasul elle teedeenik, qarih innah sin xiseyyo ikkal, sin maggila. Caxah innah sin daabiseyyo ikkal, ahaysa buxuxuk sin masiiba. Siinil oobisem afqado yok biyakteh.

¹¹ Ahaysa akak meysitak sugtan Baabelon-malikik mameysitina. Anu sin lih ani'kkal siinil baaham mali› siinik iyyeeh;

¹² toh lih kaadu siinik iyyeemih, ‹Baabelon malikih afqadot xuwaw siinih heeyyooh, isinni baaxo fanah taduuroonay sin axcele. Tahat yabtam yoo YALLA› 'yaanam siinik iyye.

¹³ «Tonna hinna'mmay, ‹A baaxol manaadiya› axcuk, YALLAY sin Dageltah yanihiyyah yab oggole wayteenih

¹⁴ ‹Masriy carbi elle deedalaah *baantah ugra elle aabbe waynaah qulul elle able waynahiyya gexenno› inteenik,

¹⁵ tonnal Yuudak saaboh raaqe maraw, YALLAY Nabaamak Nabah, Israayil doore Dagelta kinnihiyya siinik iyyam siinih warisu waa. ‹Too baaxo gexenno'kkah, akkel manaadiya inteenik,

¹⁶ tonnal too akak meysittan carbi Masril siinit akkeleeh, akak cunxittan qulul tokkel sin abbixeleeh, elle rabetton.

¹⁷ Yi yab cinna heeh, Masrik manaadiya iyyu waa maral, carbi kee qulul kee bala keenil ruubeyyooh edde selliimelon; num keenik maraaqa› siinik iyya.

¹⁸ «YALLAY Nabaamak Nabah, Israayil doore Dagelta kinnihiyya iyyaamah: ‹Yi naqbi Yarusalaam maral akah oobe'nnah, uxih kaadu yi yab cinna heeh Masri gexu waa maral oobele. Woo marat tekkem net akke waytay akak iyyan mara akketton. Sinam titta abaarta waqdi, Woo marat tekkem siinit takkay akak iyyan mara akketton. Sahda bursutta mara akketton. A rasu ahak wadir matablan› siinik iyyeeh, YALLI tamah siinil gacseemi» keenik iyye.

¹⁹ Kaadu qagseh keenik iyyeemih, «Yuudâ-rasul raaqe maraw, YALLI, ‹Masri fan magexina› siinik iyya'mmay, ta yab macinina.

²⁰ Ta yab cintaanamak gactam sin matabbixa. ‹YALLAY ni Dageltah yani neh kallacaay dooqa neh ab. Tahaysa YALLI nek aba axcinnaanim abenno› 'yaanam isinnih yok inten.

²¹ Ta saaku YALLAY ni Dageltah yanihiyya siinik iyyem siinih warsah ani'mmay, cintaanah tanin.

²² A yab cinteenik, siinit takku waytam siinih warisu waa. Taway gexxaanam faxxan baaxol, qulul kee carbi kee dalkah ambaxettoonum siinih warsa» keenik iyye.