Ermiyaas 38 - NABUWWA KEE MALIKWA

ERMIYAAS BIRKATAT QIDEN

¹ Mattán-Safatya kee Fascúr-Gedalya kee Selemyâ-Yahukal kee Malkiyâ-Fascur, YALLI iyyem Ermiyaas ummatah warisah yoobben.

² Ermiyaas iyyeemih, «A magaalal suginnaan num carbit-rabiiy qululuh-rabiiy, hinnay kaadu, dalkah-rabi akkele. Wonna hinna'mmay, Baabelon-mara fan gexxa 'yeh gaba keenil yacee num waddiimele.

³ A magaala Baabelon mari carbit abbixeleeh ken gabat gacele. Toh yok intem YALLA» keenik iyye.

⁴ Sarrak doolatak saqoltih yan mari malikik iyyeemih, «A num edde yaaba yab qaskar kee ummatak inkih niya yaggile yaaba. Ummatah umam akke waytek, keenih maqaane faxa numuk tanih matan. Ah iyyeemih rabi kaal yamaate» iyyen.

⁵ Too waqdi malik keenil gacseemih, «Edde yanim, sin gabah addak; faxxeenim kaak aba. Sin edde waasa dudda mayyu» keenik iyye.

⁶ Too waqdi beyya kaa heenih akattat uxuyya kaa heenih, malik-qarih-daaratal yen birkatat tagra gurral kaa qiden. Too birkat, malik baxay migaaqah Malkiya deqsitak yenehiyyah birkatak ten. Too birkat kallak sah, lee luk manannaay; tonna leemiik too kallak addat cule.

⁷ Qebedmelek deqsita numuy Kuusuh yoobokeeh seelabu luk yenehiyya malik qarih abbootan luk yeneeh, too num Ermiyaas birkatat qideenim yoobbe. Malik too uddurul Benyam-Culma deqsitta afal cokmih daffeeh yen.

⁸ Too waqdi Qebedmelek malik buxak bukka iyyeh malikil amma 'yeeh kaak iyyeemih,

⁹ «Malikow, a mari abem gitah tanim hinna. Nabi Ermiyaas birkatat qideeniih; magaalah addal sahda dudda maaqo elle deedalta'kkel, qeeli addat qululuh rabam faxa» 'yaanam iyye.

¹⁰ Toh yoobbe waqdi malik Qebedmelekik iyyeemih, «Ama'kkek soddom num luk gexaay, akatta kaah qidaay, rabaamak naharat birkatak kaa eyyeeqa» iyye.

¹¹ Qebedmelek woo mara gabat hayya heeh, malik qarik duyye elle daanisan golik tembexe calagto gabat luk, nabi Ermiyaas edde qiden birkat fan gexe. Akkattat too calagto uxuyya heeh nabi Ermiyaasal ruube.

¹² Sarrak, «Akatti koo akah biyaake waa innah, ama calagto axcal isik uxuy» kaak iyye.

¹³ Sarrak birkatak too akattat giitak kaa yeyyeeqen. Sarrak malik-qarih-daaratal kaa heen.

XIDKIYA ERMIYAASAL FAYU ESSERE

¹⁴ Ayrok teena malik Xidkiya YALLIH Qibaadah-Qari akak culan afak sidochaytoh afa fan kaa bahsiise. Tokkel kaak iyyeemih, «Koo esseram faxam liyok, nummat yo'lih yaabe mantuu?» kaak iyye.

¹⁵ Too waqdi Ermiyaas kaak iyyeemih, «Nummat ko'lih yaabek, yoo qidsiisettooh; fayu yakke yaabat ko'lih yaabek, yok mataabbak, maca aboo?» kaak iyye.

¹⁶ Too waqdi malik Xidkiya sirrit kaak iyyeemih, «Raba kol ackume waah koo qidam faxa marih gabal koo hee wayu waamah waara Yallay nee yuklukehiyyah migaaqal koh xiibita» iyye.

¹⁷ Toh yoobbe waqdi, Ermiyaas kaak iyyeemih, «YALLAY, Nabaamak Naba Dageltay Israayil doore kinnuk, kok iyyem ah teeti. ‹Baabelon-qaskarih-abbobtil gaba teceek, rooci kok cattiimeleeh, a magaala kaadu girak cattiimele. Koo kee ku buxah marak inkih rooci cattiimele.

¹⁸ Woh hinna'mmay atu gaba acee waytek, a magaala Baabelon-malikih gabal gacele. Too mari gira teetit ruubele. Atu kaadu elle taawwe kabu mageyta› 'yaanam kok iyye» kaak iyye.

¹⁹ Too waqdi malik Ermiyaasak iyyeemih, «Anu, ni maray Baabelon-mara lih gacca 'yeh nee bayisam faxahiyyak meysitah an. Baabelon malikil gaba eceek, usuk ni maray ken lih yanihiyyah gabal yoo haam takkeeh; tonnal too mari umam yol baahele» kaak iyye.

²⁰ Too waqdi Ermiyaas kaak iyyeemih, «Ken gabal koo mahaan. Koo kallacu waak, ku maganah, YALLI amri macinin. Tonnal kullim kol amqeleeh, rooci kok cattiimele.

²¹ Tonna'mmay ta yab cinta koo tekkek, YALLI wacyi yol ruubeeh, kot takku waytam yoo yuybulleeh.

²² Wacyih maca tublee? intek, Yuudâ-malikih buxal raaqe agabuy Baabelon-qaskarih-abbobtih fan salafat akak gacca 'yeenih beyaanahiyya uble. Too agbi too waqdi kok axcuk yeneemih, ‹Malik kaxxam aamanuk yen kataysis gitak kaa hoxisseeh isinni amrih gubat kaa heen. A saakuy ibi kallat kaak culehiyya kay kataysis kaal makteh kaa cabeenih gexen› 'yaanam axcih ken uble» kaak iyye.

²³ Kaadu qagseh kaak iyyeemih, «Gennaaqot lito agabu kee xaylo Baabelon marih gabal kok heelon. Atu kaadu elle taawwe kabu mageytaay, Baabelon-malik seewah koo beele. A magaalat gira ruubelon» kaak iyye.

²⁴ Too waqdi Xidkiya kaak iyyeemih, «Away koo kee yoo edde walallem, koo kee yook sah, gersi mari aaxige waama. Ta yab sirrih abnek, umaaneh kot takku waytam matan.

²⁵ Koo kee yoo wallallem doolat mari yoobbek, kol amaateloonuuh koo kee yoo geynem koo esserelon. ‹Koo kee malik edde walalteenim neh waris. Toh neh warse waytek, koo qidenno› kok axcelon.

²⁶ Tonna'mmay toh koo esseran waqdi, ‹Malikik, Tahak sa Yonaatan-qaril-yan-casbih yoo maruubin, axcuk kallacak kaa suge› keenik inxic» kaak iyye.

²⁷ Sarrak doolat-abbobti takkeemiik Ermiyaasal temeeteeh, «Malik kee koo elle garayak sugteenim macaay?» kaak iyyen. Too waqdi Ermiyaas malik kaak inxica iyyem keenik iyye. Malik kee kaa edde walalak sugteemih adda, ken nammayak sah, yaaxige num manannaay; tohih sabbatah yab bisoh kaal mahannon.

²⁸ Sarrak Ermiyaas, Yarusalaam-magaala carbit xabba haanam fanah, malik qarih daaratay kaa elle abbaxuk sugeenil elle suge.