Ermiyaas 40 - NABUWWA KEE MALIKWA

ERMIYAAS GEDALYA LIH GACE

¹ Baabelon malikih qaskar abbah yen Nabudardan, Raama deqsita aracal Ermiyaas casbik ruubek sarra, YALLIH qangara Ermiyaasal obte. A num kaa elle yifdigem, Yarusalaam magaala kee Yuudâ-rasuk Baabelon-rasu fan seewah beyan maray silsilatat axawah yanihiyyah addat kaa yuble waqdik ten.

² Too waqdi Ermiyaas garayah beyya heeh, kaak iyyeemih, «YALLAY ku Dageltah yani, A baaxo bayseyyo, dumaak iyyeh suge.

³ Amah kaana; away too-abeyyo-inxicca-'yem inkih abeh. Tah inkih siinit akah tekkem, sin mari YALLAL dambi lem baaheeh, usuk keenik aba iyyem cineenimih siinit tekke.

⁴ Ku tiyah tu gactek, gabal kok yan silsilat kok kaleyyo. Tohuk wadir isih faxxe ikke gexetto. Yo'lih Baabelon fan gexxam faxxek, ugutay nee bey, meqe wagittoh amo kok wagteyyo. Gexxam faxe waytek, kaadu koo dirkissam matan. Inkih tan baaxok isih faxxe ikke dooritay gex» kaak iyye.

⁵ Too waqdi Ermiyaas tu kaal magacisinnaay tibba 'ye. Toh yuble waqdi Nabudardan kaak iyyeemih, «Acikám-Gedalya fan gex. Baabelon malik, Yuudal tan magaaloolik inkih xintoh abba kaa abe. Kay garil gacettooh, ummat addal ummat lih gacetto. Faxxek, kaadu isih loowitte rasu fan gexetto» kaak iyye. Sarrak mattacoh duyye kaah yeceeh, sakayih kaadu giti maaqo kaah yecee.

⁶ Tohuk lakal Ermiyaas, Acikám-Gedalya fan gexeeh, tokkel baaxol raaqe mara lih yeede. Gedalya, Mixfa deqsita aracal suge.

GEDALYAT TEKKEEMI

⁷ Yuudâ-doolatak qaskar abbobtih yen tu yakke maray Baabelon malikil gaba acee'kal raaqehiyya yen. Too mari Baabelon malik-Nabkadnessar, Acikám-Gedalya deqsita num inkih yan Yuudâ-rasu kee seewak raqte tu-maleelak abbah hee, 'yaanam yoobben.

⁸ Too waqdi Natanyáh-Ismaaqil kee, Kareyyac-xayloh nammayay migaaqah Yocanan kee Yonaatan deqsitahiyyaay, Tancumét-Seraaya kee, Natoofâ-rasul yooboke Qefay deqsita numih xaylo kee, Maqkâ-rasul yooboke Yaadanya deqsita num, wakalih isinni mara hayya heenih Gedalya fan yemeeten. Gedalya too saaku Mixfa deqsita aracal yeneeh; tokke kaal yemeeten.

⁹ Gedalya too waqdi keenik iyyeemih, «Baabelon-marih gubal gactaanamak mameysitina. Baaxol nookaay Baabelon-malik siinik aba iyyem aba. Tonnal abinnaanim siinil amqeleemih siinih xiibita.

¹⁰ Anu Mixfal sugeyyooh; Baabelon mari yamaatu waa saaku, siinik iyyaanam tenek, anu sin aftok siinih yaabeyyo. Siinih tu gactek, ama elle tanton mandarwa fan uduuraay, tokkel qinab-xaylo ifiilaay caxâ-miru kee *daytuun xaylo ifiilla haay, daanah edde haan gaanut haay suga» keenik iyye.

¹¹ Sarrak Yuudah-ummatay Mooyab kee Qammon kee Edom kee, wohuk kalah tan baaxol sugga 'tehiyya inkih, Baabelon-malik Yuudâ-rasul ummatak tu takkem cabeeh; too marak abbah Acikám-Gedalya keenik heeh cabe 'yaanam yoobben waqdi,

¹² fixixih elle suggu 'yen baaxooxak Yuudâ-rasu fan yuduuren. Gedalyay Mixfa deqsita aracal abbah keenik cabeenihiyya fanah yemeeten. Tokkel qinab kee caxâ-miruk mangom gaaboysen.

¹³ Ayrok teena Kareyyác-Yocanan deqsita num kee, gersi qaskar-abbobtih yen mara Gedalyay Mixfal yanihiyya fan yemeeten.

¹⁴ Kaak iyyeenimih, «Qammon rasih malikih yan Baqlis, Natanyáh-Ismaaqil ku qidimih ruubem toobbeh innaa?» kaak iyyen. Takkay immay Gedalya toh keenik cineeh, «Aleeyyah, Ismaaqil yi qidimih yemeete kaa hinna» keenik iyye.

¹⁵ Sarrak Yocanan dibuk tani'kke garayah Gedalya beyya heeh, kaak iyyeemih, «Ismaaqil elle aninnaan ikke gexxa exceh num aaxige'kal kaa qideh cabam faxa. Annal koo qiday kaa m'inna. Koo qiday inneh kaa cabnek, Yuudâ-marih-saaboy ku xaqul gaabowtehiyya fixixih raaqeleeh, rabi ken edde abbixelem taaxigeemi» kaak iyye.

¹⁶ Gedalya kaak iyyeemih, «Away edde yabba inta yaabay Ismaaqil abeh inta inkih diraaba. Tonna'mmay kaa maqidin» kaak iyye.