Ermiyaas 32 - NABUWWA KEE MALIKWA

ERMIYAAS BOOXA XAAME

¹ Xidkiya Yuudâ-malik edde yekke tabanhaytô-sanatat nan saaku, YALLI Ermiyaasal qangara oobise. Toh kaadu Malik Nabkadnessar Baabelon malik edde yekke taban kee bacarhaytô sanatak ten.

² Too saaku Baabelon-qaskar Yarusalaam magaala tabbixe'gidih, marot tet hayteh teneeh; Ermiyaas kaadu too saaku malik qarih daaratal axawat abbaxuk yenen.

³ Kaa casbissem, Malik-Xidkiyak teneeh; kaa akah casbisem, YALLI iyyem warseemih sabbata. Ermiyaas Xidkiyak iyyemii, «YALLI, ‹Ama magaala Baabelon malik abbixele› 'yaanam iyyeh yaniih,

⁴ ‹Too saaku koo kaadu too malikih gabal heeyyooh tassillimem faxxaamah koh mabicta› kok iyye. ‹Baabelon maliki lih fooca kee foocah yaabettooh, isi namma intih kaa abletto.

⁵ Sarra Baabelon fanah seewah koo beelon. Anu tuk teena kok abam fanah wokkel elle sugetto. Baabelon-marat qeebi abtaanam faxxaanamah siinil mabictaay, nasri kaadu mageytan. Tahat yabtam yoo YALLA› 'yaanam kok iyye» 'yaanam kaak iyyeemih sabbatah, kaa yoxeeh yen.

⁶ Ermiyaas kaadu qagseh iyyeemih, «YALLIH qangara yol obteeh; yok iyyemii,

⁷ Canamiiliy, ku qammi-Sallum-baxi, kol amaateleeh, ‹Benyam rasuk Qanatot deqsita aracal tan booxa yok xaamit. Gersi maral xaamaamak, kooy yi qammih baxah yanihiyyal xaameyyooh; yi baaxo xaamittam ku cakki kinnuk, yok xaamittaama› kok axcele 'yaanam yok iyye.

⁸ Sarrak YALLI akah inxicca iyye'nnah, Sallúm-Canamiil casbit elle an malik qarih daarat yol yemeeteeh, ‹Yi qammih baxaw, Qanatot deqsita aracal liyo buqrê-baaxo xaamam faxak, atu yok xaamit. Cakkih kol tanik› yok iyye. Too waqdi tah YALLIH yab kinnim eexegeeh,

⁹ baaxo kaak xaameh. Garaasak akah xaameh gide miizaanal keexxa heeh, kaah ecee. Too garaasa taban kee malcina garsi tekke.

¹⁰ Sarrak limok titta elle geynem kee akah xaameh gide elle tan warkatal firma hee. Ta limo tekke waqdi ni fanal sumaaqah suge marih migaq kaadu warkatal nuktube. Sarrak ken foocal garaasa bahha heeh miizaanal lowwa heeh kaah ecee.

¹¹ Limô-qaada elle tunkuttube namma warkat gabat luk raaqe. Ta namma warkatal tenem, baaxo elle xaame inna kee titta elle geyne yab elle yen. A namma warkatak warkatak teena xambabbaqqa heeh alfe. Aki warkatah tu gactek alfe'kal cabe.

¹² Too namma warkat inkih gabat hayya heeh, Macsiyâ-Neeriyyâ-Baaruk deqsita numul ecee. Kaal ecee waqdi Canamiil kee limo garil akak abne sumaq maray limo elle abne inna yubleeh tohul firmat hee kee, malik qarih daarat addal yen maray taham tekke waqdi yublehiyya elle yen.

¹³ «Too marih foocal kaak excemii,

¹⁴ ‹YALLAY Nabaamak Nabah, Israayil doore Dagelta kinnihiyya kok iyyaamahaa: Ta namma warkat beyya hayteh buuti addat daanis. Warkatak teena alifit taniih, nammeyhaytô warkat fakimit tan. Tonna'mmay beyya hayteh, akah baye wayta'nna, baxi-baxih daban fan akah sugta'nnah, buuti addat daanis, kok iyyeh yanik, daanisetto› 'yaanam sinam foocal kaak exce.

¹⁵ YALLAY Nabaamak Nabah, Israayil doore Dagelta kinnihiyyaa, ‹Buxaaxi kee buqre-baaxo kee qinab xala coox elle yaabuke baaxo, wadir edde limmoysoonu waan wakti amaatele› 'yaanam iyyeh yan, kaak exce.

¹⁶ Too namma warkatay baaxo elle xaame inni elle yanihiyya kaal ecee. Sarra dooqa abe.

¹⁷ «Dooqah excemii, ‹YALLAW, Mulki le Dageltaw, qaran kee baaxo isi nabna kee qandet xisse. Yaffarem le Dagelta hinnito.

¹⁸ Qadad sinni marah amurruqe sinni kacanu yaybulle Dagelta kinnitooh; kaadu xaleena bahte qellatah xaylo digaala Dagelta kinnito. Qande kee cayla le Dagelta kinnitooh; ku migaq YALLAY Nabaamak Nabahiyya.

¹⁹ Abtam cubbil aba Dagelta kinnito. Atu abtam nabaamak naba. Sinam abba haytam inkih yable Dagelta kinnitooh, kulli marah le taamah innal mekelta.

²⁰ Dumî dabaanal ablewaynuh taniimiy qagabak tanihiyya Masri baaxol abe Dagelta kinnitooh, uxih woo qajaaqibih tanim, Israayil kee wohuk kalah yan marih foocal abtem koo. Ta saaku tohuk gexxaamah, Yallaw, koo igma mari mayan.

²¹ Israayilih yooboke ku mara Masri rasuk teyyeeqe saaku, nek naqbotiitih yen mari akak wariggiteh raaqe ablewaynu abte. Too ablewaynu edde abtem, isi qande kee cayla.

²² Duma ni kaxxa abbobtih qahdi culteh sugteeh, too qahdil niqmatak tan baaxoy buqre kee lacah meqehiyya keenih tecee.

²³ Takkay immay a baaxo guffu heenih teetil dabaaqah gaceenik wadir, ku yab kassitak maraaqinnon. Atu keenik aba intem kee keenik akah xiina inte xinto cineenih. Aba inteh ken akah amrisseemik tu aboonu cineenih. Tonna leemiik a bala keenil oobisse.

²⁴ « ‹Baabelon-mari Yarusalaam-magaala yabbixe'gidih, tet gasoosat xakabuh coox kee xeet tittin bagul heen. Addal teetik yan mari carbi kee qulul kee dalkâ-gadda yekkeeniih, tohuk gexxaamah ellecabol Baabelon malikil gaba ecee'kal maraaqan. Tah atu inteemiiy; away akah table'nnah, atu inxicca elle inte'nnal tekkeh.

²⁵ Tonna'mmay YALLAW, Mulki le Dageltaw, Yarusalaam tanna le mabbuuxut tanim abalih, «Sahda sumaaqah hayya haay baqurê-baaxo ku qammih baxak xaamit» yok inteeh; toh abeh› 'yaanam exce» iyye.

²⁶ Tohuk lakal YALLIH qangara Ermiyaasal obteeh kaak iyyemii,

²⁷ «Anu YALLA kinniyooh, ginna hee marak inkih Dagelta kinniyo. Anu affarem matanaay, yoh akke wayya haytam matan.

²⁸ Tonna leemiik, a magaala, Malik-Nabkadnessar kee kay qaskarih gabal heeyyo. Too mari qeebit tet abbixeleeh,

²⁹ gira teetit ruubelon. Yarusalaam magaalal yan mari Baqal akak iyyaanam aqbuduk sugen. Tohumuy yaqbudeenihiyyah qibaadah, isinni qarwah amol qaydarus qeerisak sugen. Yallah lon duyyeeyah kaadu qibaada abak sugeeniih, too qibaadah sadgatah qinabak bicsen kamri bahha heenih faaroh caxak sugen. Tohum yot naqabu culusse. Tohuk gexxaamah Baabelon-malik kee kay qaskar too qarwa akah cararissa'nnah abeyyo.

³⁰ Israayil kee Yuudâ-marih abto, yoo ruffu hayte saaku mali. Ken taama fiiruk geerah bagi-cararow yol tekkeh tan. Tahat yabtam yoo YALLA.

³¹ Yarusalaam mari a magaala xissimma 'teemiiy akke fan, naqabu kee bagcarra yot qidak sugen. Tohih sabbatah a magaala baysaamat emeete.

³² Tohut akah emeetem, Israayil kee Yuudâ maraay, ken malikwa kee keenik saqoltih yan maraay, ken seeka kee oson nabuwwah lon mara kee, Yarusalaam magaalah mari abah yan umaane.

³³ Anu kulli way meqem aba keenik axcuk suge'mmay, tohuh darre yot cabak sugen. Yi yab yaabboonu cineeniih, adabih gacoonu cineenih.

³⁴ Yoo elle yaqbuden qarih addal, umâ-yabulih tan duyyey Yallih innah yaqbudeenihiyya heeniih, yi Qibaadah-Qari nadaasa aben.

³⁵ Baqal akak iyyan gabak bicsen duyyey yaqbudeenihiyyah, Hinnom-Golo deqsita aracal, sadgat elle aban arac xiseeniih; tokkel migaaqah Molok yalla akah iyyan duyyey yaqbudeenihiyyah sadgatah isinni xaylo yusguuden. Annah tanim anu keenik aba excem hinna. Annah tanim yi kasal way temeetem hinna. Yuudâ-mari annah taniimiy umâ-yabulih tanihiyyay dambi keenil takkehiyyat aseloonum makkalinniyo» 'yaanam iyye.

³⁶ YALLAY Israayil doore Dagelta kinnihiyya qagseh iyyemii, «Ermiyaasow, atu away intaamah, ‹Yarusalaam mari carbi kee qulul kee dalka qayyaawissa ken hayta waqdi, Baabelon malikil gaba isinnih aceelon› 'yaanam inte. Toh kinnih immay toh lih axcem liyo.

³⁷ Duma abeh an bagcarrah ken fixixiseyyooh, baaxo ken cabsiiseyyo'mmay, wadir gaabossa ken heeh, a baaxo ken gacseyyo. Akke gacissa ken heeh, tohuk wadir amaanah ken xiiniseyyo.

³⁸ Tohuk lakal oson yi mara akkeloonuuh; anu kaadu ken Dagelta akkeyyo.

³⁹ Inkih, inkim edde aboonu waan kas keenit heeyyo. Toh macaay intek, isinni kee isinni xayloh taagah, kulli way dibuk yoo edde yaqbudoonu waan afqado keenit heeyyo.

⁴⁰ Hawwensime waa qahdi ken kee inni fanal heeyyo. Maqaane keenik mayseediya. Yok meysita mara ken abeyyooh, tohuk wadir darre yot macaban.

⁴¹ Keenih aba maqaane ruffu yoo heele. A rasuk way akah aarre waan innah, nagay yan daabisiyya keenit abeyyo. Tahamaay, keenih liyoh an xuwaawah abu waama.

⁴² A bala keenil oobiseyyo akah exce'nnal, keenil oobiseh. Tonnah kaadu, keenih abeyyo exce maqaane inkih, keenih duuduseyyo.

⁴³ Isin inkih, ‹A baaxo gaba kalteeh; Baabelon-malikih gabat raddek wadir, num sinniih lac sinni abur akkele› 'yaanam intaana'mmay, ahak sarra sinam baqurê-baaxo teetil xaamele.

⁴⁴ Ahak sarra tama baaxol sinam baqurê-baaxo limmoyseleeh; limo elle abbaasiten inni, sarra sumaq keenih yakke'gidih, waraakitil aktubelon. Too limo elle tekke inna kaadu sinam foocal abbaasitelon. Taham elle takku waytam, Benyam rasu kee Yarusalaam dariifal tan gaandoodi kee Yuudâ-rasul tan magaalooli kee, kaxxa qaleela kee mango koomaami le baaxol geytinta magaaloolih addal akkele. Yuudâ-rasuk gabbi-qaxat raqta magaaloolil kaadu toh akkele. Ahak sarra ken baaxoh ken gacseyyo. Tahat yabtam yoo YALLA» 'yaanam iyye.