Ermiyaas 3 - NABUWWA KEE MALIKWA

ISRAAYIL MARI DALWEENIT YEKKE

¹ YALLI siinik iyyamaa, «Num gennaaqoytay cabehiyyay marin mari elle digibehiyyal wadir elle digbam maay duuda? Toh bictam hinnaay, elle tekke baaxo kinni way nadaasa takke. Isin tonnah kaadu mango kacnoytit haysitteenik sarra, away yol taduureenim faxxan!

² Qaleelah amo wagga haytan waqdi ta qaleelah amok isin xiiqareh-xiinah innah uma-taama elle abe waytan arac maay yan? Mayan. Qarabtoyti bacarih tan baaxol duyye bukkusa'gidih, safarat yan marih mamaata elle assexeeruk suga innal, isin kaadu dalwah abittoh assexeeruk sugtan. Uma-taamat baaxo nadaasa abten.

³ Tohuk gexxaamah dabaybah rob baaxol radu cineh. Sugum kaadu maradinnay baaxo kafteh. Caalat siinik xiiqareh-xiinah caalatih bis le'mmay tohuh edde mawacarriytan.

⁴ A saaku hay, ‹Yallaw, ni abba kooy; akkeey qunxaane nee kicintoh› 'yaanam yok intan.

⁵ ‹Yalli kulli saaku net mabagcarrita. Ahaysa nee mayanqiba› intan. Afak toh intaana'mmay, tohuh, aaminnaan taamah abittok maraaqinniton» 'yaanam siinik iyya.

TOOBITTAANAM MEQE

⁶ Ermiyaas kaadu qagteh keenik iyyeemih, «Yoosiyaahu malikih yen saaku YALLI yok iyyemii, ‹Imaan maleelah yan Israayil mari abem tublem hinna? Yoo cabba heenih, qaleeli amo kee silal le cooxih gubal, xiiqareh-xiina abe wayta uma taama aben.

^7-8 Too uma-taamak lakal, yol aduureloonum akkaluk suge'mmay, yol maaduurinnon. Yuudâ-mari, anu Israayil mara xiiriyeeh; innik ken eyxeerem yubleenih. Ken akah eyxeerem, ken uma-taama kinnim yubleenih. Takkay immay keenik maysinnoonuuy, keenik kaxxih, uma-taama-leela yekken.

⁹ Too uma-taamay abaanahiyyat mawacarriyinnon. Xeet kee coox qibaadat gaceeniih baaxo caraamu aben.

¹⁰ Toh abak suggu 'yeenik lakal, Yuudâ-mari yol yaduurem ceele'mmay, woh nummâ-madaarak masuginna. Tah intam yoo YALLA› 'yaanam siinik iyye» keenik iyye.

¹¹ «Tohuk lakal YALLI yok iyyemii, ‹Imaan maleelah tan Israayil ummatta yok texxeereh immay, yoo gane Yuudah marak yayseenih› 'yaanam yok iyye.

¹² «Tohuk kalah yok iyyemii, ‹Gexay Israayil-mari yaabbeeni'gidih, kilbat fanah deero ab. Intaamah: YALLI iyyaamah, Imaan maleelah tan Israayil xayloy! Amay yol uduura. Racmatta le Dagelta kinniyooh, sin assacakke way siinil aduureyyok, yol uduura. Tah intam yoo YALLA.

¹³ Qellat lem bahteenim isinnik ixigaay, yooy YALLA kinnih sin Dageltah yanihiyyak amri cinteenim isinnik ixiga. Yi amri cinna hayteenih, silal allinnaan caxah gubal yi aftok duyye taqbuden. Toh qellat kinnim isinnik taaxigeenimi. Tahat yabtam yoo YALLA, keenik inxic› 'yaanam yok iyye» iyye.

¹⁴ Qagissa heeh iyyamaa, «Imaan maleelay! Yi mara kinnitoonuk, yol uduura. Sin Dagelti yoo. Kulli magaalak num-num siinik beeyyooh, kulli gulubuk kaadu namma-namma num siinik doorru heeh, sarrak Siyon qale fan sin beeyyo.

¹⁵ Tokkel yi yab yaabbu waa mara abbobtih siinik heeyyo. Abbobtih siinik hayu waam, qakli le maraay; too mari kasat sin xiinisele.

¹⁶ Tokkel waqlak wadir mangah amagguk elle tamaggeenimil, ummatta yi qahdih sandugut mayabta. Tohuk wadir tet kassitak maraaqaanaay, maqal edde luk maraaqan. Keenih xiqtam mali; wohoysa qagisak tet innah tan sandug mabicsan.

¹⁷ Too saaku Yarusalaam magaalak bagulleytah, YALLIH mulkiinoh korsi, 'yaanam axcelon. Kulli baaxoh mari too saaku yoo yaqbude'gidih amaatele. Tohuk wadir ken afqadoy yabti cina kee umaane lehiyya aba keenik intaamih abittot magacan.

¹⁸ Too saaku Yuudah-ummatta Israayil-xaylot angaleleeh, sarrak marin baaxoy kilbat le kabul tanihiyyak aduureloonuuh; ken kaxxa abbobtih kulli waqdi ikoytah eceeh en rasu fan gacelon.

FAXXIMTAM, YALLA FAN TADUUREENIMI

¹⁹ «Israayil-maraw, anu inni bagul, baxi gurrah sin loowitam faxak suge. Addunyal inkih qaxah tayse baaxoy ruffa sin haytahiyya siinih aceem faxak suge. Abbâ-gurrah yoo loowittaanam siinik faxe. Yot darre cabe waytaanam siinik faxe.

²⁰ Takkay immay baqalal makte barrah innah dibuk yol maadinnitoonuy, yok kalah tanim taqbudeenim bahten. Tahat yabtam yoo YALLA kinni» iyye.

²¹ Ermiyaas iyyemii, «Allak qaleh amok xongolo yol radda. Too xongolo akak raddam, Israayil maray isi Dagelta hawweeneeh, dambi le taamat asehiyyak ten. Too mari aba weeqa kee, kallacih aban xongolo yol radda» iyye.

²² YALLI, «Imaan maleelah yan maraw, anu sin urseyyooh, imaan siinit heeyyok, yol uduura» siinik iyya. Ermiyaas iyyemii, «Ummat axcih oobbem liyo. ‹YALLAW, ni Dagelta koo. Nanu koo fan naduureh.

²³ Diini maleela lih gacca inneh qaleelah amol naqbude duyye neh xiqtam mali. Nee waddam, dibuk YALLAY ni Dageltah yani.

²⁴ Duyyey naqbudehiyya qaybik sah neh xiqtam mali. Too qibaaday abnehiyyah sabbatah, ni kaxxa abbobti nagrah neh cabte midir nek yembexeh. Ninni xaylo wayneh. Ni kaxxa abbobti dumî-dabaanaak akah taqabba 'tem inkih wayneh.

²⁵ Nee kee ni kaxxa abbobti, YALLAY ni Dageltah yanihiyyah amri dumaak cinak sugne. Qunxaanek xabba haanamaay a saakuh amma 'yaanam, YALLAY ni Dageltah yanihiyyal dambi lem bahne. Abne qaybi nee yabbaxay; edde asne qaybi, sartan gurrah, xagar nek buulay› 'yaanam axcih oobbe» iyye.