Ermiyaas 35 - NABUWWA KEE MALIKWA

REKAB DEQSITA GULUBU

¹ Yoosiyaahû-Yahoyaakim Yuudâ-malikih yen dabaanal, YALLI Ermiyaasal oobise qangara ah teeti. YALLI kaak iyyemii,

² «Rekab deqsita gulubuh gacsa mara fan gexaay, YALLIH Qibaadah-Qari fan ken bah. Tokkel Qibaadâ-Qarih golittek golik teena ken culussa haay, qinabak bicsen kamri ken efeq» kaak iyye.

³ Too waqdi tohim YALLI yok elle iyye'nnal, Cabaxxinyáh-Ermiyaás-Yaadanya kee kay tooboko kee kay xaylo kee, inkih yan Rekab-gulubuk num macabinniyoy,

⁴ yakkeenimiik YALLIH Qibaadah-Qari fan ken baahe. Qibaadâ-Qarik Yigdalyaahû-Caanan deqsita nabih darsa edde ten golih adda ken culse. Too goli Qibaadâ-Qarik saqoltih yan mari le golik xaqut yeneeh, kaadu Sallúm-Maqseyaahu deqsita numih golik daga raaqa golik ten. Maqseyaahu Yallih Qibaadah-Qarih taamat kaxxa arac le numuk ten.

⁵ Sarrak kobboyaayi kee sacnittey qinabak bicsen kamrik kibuk tanihiyya foocal keenik hayya heeh, «Uquba taway» keenik exce.

⁶ Too mari too waqdi yok iyyeemih, «Aleeyyah! Nanu qinabak bicsen kamri yaaqube mara hinnino. Ni kaxxa abbay nanu akak radneeh migaaqah Rekáb-Yonadab deqsitak yenehiyya nee kee nek radda 'ye marak, ‹Qinabak bicsen kamri maaqabina› 'yaanam farrintoh iyyeh cabe'kkal, manaaquba.

⁷ Kalah kaadu nee akah farriimem tan. Toh macaay intek, ‹Qarwa maxisina. Buqre maabina. Qinab xala coox maysubukinaay maxaamina› axcuk nee farriime. ‹Qarwah kulli way siraq haysita. Dacarsittô-maray akah taniinik makatina. Tonnal mango wakti elle tanin baaxol raagetton› 'yaanam nek iyye.

⁸ Usuk nek aba iyyem oggolleh. Nee kee ni xaylo kee ni agbi qinabak bicsen kamri manaaquba.

⁹ Qarwa maxisnaay buxah siraqwa linooh, qinab xala coox manaysubukaay baqurê-baaxo mannuuy daro manabqura.

¹⁰ Ni kaxxa abbay nanu akak radnehiyya nek aba iyyeemik bayisnem mannuuy, inkih duudusne.

¹¹ Away dabaaqah Yarusalaam addal nani'mmay, akke nemeetem Baabelon malik baaxo warare saakuuy; too saaku Baabelon-malikih-qaskar kee Assuuriyah-malikih-qaskarak abne meysih, ta magaala nemeete» yok iyyen.

¹² Tohuk lakal YALLIH qangara yol obteeh; yok iyyemii,

¹³ «Gexay Yuuda kee Yarusalaam magaalah ummatak intaamah, YALLAY Nabaamak Nabah, Israayil doore Dagelta kinnihiyya, ‹Isin yi yab akah cintaanaah, aba siinik axcem akah abe waytaanam macaay? Kas way akah gee waytaanam macaay?

¹⁴ Yonadabak rade mari, ken kaxxa abba keenik aba iyyem abaanaah, ken kaxxa abbah yab uxih yabbixeeniih, baaxot maqidinnon. Hay, isin litoonum macaa? Kulli way sin lih yaaba way, yab yok akah cintaanam macaa?

¹⁵ Nabuwway yi farmot tanihiyya fiiruk geerah sin adda ruubeeh, too nabuwwa, «Uma-taama cabaay cakkih tan taamah taamita» 'yaanam siinik inte. «Yalli sin kaxxa abbobti kee siinih ikoytah yecee baaxol muquk xintaanam faxxeenik, maabinaay; Yalla cabba hayteenih xeet kee coox maqbudina» 'yaanam siinik mango adda iyyen. Tohuh, ken yab maabbinnitoonuuy, yot baaqid mahanniton.

¹⁶ Yonadabak rade mari isi kaxxa abbah yab ta saaku fan mabaysinnon. Usuk keenik maabina iyyem uxih maaban. Siinih tu gactek, anu siinik maabina excem abtaanaah, yi yab cinteenih.

¹⁷ Tahaysa yoo YALLAAY, Nabaamak Naba Dageltay Israayil doore kinnuk, siinik axcemii, Yuuda kee Yarusalaam magaalah maraw, siinil ruubeyyo exce bala, akah exce'nnah, siinil ruubeyyo. Sin lih yaabeeh; aabbe cinteenih. Siinih seeceeh; maqal yok edde mahannitoonu'mmay, tahaysa bala siinik raq malim ixiga› 'yaanam keenik inxic» yok iyye.

¹⁸ Tohuk lakal YALLAY Nabaamak Nabah, Israayil doore Dagelta kinnihiyya, «Rekab-gulubuh waris» yok iyyem warse. Keenik excemii, «YALLI siinih warisa yok iyyem, siinih warisu waa. Siinik iyyeemih, ‹Sin kaxxa abbay akak raddeenihiyyah yab bayse'kal, usuk siinik aba iyyem duudusa mara tekken.

¹⁹ Toh ubleeh; tohuk gexxaamah, yoo YALLAY Nabaamak Nabah, Israayil doore Dagelta kinnihiyya xagana siinih cula. Toh maa xagnaay inteenik, Rekáb-Yonadabak rade marak lab-baxay kulli way yi qibaadat gacu waahiyya aabukele. Ta qaada adok adol raaqele› 'yaanam siinik iyye» keenik exce.