Ermiyaas 41 - NABUWWA KEE MALIKWA

¹ Woo sanatak malcinhaytoh alsat, Alisamáq-Natanyáh-Ismaaqiliy Yuudâ-malikik nasab luk yeneeh duma kaadu malikik gubal yan numuk yenehiyya, Gedalyat boysita'gidih tabna num is lih wakalih hayya heeh; Mixfa fanah gexe. Ken kee Gedalya kee kay mari inki aracal maaqo xagak sugen waqdi,

² Ismaaqil kee a tabna num seef sibba hayteh Gedalya qidde. Tonnal Baabelon-malik baaxoh-abba hee num qiden.

³ Ismaaqil kaadu tokkel kaa'lih suge mara edde qide. Tonnah kaadu Baabelon-qaskaray wokke temeeteh sugte edde qide.

⁴ Gersi ayro Gedalya rabem num aabbe'kal yan waqdi,

⁵ Seekem kee Siilo kee Samaariya deqsitta magaaloolik bacra-tabanih num yemeete. Too mari deben isik mollaay, tonnah kaadu, sara isinnik qanxissa heenih yemeeten. Xagar kaadu isinnik toobiyeenih yemeeten. Yemeeten waqdi, Yarusalaamal YALLIH Qibaadah-Qaril sadgatah xayyoosoonu waan daro kee qaydarus gabat luk yemeeten.

⁶ Ismaaqil woo marat matra'gidih, ximo caxak Mixfak gexeeh keenih garaye. Keenit yongoorowe waqdi, «Gedalya elle yani'kke anu sin aybulleeyyok yoo kataya» keenik iyye.

⁷ Oson Mixfâ-magaala yemeeten waqdi, Ismaaqil kee kaa'lih suge mari, a marat kaadu qeebi abeeh ken qideeh, lafa keenik birkat addat qiden.

⁸ Takkay immay ken addak tabna num Ismaaqil kallacteeh, «Ku maganah nee maqidin. Buqreh addal kamadi kee gabru deqsitta darooy, *daytuun kee malab uqurat nabbixeh koh aceennok, nee wad» kaak iyyen. Too waqdi ken cabeh.

⁹ Ismaaqil qide marih raysa inkih edde qidem, inki birkatak teneeh; too birkat kaxxam naba birkatak ten. Too birkat bicissem, malik Aasa deqsita malikik teneeh; akah bicsem, Baqsa deqsita malikiy Israayil amoytah yenehiyyah qeebi kaat abe saaku, woo qeebik amo edde raaqisa'gidik ten. Ismaaqil too kaxxa birkat too marih raysak kibe.

¹⁰ Sarrak Ismaaqil, malikik say-xaylo kee, Mixfâ-magaalal suggu 'ye maray Baabelon qaskar abbay Nabudardan deqsita Gedalya abba akak abeh cabehiyya, seewah gabat hayya heeh, Qammon rasu fan foore.

¹¹ Kareyyác-Yocanan kee kaa'lih sugte qaskar abbobti, Ismaaqil baahe umaane inkih yoobbeenih.

¹² Too waqdi ummatak ken lih sugga 'tem wakalih isinni lih hayya heenih lakat kaak gexen. Sarrak Gibqon rasih kaxxa dorah garil kaa yeybeebexen.

¹³ Ismaaqil seewah beeh suge mari, Yocanan kee qaskar abbobtiy kaa lih temeetehiyya yublen waqdi, nabam yifricen.

¹⁴ Ismaaqil Mixfâ-magaalak seewah beeh suge mara inkih Yocanan gitak gacse.

¹⁵ Takkay immay Ismaaqil kee bacra numuy kaa'lih sugtehiyya Yocananak kudeeniih, megloh Qammon rasu fan gexen.

RAAQE MARI MASRI GEXO DOORITE

¹⁶ Sarrak Yocanan kee qaskar abbobtih yen mari, Ismaaqil Gedalya qidek lakal, Mixfâ-magaalak seewah beeh suge qaskar kee urru kee agabu kee seelabu luk yen marih agantah, gaabossa heenih, Gibqoonuk

^17-18 Masri fan haysiten. Masri fan akah haysiteenim, Baabelon marak aben meysi. Baabelon marak akah meysiteenim, Ismaaqil Baabelon-malik rasuk abba abeh cabe Acikám-Gedalya qideemih sabbata. Toh edde cabelem maaxaginnon. Gital Geerut-Kimham deqsita aracay Beetlacam magaalal xayihiyya gufen waqdi, tokkel yiffidigen.