Ermiyaas 28 - NABUWWA KEE MALIKWA

ERMIYAAS KEE CANANIYA TONGOOROWE

¹ Taham edde tekke sanatak konoyhaytoh alsay Xidkiya malik yekkeemih fereyhaytô-sanatah yamaatehiyyat, Qaddúr-Cananiya deqsita nabi YALLIH qibaadah qari yemeete. Too nabi dabqah elle yenem, Gibqon deqsitta magaalak ten. Tokkel seeka kee raqqa 'te ummattah foocal yok iyyemii,

² «YALLAY Nabaamak Nabah, Israayil doore Dagelta kinnihiyya iyyemii, ‹Baabelon malik sinam fillal yabbixe *madmad (kambar) kaak aggileyyo.

³ Duma Baabelon-malik YALLIH Qibaadah-Qarik beeh suge duyyey Baabelon fanah dannabah beehiyya wadir namma sanatih addat akke gacseyyo.

⁴ Malik Yahoyaakím-Yahoyaasin kee kaak kalah yan Yuudah maray Baabelon rasu fan seewah orbiseenihiyya kaadu akke gacseyyo. Ahaysa Baabelon-malik sinam fillal abbaxuk suge *madmad aggiggileyyo. Tahat yabtam yoo YALLA› 'yaanam iyye» iyye.

⁵ Too waqdi seeka kee raqqa 'ye maray YALLIH Qibaadah-Qarih addal soolak sugehiyyah foocal, Ermiyaas kaak iyyemii,

⁶ «Aamiin! YALLI toh neh abay! YALLI ku afih innal neh abay! Atu akah inta'nnah, Qibaadâ-Qarik Baabelon dannabah been duyye kee seewah orbisen mara neh gacsaanam, ku afih innal, neh abay.

⁷ Toh meqeemik tanih tani'mmay, koo kee a mara inkih taabbeeni'gidih, ken foocal kok axcem liyo.

⁸ Koo kee yok dumal sugte nabuwwa carbiiy qulul kee bala mango baaxo kee doolatwal oobelem naharat warisak sugte.

⁹ Takkay immay baaxol wagari gacele iyya nabi, nummah YALLI ruube nabi kinnim kaak elle tamixxigem, edde yabba 'yem nummak maacissa waqdi» 'yaanam kaak iyye.

¹⁰ Tohuk lakal Cananiya, Ermiyaas fillal abbaxuk suge *madmad kaak kalla heeh bututtukku hee.

¹¹ Sarrak ummatak foocal iyyemii, «YALLI iyyeemih, ‹Malik Nabkadnessar mango ummatih fillal yabbixe madmad sinaamak elle kalu waam tama'nna. Ta namma sanatih addat, toh elle exce'nnal, abeyyo› 'yaanam iyye» iyye. Tohuk wadir Ermiyaas isi gexoh gexe.

¹² Tohum tekkeemih dago ayroora suggu 'yeenik lakal, YALLIH qangara Ermiyaasal obte. YALLI kaak iyyeemih,

¹³ «Cananiya fan gexay kaak intaamah, ‹YALLI kok iyyaamah, «Cooxuk bicsen *madmad tiggileh immay wokke birtak bicsen madmad ciggiiliseyyo kok iyya› kaak inxic. Qagissa haay kaak intamaa,

¹⁴ ‹YALLAY Nabaamak Nabah, Israayil doore Dagelta kinnihiyya, Aham fanah Baabelon-malik cooxuk bicsen madmad fillal akak abbaxuk suggu 'ye marak, ahak wadir meqe'nnah kaah taamitaana'gidih, birtak bicsen madmad fillal keenik heeyyo. Tohuk wadirih kay taamat gaceloonuuh, kay taama abelon. Sahda hinna'mmay, alluwwah agantah, kay milkih xiinele› 'yaanam kaak inxic» kaak iyye.

^15-16 Too waqdi Ermiyaas Cananiya fanah gexeeh, kaak iyyemii, «Cananiyaw, YALLI koo maruubinnaay, atu ummatat dirab numma celsissa. Tonna'mmay taway YALLI kok iyyem koh warisu waak ankacis. ‹Ahaysa addunyâ bagul koo macaba. Ummat yi naqboytit abteeh, tohuk gexxaamah a sanat gaba kale'kal rabettom ixig› kok iyye» kaak iyye.

¹⁷ Cananiya, YALLI akah iyye'nnah, too sanatak malcinhaytoh alsat edde rabe.