Ermiyaas 34 - NABUWWA KEE MALIKWA

YALLI XIDKIYAH RUUBE FARMO

¹ Baabelon malikiy migaaqah Nabkadnessar deqsitak yenehiyya, isi qaskar kee usuk amol akak raqqa 'ya doolatwah qaskar haysitta heeh, Yarusalaam magaala kee tet dariifal tan magaaloolit qeebi abak yen saaku, YALLI Ermiyaasal qangara oobise. Kaak iyyeemih,

² YALLAY Israayil doore Dagelta kinnihiyya kok iyyeemih, «Gexay Yuudâ malikih yan Xidkiyak intaamah, YALLI, ‹A magaala Baabelon-malikih gabal heeyyo. Too malik Yarusalaamat gira ruubele.

³ Atu kaadu kay gabak mataftucaay matasillima. Tintixibbixek lakal, fooca kee foocah kaat angoorowettooh, isi afaak kaa'lih yaabetto. Tohuk lakal seewah Baabelon rasu fan koo beelon› kok iyyah yan, kaak inxic.

⁴ «Kaadu qagissa haay kaak intaamah, ‹Taway kok axcem cubbusay raq. YALLI kok iyyaamah, Rabta saaku amrih rabetto ikkal, carbit marabta.

⁵ Duma ku kaxxa abbobtiy kok dumal malikwah sugtehiyyah rabal qaydarus akah ruubak sugen innah, ku rabal kaadu qaydarus ruubelon. Rabta saaku koh rookiteloonuuh, Woyyow ni malik rabeh, koh axcelon. Tahat yabtam yoo YALLA› 'yaanam kok iyye, kaak inxic» iyye.

⁶ Tohuk lakal nabi Ermiyaas, YALLI kaak warisa iyye farmo, malik Xidkiyay Yarusalaamal yeneh warse.

⁷ Usuk too farmo warsa'gidih yemeete waqdi, Baabelon-malikih-qaskar Yarusalaam magaala tabbixe'gidih, qeebi teetit abak sugte. Tohuk kalah tan Yuudak namma magaalay gaso maroh edde taniih, migaaqah Laakis kee Qadeeka deqsittahiyyay tohum fanah antixibbixe'kal sugtehiyya yabbixeeni'gidih, qeebi edde abak sugen.

NAQOOSA CURRIH ABOONUH YEYYEEQEN MADQAT QAGTEN

^8-9 Malik Xidkiya kee Yarusalaam magaalah mari, Qibraanah yooboke maray ken marah yenehiyyak labim kee sayimiy naqoosah yeddereenih yeneenihiyya, curri abaanaah gexxaasitoonay ken iyyaanamal titta geen.

¹⁰ Tahamal ayyunta kee makaabon titta geyteeh, «Away currih ken rubnaamaay, tahak wadir naqoosah ken addare waynay» 'yaanamal titta geeniih, sarra ken ruubeenih.

¹¹ Takkay immay waqlak wadir, duma titta elle geenimit qagteeniih, wadir edde ken abbaxuk sugen naqoosannuh ken gacsen.

^12-13 Too waqdiiy YALLIH qangara Ermiyaasal obteeh; kaak iyyeemih, «Ermiyaasow, tama marak intamaa, YALLAY Israayil doore Dagelta kinnihiyya siinik iyyaamah, ‹Dumî dabaanal sin kaxxa abbobti naqoosannut elle sugen Masri rasuk, woo naqoosannuk currih ken eyyeqqa heeh ken baahe saaku, ken kee yi fanal qahdi yekke.

¹⁴ Toh macak tan inteenik, Qibraanah yooboke num naqasuh yeddere num yenek, lica sanat kaah taamitak sugek lakal, malcinhaytô sanat elle yamaate'kkel, currih gexitay kaa intaanam siinil ten. Takkay immay duma sin kaxxa abbobti yi yab aabbuk masuginnaay, anu keenik axceemit maqal haysitak masuginnon.

¹⁵ Away xayi saaku, duma edde sugten qellat ixigga hayteenih, ruffa yoo haytam abteenih sugten. Toh macaay inteenik, takkeenimiik titta geyya hayteenih, sin maray naqoosah luk sugteenihiyya cabteeniih, curri ken abteenih sugten. Too sittin-gey yoo elle yaqbuden yi qibaadah qarih addal yi migaaqal abten.

¹⁶ Takkay immay sarrak wadir inteenimit qagitteeniih, ruffu yoo elle hayten ikkel, wadir yi migaq tuyqunxeenih. Takkeenimiik, currih sin cabnek gexxaasita akak inten mara, wadir naqoosannuh gacissen.

¹⁷ « ‹Tonna'mmay isin toh abteenik, hay, ta saaku, yooy YALLAH yani siinik axcemii: «Isinni mara ruubaay curri ken aba» siinik exce'mmay, yi yab cinteenih. Tahaysa isinnih dooritten curriyyat siinil ruubeyyo. Toh ma curriyyata inteenik, carbi kee dalka kee qulul rabtaana'gidih, siinil ruubu waa curriyyata. Baadal enna 'ya mari anu siinil baahem yaabbu waa waqdi, kaxxam wariggitele.

¹⁸ Qahdi yo'lih luk yen maray too qahdil keenik excem duuduse weehiyyak axceemih: too qahdi culen saaku qiden daheltuy namma ikkel kurra heenih namma fan akak gacca 'yeenih gexak yeneenihiyyak abeenim keenik abeyyo. Too daheltih innah namma'kkel ken kureyyo.

¹⁹ Yarusalaam magaalah abbobtih yan mara kee Yuudah-abbobtiiy, malik qaril abbootan le maraay, seeka kee inkih yan ayyuntak toh abu waama.

²⁰ Keenik naqboytiitih yan maray ken qidam faxahiyyah gabal ken heeyyo. Ken raysi qambil kee alluwwâ-gadda akkele.

²¹ Tonnah kaadu Yuudak malikih yan Xidkiya kee kay gubal tan doolat abbobti, kaa niqba maray kaa qidam faxahiyyah gabal heeyyo. Baabelon malikih qaskaray awayih ibak qeebi keenik yeyseedem ceelahiyyah gabal ken heeyyo.

²² Yarusalaamat nammayhaytô qeebi abaana'gidih, uduura keenik axceyyooh; too waqdi aduureloonuuh, qeebi teetit abelon. Qeebit tet abbixeloonuuh, tet carriselon. Yuudâ-magaalooli bacarih tan baaxoy num sinniih lac sinni abeyyo. Tahat yabtam yoo YALLA› 'yaanam keenik inxic» iyye.