Ermiyaas 37 - NABUWWA KEE MALIKWA

XIDKIYA ERMIYAAS ESSEREEMI

¹ Baabelon-malikih yen Nabkadnessar baaxo yibbixek lakal, Yahoyaakím-Yahoyaasiniy malikih sugehiyyah aracal, Yoosiyaahû-Xidkiya Yuudâ-malikih hee.

² Takkay immay too saaku, YALLI Ermiyaasal oobise qangara, Xidkiyay malik yekkehiyya takkuu, kay gubal taamitta doolat abbobti takkuu, hinnay kaadu wohuk kalah tan ummatay raqqa 'tehiyyak, num oggole cineh.

³ Malik yekke Xidkiya YALLIH yaabay Ermiyaas kaah warsehiyya cineh immay sarra farmo kaah ruube. Farmo elle ruubem, Selemyâ-Yahukal kee sek Xafanya deqsita seekiy abba akak Maqseyaahu deqsitak yenehiyyak ten. Farmoh keenik iyyemii, «Gexay nabi Ermiyaasak, ‹YALLAY ni Dageltah yani neh kallacaay dooqa neh ab› kaak inxica» iyye.

⁴ Too farmo kaa gufte saaku, casbit gace'kal yeneeh, isih faxe ikke gexaamak kaa waassam mananna.

⁵ Too farmo kaa gufte way, Baabelon qaskaray Yarusalaam magaala marot abbaxuk sugtehiyya wokkek wadir yiysen. Magaalak xer ikkel gaceenih yenen. Toh akah abeenim, Masri-qaskar isi cuduuduk tabba 'teh Yarusalaam fanah tamaate 'yaanam yoobbeenimik ten.

⁶ Sarrak YALLIH qangara Ermiyaasal obteeh;

⁷ too qangaral YALLAY Israayil doore Dagelta kinnihiyya iyyeemih, «Ama Yuudâ-malikiy Yalla neh kallac kok iyyehiyyak intaamah, ‹Masri-qaskar ku catoh tamaateeh gitat tani'mmay wadir gacele.

⁸ Tohuk wadir Baabelon qaskar wadir aduureleeh ama magaalat qeebi abeleeh, tet abbixele. Tibbixek wadir gira teetit ruubelon› kok iyye kaak inxic.

⁹ Toh lih kaadu kaak intaamah, ‹Baabelon-mari a magaala abbixe'kal raaqelem kot ceele waytay. Tet abbixelem ixig. Toh intam yoo YALLA.

¹⁰ Inkih tan Baabelon-qaskaray qeebi kot abtu waytahiyyak qeebil tayseemih; siraq addat xaaguqal raaqinnaan num takke way tet abbixeleeh gira teetit ruubele› kaak inxic» iyye.

ERMIYAAS CASBIT HEEN

¹¹ Baabelon qaskar Masri qaskar tamaatem yoobben waqdi, Yarusalaam cabeenih gexen.

¹² Too waqdi Ermiyaas Yarusalaam magaalak Benyam rasu fan gexam qimbise. Akah gexem, kay buxah-marih nagrak kaa raddam beeta'gidik ten.

¹³ Takkay immay Benyam-Culma deqsitta afa gufe waqdi, dacayrih wokket yan marak abbah suge numuy migaaqah Selemyâ-Yiriyya deqsitaah Cananya deqsita numuk baxi-baxah yamaatehiyya, «Atu Baabelon-qaskarih-kabut gactem hinna!» kaak iyyeeh; casbit kaa hee.

¹⁴ Too waqdi Ermiyaas kaak iyyeemih, «Aleey! Anu Baabelon-marih-kabut siinik magacinniyo» kaak iyye. Takkay immay woo qaskariiti woh kaak moggolinnaay, xabba kaa heeh doolat abbobtih yan mara fan kaa baahe.

¹⁵ Too mari toh yoobbe waqdi, kaxxam yinqibeeh; kaa yuysugureenik lakal, kutbe-abeenah yen Yonaatan deqsita numih qariy casbi buxah heenihiyyah addat kaa heen.

¹⁶ Too numih qarih addat, baaxok guba casbih bicsen aracat kaa hayya heenih, tokkel mangom kaa sugsen.

¹⁷ Ayrok teena Malik-Xidkiya isi buxa kaa baaha iyyeeh, tokkel dibuk tani'kkel, «YALLAK temeete farmoh maca tan?» kaak iyye. Ermiyaas kaak iyyeemih, «Farmo tanih. Koo Baabelon malikih gabal heelon» kaak iyye.

¹⁸ Sarrak Ermiyaas malikik iyyeemih, «Casbit yoo akah tabbixe umaaney koo kee ku gubal taamita mara kee ku maral baahe macaay?

¹⁹ Isin nabuwwah luk sugten maray ‹Baabelon-qaskar qeebi kot mabtaay ku marat mabta› axcuk sugehiyya, a saaku maca yekken?» kaak iyye.

²⁰ Kaadu qagseh kaak iyyeemih, «Taway inki qangara koo esseru waa. Ku maganah malikow, yi amoytaw, tahaysa wadir Yonaatan-qarih-casbih yoo maruubin, ku maganah! Too casbi tahak sarra nammeyhaak culek rabeyyo» kaak iyye.

²¹ Malik Xidkiya too yab kaak yoobbeeh; tohuk gexxaamah isi-qarih-daaratal kaa heeh qari irok kaat alfe. Tokkel magaalal gaqambo tambaxeemik dumal, kulli ayro gaqamboyta kaah baahak sugen. Tonnal malik-qarih-daaratal kaa abbaxuk yenen.