Ermiyaas 36 - NABUWWA KEE MALIKWA

YAHOYAAKIM, ERMIYAAS YUKTUBEM GIRAT RUUBE

¹ Yoosiyaahû-Yahoyaakim Yuudâ-malik edde yekke fereyhaytô sanatat, Ermiyaasal YALLIH qangara obteeh; kaak iyyemii,

² «Xambaqen-warkat baahay, Israayilih yooboke maraay Yuudah yooboke mara kee, raqqa 'te doolatwah giddinaamak, anu edde yabba excem elle uktub. Yoosiyaahu malikih yen saaku naharak ko'lih edde yaabe yaabak xabba haay a saaku fan, ko'lih edde yabba exceemik tu cabe'kal uktub.

³ Yuudâ-mari, anu keenil oobisam faxa bala yaabboonu waan waqdi, away edde yanin dambik yaduureenim takkeh. Oson too dambik yuduureenik, anu kaadu duma aben umaanek qafu keenih abeyyo» kaak iyye.

⁴ Tohuk lakal Ermiyaas, Neeriyyâ-Baaruk deqsita numuh secca iyyeeh; YALLI kaak, «Uktubay raaqisa» iyyem, too numuh yaktube'gidih warse. Too waqdi Baaruk tohim inkih xambaqen-warkatal yuktube.

⁵ Tohuk lakal Ermiyaas kaak iyyemii, «YALLIH Qibaadah-Qari fan gexaamak yoo waaseenih immay,

⁶ atu ummat soomuh assa saaku Qibaadâ-Qari gexxa 'xicay, tama taway koh warse yaabay tuktubehiyya keenik foocal, anay fayya haay kawsa keenih ab. Tamah inkih YALLIH yaabaay; YALLI keenih warisa yok iyye yaaba. Tonna'mmay Yuudâ-maray magaaloolik yemeeteh agantah akah yaabben innah, keenik foocal anay fayya haak kawsa keenih ab.

⁷ Macaay intek, YALLI, bagcarra keenil baahu waam edde keenih warseh yeneeh; too bagcarra cunxo keenit qiddeemih taagah, aben umaanek yaduureeniih YALLA kallacaanam takkeh» 'yaanam kaak iyye.

⁸ Sarrak Baaruk YALLIH Qibaadah-Qari fan gexeeh, YALLIH yab hununuh Ermiyaas kaak elle inxicca iyye'nnal kawse.

⁹ Yahoyaakim, Yuudâ-malik edde yekke konoyhaytô sanatak sagalhaytoh alsat, Yarusalaam magaalal yen mara kee, Yuudâ-magaaloolik yemeete maray Yarusalaamal yenehiyya titta geyya heenih YALLAH soomen.

¹⁰ Too mari inkih elle gaaboowe'kkel, Baaruk xambaqen-warkat fakka heeh, YALLIH yaabay Ermiyaas kaah warsehiyyak kawsa keenih abe. Toh keenih elle yikriyem, YALLIH qibaadah-qarih addal Gamarya deqsita numih golih addak ten. Gamaryak abba Safan deqsitak yeneeh, duma malik-buxak kutbe-abeenah yen. Too qari elle yenem, YALLIH Qibaadah-Qari luk yen daga raqta golittek golik teenay Qibaadâ-Qarik Qusba-afay akak culaanahiyyak garik ten.

¹¹ Safán-Gamaryâ-Miikayhu deqsita num Baaruk keenih yikriye YALLIH yab yoobbe waqdi,

¹² malik buxah addal kutbe-abeenah yen numih qari culeeh; tokkel doolatak saqoltih yen mari inkih daffeyna luk kaah sugen. Too daffeynat kutbe-abeenah yen Alisamaq deqsita num kee, Samaqyâ-Dalaaya kee Qakbór-Alnaatan kee Safán-Gamarya kee Cananyâ-Xidkiya kee, wohuk kalah tan doolatak saqoltih yan mari edde yen.

¹³ Too waqdi Miikayhu, YALLIH yaabay Baaruk Qibaadâ-Qarih addal kawsa keenih akak abehiyya, ta maray daffeynat sugehiyyah warse.

¹⁴ Tohuk lakal doolatak saqoltih yen mari, Natanyâ-Yahuudi deqsita numuy Selemya deqsita numuk baxi baxak yeneeh Kuusi deqsita numuk kaadu baxi-baxih baxak yenehiyya, Baaruk fan ruuben. Iyyeenimih, «Atu Baaruk fan gexay, ‹Ama ummatah tikriye warkat luk nee fan am› kaak inxic» kaak iyyen. Too num gexeeh Baaruk baaheh; Baaruk too warkat gabat luk keenil yemeete.

¹⁵ Taaxige daffeyna luk suge mari, Baaruk yemeete way, «Daffeyay ama noobbe warkatak kawsa neh ab» kaak iyyen. Baaruk too warkat kawsa keenih abeh.

¹⁶ Kawsak gaba kalla hee waqdi, meysih, mariiy mara keenik wagga hee. Sarrak, «A yab malikih warse waynek, abnam mannu. A yab malik yaabbem tayse» 'yaanam iyyen.

¹⁷ Sarrak kaak iyyeenimih, «A gid yakke yab inkih mannal tuktube? Ermiyaas koh warse yab maay kinni?» kaak iyyen.

¹⁸ Baaruk keenik iyyeemih, «Yeey, Ermiyaas yoh warseeh; anu too waqdi gabak uktube» keenik iyye.

¹⁹ «Ah noobbek, away koo kee Ermiyaas gexxa 'xicay aracak teenat ombooqoraay, sinaamah mamballayina» kaak iyyen.

²⁰ Sarrak doolatak saqoltih yan mari, woo yab elle yan warkat, migaaqah Alisamaq deqsita numuy malik qarih kutbe-abeenah yenehiyyah qarih addal daanah cabeenih, isinnih a yab malikih warsaana'gidih gexen. Malik isi qarih daaratal keenih sugeeh; too waqdi ta yab kaah warsen.

²¹ Sarrak malik woo warkat baaha'gidih Yahuudi farmoh ruube. Yahuudi gexxa 'yeh woo xambaqen-warkat Alisamaq-qarik baaheeh, sarrak malikik foocal, doolatak saqoltih yan mari maraasiyot kaa elle yabbixe'kkel, keenih kawse.

²² Toh edde tekkem gilalak teneeh, warkat kaah yikriyen waqdi, gilalak-gilal elle gaca aracal giral is laqisak suge.

²³ Sarrak Yahuudi a warkatak exxak teenak kawsak gaba kale waqdi, woo exxay kawsehiyya gabak kaak beeh gilet irgiqqi heeh, laqsitak suge girah addat qide. Inkih tan warkatay kutbe elle tanihiyyak kawsak gaba akak kalinnaan gali gabah addak kaak beyak, inkih tan warkat selli haam fan girat qidak suge.

²⁴ Kay doolatak saqoltih yan maray ta yab yoobbehiyya kaadu mawariggitinna. Hinnay kaadu, «Umam net takku waytah tan!» 'yaanam maxacinnon.

²⁵ Elnaatan kee Dalaaya kee Gamarya, «Malikow, warkat girat maqidin» axcuk kaa kallaceenih immay keenik cineh.

²⁶ Sarrak malik isi baxay Yeracmaqil deqsital amri yeceeh, kaak iyyeemih, «Qadriyél-Seraaya kee Qabdíl-Selemya is lih hayya haay, gexay Ermiyaas kee Baaruk baahay uxuya» kaak iyye. Takkay immay YALLI, Ermiyaas kee Baaruk keenik qelliseh.

²⁷ Sarra Ermiyaas Baarukuh warse YALLIH qangara Yahoyaakim carrisek lakal, YALLIH qangara kaadu Ermiyaasal obteeh; kaak iyyemii,

²⁸ «Aki xambaqen-warkat baahay naharsi warkatal tuktubeh sugtem inkih qagisay elle uktub.

²⁹ Malik Yahoyaakimik intamaa, ‹YALLI kok iyyaamah, Warkat cararisseeh; Ermiyaas a yab akah baaheeh, Baabelon malik a baaxo bayseleeh, a baaxol taniimik lac macabaay num macabay selele 'yaanam akah iyyem macaay inte'mmay,

³⁰ yooy YALLAH yani tohul kol gacsam liyo. Ahak wadir kok rade mari Dawud-qarkayto managra. Dawuduk raaqe dardaarinna managran. Ku qaada koh warisu waa. Ku raysi laqo ayrô bagul qangalaylut aseleeh, bar waacal xiinele.

³¹ Koo kee kok rade mara kee, ku doolatak saqoltih yan mara inkih, abba hayten dambih sin digaaleyyo. Koo kee Yarusalaam magaalal yan mara kee Yuudah yooboke marak, «Maabinay uduura» 'yaanam siinik exceh suge'mmay, woh num siinik moggolinna. Tonna leemiik duma siinil oobiseyyo exce balak tu macabay siinil oobiseyyo› 'yaanam kaak inxic» iyye.

³² Sarrak Ermiyaas aki warkat bahha heeh, kutbe-abeenah kaak yan Baarukul yecee. Baaruk usuk kaah warissa heem inkih yuktube. Too naharsi warkatal uktubba hee yab kee, wohuk kalah kaadu, too yaabih bis le yab edde qagissa heeh yuktube.