Ermiyaas 33 - NABUWWA KEE MALIKWA

YALLI ISI MARAH ABE XAGNA

¹ Ermiyaas malik-qarih-daaratal, soola-casbit yan waqdi, YALLI qangara qagissa heeh kaal oobiseeh, kaak iyyeemih,

² «Ko'lih yabtam, YALLAY addunya gineeh tet missoyseeh tet daabisehiyya kinni. Yi migaq YALLA.

³ Yoh sec. Yoh secta way, seeco kok aabbeyyo. Kaxxa assakat leemiy aaxige waytay qagabah tanihiyya koo aybulleeyyo.

⁴ Tonna'mmay yoo YALLAY Israayil doore Dagelta kinnihiyya kok axceemih: Yarusalaam magaalah mari, Baabelon-maray qeebi keenit abahiyyak megdebih edde gacaana'gidih, malikwâ qarwa kee raqqa 'ye marih qarwa yiggilen.

⁵ Too qarwah adda yi bagcarra elle obte maray Baabelon mari selu waahiyyah raysak amaggele. Yoh tu gactek, yok catoh geyoonu waanam malon. Tet marih umaaneh, a magaalat ahaysa darre cabeh ikkal, yi cato mageyta.

⁶ Takkay immay a baati raagtu wayta baati hinnaay, ahak sarra Yarusalaamak rooci wadeyyooh, luk sugte qaafiyatah tet gacseyyo. Kaxxa maqaane kee wagarih tet xiiniseyyo.

⁷ Israayil kee Yuudah yooboke mara, seewah ken been baaxok, ken baaxo ken gacseyyooh, duma akah suggu 'yen mara ken abeyyo.

⁸ Yol baahen dambik qafu keenih abeyyo. Edde sugen dambi kee abak sugen yabti-cinak kaadu qafu keenih axceyyo.

⁹ Yarusalaam anu rufto kee kunnaba kee migaq-gexxo elle geya magaala akkele. Kulli baaxoh mari, anu Yarusalaam marah abe maqaane kee Yarusalaamal yan mara gaddaleela elle abe'nna yaabboonu waan waqdi, hagga axceloonuuh axaxitelon» 'yaanam iyye.

¹⁰ YALLI qagissa heeh, iyyeemih, «Ummat intaamah, ‹A baaxo bacarih tan baaxoy num kee lac elle deedaltahiyya tekkeh tan› 'yaanam iyyan. Toh keenik numma. Yuudâ-magaalooli kee Yarusalaam gititte sinaamak nummah foyyah raqteeh, lac kee num addal akak maraaqinna. Takkay immay ahak sarra,

¹¹ sahda qililo elle abah aabbetton. Digibih sinam elle digirah abletton. Anu keenih abe maqaaneh candu gacsaana'gidih, yi Qibaadah-Qari sadgat baaha mara abletton. Sadgat baahan waqdi, yi Qibaadah-Qarih addal, ‹Ummatey, YALLAY Nabaamak Nabahiyya faylisa! YALLI maqaane le Dageltak, candu kaah gacisa! YALLIH kacni mayambaxak, tohul candu kaah gacisa› 'yaanam axcuk, candu yoh gacselon. Ken baaxo fanah ken gacissaay gaddaloola ken abba heemih candu yoh gacselon. Tahat yabtam yoo YALLA» 'yaanam iyye.

¹² YALLAY Nabaamak Nabahiyya kaadu qagseh iyyemii, «Ta baaxoy a saaku bacari tekkeeh, num kee lac elle deedaltam tableenihiyyal, ahak sarra lac elle yaloole qayso aabukele. Wadar kee illit duwah yan mari cayiseh ken orbisele.

¹³ Qaleela le rasul tan magaalooli kee, mango koomaami le baaxol tan magaalooli kee, Yuudâ-rasuk gabbi-qaxat raqta baaxol tan magaalooli kee, Benyam rasu kee Yarusalaam xaqul tan gaandoodi kee Yuudâ-magaaloolil, illit duwah yan mari edde yan illik yakkeh gide edde loowan wakti amaatele. Tahat yabtam yoo YALLA» 'yaanam iyye.

¹⁴ YALLI iyyemii, «Israayil kee Yuudâ marah, niqmatat ken xiiniseyyoomuh duma culeh an xagna duudusu waa ayroora amaatele.

¹⁵ Too waktil, Dawuduk rade marak cakki gita gexa numuy Dawud-Luddal muggaaqisaanahiyya ruubeyyo. Too num cakkih tanim abaah, qadaalatat taamita malikih heeyyo.

¹⁶ Too saaku Yuudâ-mari waddiimeleeh, Yarusalaam magaalal yan mari amaanah xiinele. Yarusalaam magaala migaaqah too saaku, ‹YALLAY Cakki neh Yekke› 'yaanam deqsitele.

¹⁷ Macaay inteenik, kulli way Dawuduk rade marak numuk teena Israayil marih malik abeyyoomuh xagana siinih cula. Tahat yabtam yoo YALLA.

¹⁸ Tonnah kaadu, kulli dabaanal Leewi-deqsitta-kedok numuk teena seekih heeyyo. Too sek yoh sadgat aban waqdi, cado akak carrisaana'gidih baahan lac kee, tonnah kaadu, yi migaaqal sadgatah baahan daro kee, wohuk kalah taniimiy sadgatah baahaanahiyyah taamat gacele; toh kay taama» 'yaanam iyye.

¹⁹ YALLIH qangara qagisak Ermiyaasal obte. Kaak iyyemii,

²⁰ «Bar kee laqo keenih eexege waktil akah yamaaten innah, qahdi ken lih heeh an. Too qahdiy bar kee laqoh heehiyya, baya qahdi hinna.

²¹ Too bis le qahdi Dawuduy yi naqasuh yanihiyya kee Leewih tooboke seeka lih heeh en. Toh kaadu macâ-qahdiiy inteenik, Dawuduk rade marak numuk teena malik abeyyo 'yaanamah qahdi culeeh, Leewih yooboke marak numuk teena sek abeyyo 'yaanamal qahdi culeh en. Ta qahdi baya qahdi hinna.

²² Dawuduy yi naqasuh yenehiyyah durruyyat aymaggeyyo. Leewî-kedok rade mara kaadu tonnah assakaxxeyyo. Mangah qaraanal tan cutuuka kee baddi afal tan qiddey loowo num akak duude waah innah, loowo num akak duude waa mara ken abeyyo» 'yaanam iyye.

²³ YALLIH qangara Ermiyaasal obte. Kaak iyyeemih,

²⁴ ‹Ermiyaasow, Israayil kee Yuudâ marak sinam intam maay toobbe? A namma maray anu innih doorehiyyak, ‹Yalli Israayil kee Yuudah ummatay duma dooreh sugehiyya a saaku cineh› 'yaanam iyyan. Wohut mayaadiyaanay, woh iyya mari isih ken burutaah, doolat caddot ken mayablan.

²⁵ Tonna'mmay yooy YALLAH yani bar kee laqo lih qahdi heeh; qaran kee baaxo angayye wayta'gidih xinto akah abe Dagelta kinniyo.

²⁶ Hununuh toh elle abba hee innal, Yaqkuubuk rade mara kee, inni naqasu Dawud lih hee qahdi, way bayi mahaa. Dawuduk rade marak num dooreyyooh; too num, Abraahim kee Iscaak kee Yaqkuubuk rade marih amol dardaariseyyo. Inni marah uxih racmateyyooh, ahak sarra gaddaleela ken abeyyo› 'yaanam iyye.