Ermiyaas 29 - NABUWWA KEE MALIKWA

ERMIYAAS YUKTUBE WARKATA

¹ Sarrak Ermiyaas, seeka kee nabuwwaay ummatak saqoltih yan mara kee, raqqa 'ye maray Yarusalaamaak Baabelon-rasu fan seewah orbiseenihiyyah warkat yuktubeh ruube.

² Ta warkat yuktubeh ruubem, malik Yahoyaasin kee kay inaay kay gubal taamitak suge doolatak saqoltih yan maraay, Yuudâ-rasu kee Yarusalaam magaalal saqoltih suge maraay, gabâ-naggarinna luk yen mara kee, wohuk kalah tan taamah ixxiga luk yen mara inkih seewah Baabelon rasu beenik sarrak ten.

³ A warkat uktubba heeh elle yeceem, Safán-Elqasa kee Cilkiyyâ-Gamarya deqsita marih nammayay Malik-Xidkiya Baabelon-malik fan farmo elle ruubak sugehiyyak ten. Yuktube warkatal teneemih,

⁴ «YALLAY Nabaamak Nabah, Israayil doore Dagelta kinnihiyya, Malik-Nabkadnessar gabat Yarusalaam-magaalak Baabelon fan seewah ruube maraw, siinik iyyaamah,

⁵ ‹Qarwa xissita; dabaaqah elle gaca. Too qarwak darret bustaan coox uysubukaay, too coox siinih xala xaylo maaqoh akuma.

⁶ Digibaay xaylo xala. Tandarreeni'gidiiy samad siinik yamagge'gidih, isinni xaylo rihmisa. Enderraay madaggoowina.

⁷ Anu sin ruube baaxoy seewah sin elle beenihiyyal meqe taamah taamita. Keenit barkat haa'gidih yoo kallacaay, dooqa keenih aba. Macaay inteenik, oson yessemeeqeenik, isin kaadu assamaaqetton› siinik iyya.

⁸ Toh lih kaadu siinik iyyaamah, ‹Yoo YALLAY Nabaamak Nabah, Israayil doore Dagelta kinnihiyya aylahu siinih akak kalam liyo. Toh macaay inteenik, ama nabuwwa-kinnino-iyya-mara kee, sarra takku waytam nanu naaxige iyya maray sin addal yanih yab maabbina. Ken yaabal maylahitina. Ama isin ken essertan soonoy oson nubleh iyyaanah hangi maacina.

⁹ YALLI nek iyyeemi axcuk, anu keenik axce weem diraabah siinik iyyan. Anu ken maruubinniyo. Tahat yabtam yoo YALLA.

¹⁰ « ‹Tonna'mmay Baabelon doolatah looweh an malcina-tabanih sanat guffa haa saaku, siinih looweh an maqaane siinih abeyyo. Toh macaay inteenik, siinik akah exce innah, inni qahdiy siinih cule duuduseyyooh, sin baaxo sin gacseyyo.

¹¹ Siinih looweh an maqaaneh adda taaxigem yooy; siinih looweh abbixem, siinih meqe niqmata'kkal, sin biyakta umaane hinna. Takkay immay amaan akak geettoonuuh, isin geenno axcuk qambaalitak sugten maqaane akak geetton.

¹² Yoo kallacettoonuuh dooqa abetton. Anu kaadu sin dooqa kee kallaci raabiteyyo.

^13-14 Baguuk yoo gorrissoonu waytan waqdi yoo geetton. YALLAW, axcuk gaba deerih yoo fan heetton. Too kallacil siinih amaateyyooh, sin baaxo fanah sin gacseyyo. Fixixih elle enna intan baaxo kee aroocay anu sin elle fixixisehiyyak, sin baaxo fanah sin gacseyyo. Tahat yabtam yoo YALLA› 'yaanam siinik iyya.

¹⁵ «Tonnah kaadu siinik iyyaamah, ‹YALLI, elle genxe baaxol nabuwway kay farmo bahtu wayta, neh ruube 'yaanam intaanam takkeh immay siinik axceemih, tamah anu ruube mara hinnaay; siinil yaceenim diraaba.

¹⁶ « ‹Dawuduk raaqe dardaarinnal a saaku malikih yan num kee, a magaalah addal yan sin maray seewah bee weeniih akkel elle raqtehiyyah tiyat sin lih yaabu waa.

¹⁷ Too marih tiyak yoo YALLAY Nabaamak Nabahiyya axcemii, Anu qeebi kee qulul kee dalka keenit ruubeyyo. Toome *sublâ-xayloy ankamme wayta ken abeyyo.

¹⁸ Carbi kee qulul kee dalkat qayyaawissa ken heeyyo. Kulli doolatay keenit tekkem tabalu waytahiyya inkih, taham waagissa heele. Fixixih ken elle abbixe baaxoy innih ken ruubehiyyal, taham akkih yable mari kaxxa wariggah wariggitele. Bursutan maray ilaq le ken abeyyo. Woo-marat tekkem siinit takkay axcuk, sinam abaaroh haysitan mara ken abeyyo.

^19-20 Taham keenil akah baahu waam macaay inteenik, yakkeenimik, inni farmot abbixe inni nabuwwal, kulli way keenih ruubak suge farmo cinak sugeeniih, aba keenik axcem duudusak masuginnon. Taway, isin Baabelon rasuy seewah sin elle heenihiyyal yan marak, isin kaadu anu siinik axcem ankacissaanama. Tahat yabtam yoo YALLA› siinik iyya.

²¹ «Tonna'mmay YALLAY Nabaamak Nabah, Israayil doore Dagelta kinnihiyya, Kolaayah-Acab kee Maqseyaahû-Xidkiya deqsitta namma numih tiyak iyyaamah, ‹Oson siinil yaceenim diraabaay; YALLI nek iyye axcuk diraabat sin lih yaaban. A namma num, Malik-Nabkadnessar gabal ken heeyyo. Too malik siinik foocal xabba ken heeh ken qidele.

²² Sarra yan saaku Baabelon rasul yan maray seewah beenihiyya titta abaara waqdi, Acab kee Xidkiyay Baabelon-malik nuwwih girat qidsiisehiyyat tekkem kot takkay, 'yaanam abaaroh tittak axcelon.

²³ Ellecabol keenit takku waytam tamahaay; tamah keenit akah takku waytam, oson edde asan kaxxa dambih sabbata. Cuggaaneh keenik yan marih agabu dalwisan. YALLI nek iyye axcuk, YALLI keenik axce weem diraabah sinaamal yaceen. Taham YALLI isih keenik yuble qaadaay isih keenil akah sumaaqita. Taham intam YALLA›» axcuk, warkatal kutbeh heeh ruube.

YALLI, SAMAQYA RUUBE WARKATAL GACSEEMI

^24-25 YALLAY Nabaamak Nabah, Israayil doore Dagelta kinnihiyya, Samaqya isi migaaqal yuktube warkatih tiyak abu waamih qangara yoh warse. Usuk ta warkat akah yuktubem, Yarusalaamal dabaaqah yan mara kee, Maqseyaahu baxa Xafanyay seekih yenehiyya kee wohuk kalah tan seekah inkih yuktubeh yen. Too warkatal Samaqya, sek Xafanyah yuktubemii:

²⁶ «Xafanyaw, YALLI Yoyadaq aftok, isi-Qibaadah-Qarih addal seekak abba koo abe. Tonnah yan numuh elle tani'kkel tibba intam koo maceltaay; cabuliy nabi kinniyo iyyahiyyak iba kee gaba namma-caxxih fanat uxuyya heenih, fillat kaadu birti silsilat kaak yaxeenim kol tan.

²⁷ Hay, tonnah tanim, Anaatot magaalal yooboke Ermiyaasay ummat foocal nabi is celsiisak yaabak sugehiyyak, macah abe wayteeh?

²⁸ Usuk neey Baabeloonul yanihiyyah ruube warkatal, ‹Ama'kkel xer sanat sugettoonu'mmay, dabaq haysitaay nooka. Qarwâ-darret bustaan uysubukaay, too coox xalinnaan xaylo maaqoh haysita›, 'yaanam neh yuktubeh ruube», 'yaanam sek Xafanyah yuktubeh yen.

²⁹ Sarra Xafanya too warkatal tanim yoh yikriyeh.

³⁰ Tohuk lakal YALLIH qangara yol obte. Yok iyyeemih,

³¹ «Baabelon fan seewah beyya heen marak intamaa, YALLI siinik iyyamaa, ‹Nacelaamal yooboke Samaqya dirab siinil yaceeh, anu kaa maruubinniyo'mmay, anu kaak axce weem, anu excem siinit celsiisa. Dirab numma siinit celsiiseeh; kay yab teemeneenih.

³² Tonna'mmay Samaqya kee kaak radda 'ye marat raq sinni digaala abeyyo. Tahaysa kaa kee kaak rade mara matablan. Anu inni marah abu waa maqaanet magarayan. Yi yab cina mara sin abe'mmay, tohih sabbatah tamah kaal baahu waama. Tahat yabtam yoo YALLA› keenik inxic» yok iyye.