Ermiyaas 27 - NABUWWA KEE MALIKWA

AWUR FILLAL HAAN CAXXIH CEELALLO

^1-2 Ermiyaas iyyemii, Yoosiyaahû-Xidkiya Yuudâ-malik edde yekke sanatat xayi ayro, YALLIH qangara yol obteeh; yok iyyemii, «Arabak bicsen qaruuma kee cooxuk, awur fillal haan caxxa bicisay filla isik haay;

³ Edom kee Mooyab kee Qammon kee Suur kee Saydah malikwa fanah ruubu waa farmo kol aceeyyok, Yarusalaam magaalah addal, Xidkiyah xaqul yan farmo maray a koona malikik yemeetehiyyal, too farmo qidetto.

⁴ Keenik intaamah, ‹YALLAY Nabaamak Nabah, Israayil doore Dagelta kinnihiyya sin malikwak iyyu waam keenih waris. YALLI keenik iyyaamah,

⁵ Inni kaxxa qande kee duddat ta addunya gineeh, sahdaytu kee alluwway tet bagul tanihiyya kaadu gine. Innih ginem innih faxe numuh yacayu duuda Dagelta kinniyo.

⁶ A gid takke doolatwa inkih, Baabelon-malikiy migaaqah Nabkadnessar deqsitay yi naqasu kinnihiyyah gubat haytem yoo. Dubaala kinni-way kay gubat xiiniseyyo.

⁷ Kay dardaarinni edde baya ayro fanah, kulli doolat kaa kee kay xaylo kee kay xayloh-xayloh naqoosa akkelon. Tohuk lakal miduh kay mari gersi doolatay qande lehiyyah naqoosa akkelon.

⁸ Takkay immay usuk ta abbootan gabat lem fanah, doolat takkuu, faxe mara takku, usuk fillal siinik haa *madmad (kambar) oggole waah kay amri cinu waa mari yenek, too mara usuk seefit ken selam fan carbi kee qulul kee dalkat ken digaaleyyo.

⁹ Tonna leemiik, ama nabuwwa kinnino iyya maray isin nabuwwah litoonuhiyya kee, sarra takku waytam soonoh nuble iyya mara kee, ginnili kee kalluwalle kee ramli-qida siinik intam maabbina. Baabelon malikih gubat magacina siinik iyyaana'mmay, toh moggolina.

¹⁰ Oson siinil yaceenim diraabaay; ken yab toobbeenik, tonnal sin elle aaxige waan baaxo seewah sin beelon. Ken yaabal maylahitina. Ken yab toobbeenik, baaxok akah tawqen innah siinik abeyyooh, finqitetton.

¹¹ Takkay immay faxe baaxoh mari, Baabelon malik keenil yabbixe *madmad cine waanaah usuk keenik aba iyyam abeenik, tonnal isinni baaxol elle yanoonay ken axceyyo. Isi buqre yabqureeh isi baaxol yan mara ken abeyyo. Baaxok ken masgayya. Tahamat yabtam yoo YALLA› keenik inxic» yok iyye.

¹² Woo farmo woo marah warse waqdi, Yuudâ-malikih yen Xidkiyah kaadu too farmo warseeh; kaak excemii, «Baabelon malik fillal kok hayu waa madmad macinin. Kaa kee kay marih yab macininay kok iyyaanam ab. Tonnal rabak cattimetto.

¹³ Is kee isi mara carbi kee qulul kee dalkat maselin. Baabelon-malikih yab cinu waa mara carbi kee qulul kee dalkat seleyyo, 'yaanam YALLI dumaak iyyek, is kee isi mara maselsiisin.

^14-15 Ama nabuwwa-kinnino-iyya maray Baabelon malikih yab moggolina siinik iyyahiyyah yab moggolina. Oson nanu nabuwwa kinnino 'yaanam siinik iyyaanah immay, toh keenik diraabaay; anu ken maruubinniyok, ken yab moggolina 'yaanam YALLI isih siinik iyye. Ken yab toobbeenik, baaxok sin ayyaaqeyyo; sin bayseyyo. Sin kee keeniy dirab siinil yaceehiyyak numuh maysaay, inkih sin bayseyyo 'yaanam iyye» kaak exce.

¹⁶ Tohuk lakal YALLI iyyem seeka kee raqqa 'te ummatah warse. Too marak kaadu excemii, «YALLI siinik iyyeemih, ‹Yi Qibaadah-Qarik Baabelon fan dannabah been duyye xayi saaku gacselon iyya maray nabuwwah litoonuhiyyah yab maabbina. Oson siinil yaceenim diraaba.

¹⁷ Rabak cattintaanam faxxeenik, Baabelon malik fillal siinik hayu waa *madmad raabitay xiina. Magaala siinik num sinniih lac sinni abur maabina.

¹⁸ A mari nummah nabuwwa yekkeeh siinih warsaanam yi farmo tekkek, tonnal Yarusalaamal YALLIH Qibaadah Qarih adda kee malik buxah addal tan duyyey raqtehiyya Baabelon mari dannabah bee waa'gidih yoo kallacoonay› siinik iyye» keenik exce.

^19-20 YALLI toh akak iyyem maa duyyeey inteenik, toh akak iyyem, Baabelon-malik Yahoyaakím-Yahoyaasin deqsita Yuudâ-malik kee Yarusalaam magaala kee Yuudâ-rasul suge makaabon xabba heeh seewah Baabelon fan bee saaku, YALLIH Qibaadah-Qaril sugte duyyek qamidwa kee nacaasak bicsen kaxxa tanak kee gaariira kee, kalah kaadu, Yarusalaamal tan duyyek tu akak cabeh gexek ten. Too duyyey raqtehiyya siinik bee waana'gidih YALLA kallacoonay.

²¹ Takkay immay YALLAY Nabaamak Nabah, Israayil doore Dagelta kinnihiyya, YALLIH Qibaadah-Qari kee malik buxal raqte duyyeh giddinaamak iyyem, ah teeti:

²² «Ta duyye ellecabol Baabelon rasu fan dannabah beeloonuuh; anu sarra akah gacsan innah keenik abam fanah, tokkel elle sugele. Sarrak beenih sugen duyye inkih le aracah gacseyyo. Tahat yabtam yoo YALLA» 'yaanam iyye keenik exce.