Ermiyaas 39 - NABUWWA KEE MALIKWA

YARUSALAAM QEEBIT ELLE YIBBIXEN INNA

¹ Xidkiya Yuudak malik edde yekke sagalhaytô sanatak tabanhaytoh alsat, Baabelon-malik qaskarak elli haam luk Yarusalaam-magaalat qeebi aba'gidih maro teetit hee.

² Xidkiya malik edde yekke taban kee inikhaytô sanatak fereyhaytoh alsak sagalhaytoh ayro, magaalat maroh ten gasoosa yiggileenih.

³ Yarusalaam-magaala tibbixsime waqdi, Baabelon-malikih-qaskarak kaxxa abbobtih yen mari inkih, Fanti-Afa deqsita aracal daffeen. Tokkel daffeytem, Nergal-Sarexer deqsita num kee Samgar-Nabo deqsita num kee Sarsakim deqsita num kee, gersi Nergal-Sarexer deqsita numuy doolatat kaxxa arac lehiyya edde yen.

⁴ Xidkiya kee inkih tan kay qaskar magaala tibbixsimem yublen waqdi, magaalak barat edde yewqeenih gexen. Malik bustaan elle yen aracak gitah gaceeniih, magaala akak yawqen afah kabuuk namma gasok fan-fan gacca 'yeenih Ordon weeqaytu fanah haysiten.

⁵ Baabelon-qaskar lakal keenik gexxeeh, sarrak malik Xidkiya, Yerikô-magaalah garil tan booxal yibbixen. Too waqdi xabba kaa heeniih Malik-Nabkadnessar fan kaa been. Malik-Nabkadnessar, Camat deqsitta baaxok migaaqah Ribla deqsitta magaalal suge. Malik Nabkadnessar kaa baaheenim yuble waqdi, «Kaa digaala» 'yaanam amrih keenil oobise.

⁶ Malik Nabkadnessar, Ribla deqsita aracal, Xidkiyâ-xaylo abbak foocal qidsiiseeh; tohuk kalah kaadu Yuudâ-makaabon qidsiiseh.

⁷ Tohuk gaba kalla hee waqdi, namma inti kaak yeyyeqsiiseeh, sarrak Baabelon-rasu fan kaa beyaana'gidih, silsilatat uxuyya kaa hee.

⁸ Too ayrot Baabelon mari, malik qari kee raqqa 'te ummatih qarwat inkih gira ruuben. Yarusalaamat maroh sugte gidaarwa inkih bututtukku heen.

⁹ Sarrak Nabudardan deqsita numuy Baabelon qaskarak inkih abbah yenehiyya, magaalah addal raaqe mara kee kaal yemeete maray gaba kaal yeceehiyya inkih, gaabossa heeh Baabelon fan seewah bee.

¹⁰ Takkay immay takmem sinni masaakiina mabennay elle cabe. Qinab xala coox kee buqre elle aban baaxo keenih yecee.

¹¹ Malik Nabkadnessar kay qaskarak abbah yen Nabudardanak iyyeemih,

¹² «Gexay Ermiyaas elle aninnaan ikkek gorrissa kaa haay baahaay, meqe aracal kaa hay. Umam kaal mabaahin. Usuk yoh ab axcinnaanim kaah ab» kaak iyye.

¹³ Too waqdi kay qaskar abba Nabudardan kee, Nabusadban deqsita numuy kay gubal qaskar abbah yenehiyya kee, Nergal-Sarexer deqsita numuy doolatat kaxxa arac luk yenehiyya kee, kaadu wohuk kalah tan doolat abbobti tikka 'yeenih,

¹⁴ Ermiyaas edde suge malik-qarih-daaratak kaa bahsiisen. Sarrak Acikám-Gedalya deqsita numih gabal kaa heen. Sarra «Ta num xabba haay kay buxa fan kaa guddus» iyyen. Acikám-Gedalya, Safanya deqsita numuk baxi-baxak ten. Too num Ermiyaas beyya heeh, kay buxal kaa hayya hee. Tonnal Ermiyaas isi ummattah addal gace.

¹⁵ Ermiyaas malik-qarih-daaratal casbi gurral yen saaku, YALLIH qangara kaal obteh ten.

¹⁶ Too saaku YALLI kaak iyyeemih, «Ama Kuusuh yooboke Qebedmelekik intaamah, ‹Yoo YALLAY Nabaamak Nabah, Israayil doore Dagelta kinnihiyya axceemih: Akah inxicca exce innah, a magaalal bala oobiseyyo ikkal, maqaane moobisa. Taham atu isi intih akkih abletto.

¹⁷ Takkay immay ku tiyah tu gactek, yooy YALLAH yani koo dacriseyyo. Akak meysitta marih gabal koo maha.

¹⁸ Amaanah koo raaqiseyyooh; koo maqidan. Yoo taamineemih sabbatah amaanah asillimetto. Tahat yabtam yoo YALLA› 'yaanam kaak inxic» kaak iyyeh yen.