Ermiyaas 31 - NABUWWA KEE MALIKWA

¹ YALLI iyyemii, «Too dabaanal Israayilik radde kedooda yi mara akkeloonuuh, anu amo keenik wagta Dagelta keenih akkeyyo. Tah intam yoo YALLA» 'yaanam iyye.

SEEWAH BEEN MARI ISI BAAXO FAN GACELE

² YALLI iyyemii, «Rabak yisillime marah bacarih tan baaxol racmateh; Israayil mari yaffoofem faxe saaku, allak keenih umbulle.

³ Israayil ummatey, anu kulli way sin kiciyyo. Tonna leemiik liyo diggay way kore waytat sin dacrisa.

⁴ Kiciyyo Israayil maraw, ahak sarra sin xiseyyo; ahak sarra karambo xabqet hayya hayteenih farcatah digiretton.

⁵ Ahak sarra Samaariyah qaleelal qinab coox aysubukettoonuuh; too coox yuysubuke mari too cooxih xaylo akmele.

⁶ Qibaadâ-Qari dacrisa mari Efrayim qaleelah amook deero abeleeh, ‹Annah nel amey; YALLAY ni Dageltah yani naqbude'gidih, Siyon qale fan nee beya› 'yaanam axcuk, sinaamah deero edde aboonu waan wakti amaatele» 'yaanam iyye.

⁷ YALLI kaadu iyyemii, «Israayiliy doolatwak inkih nabahiyyah qililisa. Qililisak abtan saare fayya haak aba. Anay fayya haak, ‹YALLAW, isi ummatta wad. Israayil ummatak raqte saabo cat› axcuk kaa faylisa.

⁸ Kilbat le kabuk ken baaheyyo; baaxô-maggaraqak ken gaaboyseyyo. Inti-maleela kee iba-maleelaay, xalay edde xayyoowe agabu kee xalaayal lacawat yan agbih agantah amaatelon. Manguk andabbelon.

⁹ Namma intik ximo keenik amaatuk aduurelon. Anu ken miraacisa way dooqa abak amaatelon. Gitah darah gexxa leek xaqut-xaqut ken beeyyo. Saytun gitay adaf sinnihiyyat ken beeyyo. Toh keenih akah abu waam, Israayil marak abba kinniyooh; Efrayim yol naharsi-baxih gide» 'yaanam iyye.

¹⁰ Baaxoh ummatey, YALLI siinik iyyam ankacisa. Usuk iyyam badak afal yan xer baaxoh marah warisa. Isi mara fixixih elle yabbixe baaxok gaaboysele. Illit duwah yan num duwah edde yan illi elle duwa'nnal, ken duweleeh ken dacrisele.

¹¹ YALLI, Israayil-mari away edde yan xixxibaanek ayyaaqele. Caylaleelâ-gabak ken ayyaaqele.

¹² Siyon qaleh amol farcatah qililisak saare abelon. YALLI keenih yacayu waa niqmat assakootelon. Baaxo keenik darooy, qinabak bicsen kamriiy, *daytuun zeytiiy (saliidiiy), illi kee laak amaggele. Too barkat keenit heeleeh; tohum assakootelon. Leek nagay yefqen bustaanih ceelot gacelon. Tahak wadir cisabbootiyyi keenik gaba kalele.

¹³ Baxuw saxxaqah digreleeh wallitele. Furrayna kee idoolah agantah africelon. YALLI iyyemii, «Anu ruffu ken heeyyooh, edde sugen rooka farcatah keenik gacissa heeyyooh; edde sugen cisab kee gadaamak farcat kee assamaq geelon.

¹⁴ Seeka kaxxa cayih cayiseyyo. Yi mari yi niqmatak cayyele. Tahat yabtam yoo YALLA kinni» 'yaanam iyye.

¹⁵ YALLI kaadu qagseh iyyemii, «Raamâ-rasuk anay yol rada; kaxxa weeqa akkih aabbe. Raacel isi xayloh weqtah tan; xaylo teetik tembexeh. Tibba 'xic teetik iyyaanamah, weeqa cabtu cinteh.

¹⁶ Raaceley, ahaysa maweeqinay ximo isik dug. Atu isi xayloh abteemih galto gee'kal maraqtak ximo isik dug. Away elle yanin naqboytiitih keenik yan marih baaxok awqelon.

¹⁷ Ellecabo kok meqeh, Raaceley, xaylo kok isi baaxo fanah aduurele. Tahat yabtam yoo YALLA.

¹⁸ «Israayil maray nadaamitahiyyah anay yol rada. ‹YALLAW, dubaalinneh sugne'mmay, ku amri oggolaanam nee barisseh. YALLAW, ni Dagelta kook, elle sugne'kke fan nee gacis; kol naduuruh bical nan› 'yaanam axcih ken aabbe.

¹⁹ ‹Darre kot cabneh sugne'mmay, away kol nuduure. Nee digaaltek wadir, abne umaanek gexxaamah nadaamah amo qunuunut nabbixeeh, wacarriyih rabneh nan. A saaku wacarriy nel takkem, qunxuk sugne saaku abne dambi› 'yaanam axcih ken aabbe» iyye.

²⁰ «Israayil ummatey, kulli marak kacanuh akah lafta xayloh yok tanin. Sin gide kacanuh numuh massalliyyo. Isin abtan umaanet yaabah immay, tohuh, sin kasa waqdi siinih xuwaawah. Afqado sin fanah liyooh siinih racmateyyo. Tah intam yoo YALLA.

²¹ Akak gexxen gital asta haay caba. Woo gita cubbusay raaqa. Taduuren saaku, too astal, akak temeeten gita kassa heetton. Israayil maray kiciyyohiyyaw, isinni magaalooliy cabteenihiyyah uduura.

²² Imaan-maleelay, ahaysa namma kalbi caba. Dumah akke waytem bicsam faxa. Toh macaay inteenik, barra labhaytu dacrissu wayta wakti baaheyyo» 'yaanam iyye.

²³ Kaadu YALLAY Nabaamak Nabah, Israayil doore Dagelta kinnihiyya yok iyyeemih: «A mara seewah elle abbaxuk sugen baaxok gacisu waa saaku, Yuudâ-rasu kee Yuudâ-magaaloolil yan mari ah ablele. Too waqdi, ‹Siyon-qaley taahirik tanit YALLI barkat haay. Cakkik-tan-maqaane le Dagelta elle yan aracat YALLI barkat haay› 'yaanam dooqah axcelon.

²⁴ Ahak wadir ummat Yuudâ-rasu kee tet addal tan magaaloolil inkih dabaaqah titta lih gacele. Buqre-aba mara kee illit duwah yan mari titta lih dabaaqah gacele.

²⁵ Qamal-malit qande heeyyooh, qulul le num cayiseyyo» 'yaanam yok iyye.

²⁶ Tohuuk endeceecedeeh, dariifa innik wagga hee waqdi, xagar yok ruffa iyye.

²⁷ YALLI iyyeemih, «Yuuda kee Israayil baaxol ummat kee lac edde aymaggu waa ayroora amaatele.

²⁸ Duma ragidik ken siibak sugeeh, ragidik ken aggaluk suge. Deerik afah ken edde korisak ken bayisak suge. Duma umaane keenit edde aba uddur wagitak suge'mmay, ahak wadir edde ken xisaah daabisa uddur keenih wagteyyo.

²⁹ Too ayrok wadir sinam, ‹Qeero le qinabih xaylo tokmem xaleena'mmay, qeero akak tammossem xaylo›, 'yaanam missilah axcuk maraqta.

³⁰ Tahak wadir qeero lem yunxuqe numut qeero baahele. Kulli num isih abe umaaneh antixibbixele» 'yaanam iyye.

³¹ «YALLI kaadu iyyeemih, «Israayil mara kee Yuudâ-mara lih qusba qahdi edde hayu waa ayroora amaatele.

³² Too saaku ken lih hayu waa qahdi, anu gaba keenik xabba heeh, Masrik ken eyyeeqe saaku, ken abbobti luk abe qahdi innah yan qahdi mayakka. Too saaku baqli barrah elle yamqeeh amo teetik elle wagta gurral, anu kaadu ta marah muqukuuy amo keenik wagitak suge'mmay, tohuh ken lih abe qahdi yol makeenih.

³³ Tamaatu wayta ayroorat Israayil mara lih haysitu waa qahdi ah kaana. Inni xinto bagut keenik haak, afqadol keenik aktubeyyo. Anu ken Dageltah aniyooh, oson kaadu yi mara akkelon.

³⁴ Too saakuk wadir, qunxa numuuy kaxxa num, nagay yoo aaxigeleeh; tonna leemiik, faxe num isil xayi num akkiiy isi baaxoh numuk, ‹YALLA nagay ixig› akah iyyam maraqta. Duma aben dambi keenih cabeyyooh; baahen qellatak qafu keenih axceyyo. Qahdih keenih culam tohu. Tahamat yabtam yoo YALLA» iyye.

³⁵ Ayro laqo ifissa'gidiiy alsa kee cutuuka bar ifissa'gidih haytem YALLA. Bad sabo baaha'gidih tasgayyem kaa. Kay migaq YALLAY Nabaamak Nabahiyya.

³⁶ YALLI, «A addunya tanim fanah Israayil mari yi garil doolatah anele. Yi intit doolatah anele» iyye.

³⁷ Qagseh iyyeemih, «Qaran yamittiroonu duudaanaa? Maduudan. Baaxo edde taade buxux goranal maay geyan? Mageyan. Hay tonnal, Israayil mari faxem abaamah, ken cineyyo 'yaanam too gideey; takkem hinna. Tahat yabtam yoo YALLA» 'yaanam iyye.

³⁸ YALLI qagseh iyyeemih, «Yarusalaam magaala yi migaaqal edde xissintu wayta ayroora amaatele. Sahda akak yabloonuh xisen Cananal-Qariy amo-xeerik xabba haanamaay, Rukni-Afah deqsita aracah amma 'yaanam edde xisoonu waan wakti amaatele.

³⁹ Tokkeek Gareeb deqsitta qale fanah xisak amaatelon. Tokkeek kaadu Goqa fanah xiselon.

⁴⁰ Away baruuga kee guddaafa edde qidan golo kee, Kidroon buyyik daga le kabu raqta booxak xabba haanamaay, Faaris-Afa deqsita aracak ayrô-mawqa le qaxat raqqa 'ta baaxo inkih, yoh caben baaxoy taahirik tani akkele. Too magaala tahak wadir mataddigilaay mabaata» 'yaanam iyye.