Ermiyaas 4 - NABUWWA KEE MALIKWA

¹ YALLI siinik iyyaamah, «Israayil maraw, yol taduureenim faxxeenik, yol uduura. Anu faxe waa duyyey isinni gabak bicisseenihiyya taqbudeenim cabaay; yi qibaadal digga axcuk,

² gitah tanim taamitak, baguuk YALLAY waarahiyyah migaaqal xiibitteenik, tonnal ummatta inkih, ‹Yallaw, barkat net hay› yok axceloonuuh; yoo fayliselon» iyyah yan.

³ YALLI Yuuda-kee-Yarusalaam-marak iyyaamah, «Abqure wayten baaxo ubqura. Dariyyu keenan-le-baaxoh bagul maqidina.

⁴ Yooy YALLA kinnihiyya lih liton xagana xagura. Yi qibaadak kalih imit maasina. Taham cinteenik, isin abten umaanek gexxaamah sin anneeqebbeyyo; anu abah an naqbi girah innah ureleeh habugga axcele. Too gira sarra bargusa num mageytima» 'yaanam siinik iyya.

YUUDÂ-BAAXOH BAATI XAYIH

⁵ «Inkih yan rasul tan ummatta akah taabbe'nnah, Yuudâ-baaxol *baanta agura inxica. Xongolo fayya haay seeco aba; Yarusalaam kee Yuudâ-marak, ‹Titta fanah gacaay gaso maroh edde tan magaala fan kuda› inxica.

⁶ ‹Asta fayya haa! Siyon qale fanah sissikuk kuda. Wadir mafkuninay isillima. Muudurrutinay kilbat le kabuk baatiy ummat seltu waytahiyya ruubam faxak xayuk isillima› keenik inxica.

⁷ Gablah addak yewqe lubaakih innah, ummatta bayisu waa num aracak ugteh gitat yan. Yuudâ-maraw, sin baaxo abur aba'gidih ugteeh yamaateh yan. Ummatta baysele. Elle sugten magaalooli abuuruh raaqele. Sahdayti addal akak maraaqa.

⁸ YALLIH bagcarray kaxxam gibdihiyya Yuudah-ummatta macabtak, rookitaay *qabuddat gacaay weeqaay boogisa, keenik inxic» iyye.

⁹ YALLI kaadu qagseh iyyaamah, «Too ayro malik kee doolat mari giliicih abam waagisele. Seekat meysih axaxo heele. Nabuwwa kaadu ibak-gibda-cunxo abbixele» 'yaanam siinik iyya.

¹⁰ YALLI toh yoh warse waqdi, anu kaak excemii, «YALLAW, Mulki le Dageltaw, atu a mara aylahisseh tan. Ahaysa amaanah xiine loonu 'yaanam inte'mmay, taway elle able'nnal, gile katlal keenik tanih tan! Tonna leemiik keenil makteh» 'yaanam exce.

NAQBOYTIT YUUDÂ-MARA MAROT HAYTE

¹¹ YALLI Yarusalaam mara lih edde yaabu waa uddur yemeeteh. Iyyu waamah, «Laqin caacayay xagar cararisahiyya bacarih tan baaxok sin fan ruubeyyo. Yamaatu waa caacay qunxa caacayay caffa gabat beya hinna.

¹² A caacay akak yamaatu waam yoo kinnuk, kaxxa caacaya. A saaku anu inni ummattal innih ackumeyyo» keenik axcele.

¹³ Naqboytit, qamburre qaraanal elle tamaate innal, tamaateh tan! Oson qeebi edde aban faaris, baaxok bagul fuluk axcuk gexxa caacoh innal, yamaate. Ken faras sissikaaneh qawiytak umah. Too saaku ummat: «Ahaysa baati nee tibbixeh! Nim tekkeh!» axcelon.

¹⁴ Yarusalaam ummatey, waddintaana'gidih umaane afqadok isinnik kala. Bagut umaane kulli way maay xiinissan?

¹⁵ Macaay inteenik, Daan deqsitta magaalak kaayaanaah; Efrayim rasuk qaleela le aracak anay yantaabbeh, «Baati xayih!» iyyan.

¹⁶ Baaxoh ummatak inkih, «Naqboytit xer baaxok tamaateh tan» inxica. Yarusalaam-marak, «Yamaatu waa naqboytit tirtirisak amaateloonuuh Yuudâ-magaaloolit inkih maro heelon» inxica.

¹⁷ Cal uma awur yasguudeenim faxan waqdi, yabbixoonuh elle maraasiyan innal, Yarusalaam marot heelon. Yuudâ-marat toh akah takku waytam, yoo cineeniih yi amri cineenimih sabbata. Tah intam yoo YALLA.

¹⁸ Hay Yuudah-ummatey, aham isin isinnih isinnil bahteenimiiy, sin qamalah siinit tekkeemi. Taham sin dambih siinit tekkeemi'mmay, salfa siinil matallay siinit qeerootele. Gilet muden afqadoh innah, siinik dananele.

ERMIYAAS ISI UMMATTAT TAKKEEMIH AFQADO KAAK DANANTEH

¹⁹ Ermiyaas iyyemii, «Anu woyyow, kaxxam keenih biyaakitah an. Woyyow yi ulqow! Ulqi ah yok xiqah mayan! Qeebih yamaate mari aba tirtira kee baantah ugura yol raddah taniih; aham aabbih tibba axcem yoh takkeh matan.

²⁰ Naharsi balah lakal gersi bala ciggiltah tan. Inkih yan rasi abuuruh raaqu waah yan. Sirooqa nek, nanu cube'kal nan way, foyya nek aboonu waanah yanin. Goli sara qanxixxisoonu nek waanah yanin.

²¹ Qeebi kee baantah anay ma wakti fan aabbu waah an?

²² «YALLI iyyam aabbeh an. Iyyaamah, ‹Yi mari duquuraay; yoo mayaaxigan. Kas sinni qunxa urrih gide ikkal, tut maradan. Uma-taamah abittol ken aleltam matana'mmay meqe taamah waqdi boola lon› 'yaanam axcih aabbe.

ERMIYAAS TAKKU WAYTA BAATI WACYIH YUBLE

²³ «Baaxo wagga hee waqdi, hebeltô-weelo luk manannaay baaxô-bagul tu mananna. Qaran wagga hee waqdi, qaraanal dite raddeh ten.

²⁴ Qaleela wagga hee waqdi, qaleeli kaadu dillibitah uble. Koomaami kabuk kabul koramkorah uble.

²⁵ Wonnah wagga hee waqdi num able cineh. Kimbir agantah baadeh, baaxo cabeh yen.

²⁶ Mangom elle aabakuk ten baaxo bacarih raqtam uble. Wokkel ten magaalooli abuuruh raqteh ten. Toh akah tekkem, YALLIH naqabih sabbatak ten. Too wacyi tublem yoo.

²⁷ Macaay inteenik, YALLI, ‹Inkih tan baaxo abuuruh raaqele iyyeh immay, inkitanuuk tet bayseyyo 'yaanam maxacco.

²⁸ Tonna leemiik, baaxo rookitele; qaran dattoowele. Tah intam yooy; exce yaabat maqagita. Excem exceh ikkal, tohum abeyyo› 'yaanam iyye.

²⁹ Qeebih faras amot yan mara kee gaysê-xaylo gabat le mari abah yan mamaatah xongolo yaabboonu waan waqdi, magaalal sugu waa mari kudele. Marak garab garbo elle tani'kke fan kudeleeh, garab booloh amot yan xeetih gubat culelon. Magaalooli inkih abur akkeleeh, num addal akak maraaqa.

³⁰ Yarusalaamey, baati koo tibbixek, sugay abtam macaay? Qax-meqe sartanat macah gacta? Dahabak bicsen bila xagarat bilqah macah hayta? Intil kucul macah isik hayta? Foyyah bilqitta'kkal, koo kicinuk suge mari kok cayyeh. A saaku koo qidaanam faxan.

³¹ Lacaw edde yemeete barrah xongoloh innah tanim yol radda. Naharsi-baxa xalta barra abta xongoloh bis le xongolo yol radda. Toh Yarusalaam mari abah yan weqweqsinto. Gaba deerih loonuuh, ‹Baati net tekkeh, bayneh nan! Nee selu waa mari mamaatat yan› iyyan».