Ermiyaas 26 - NABUWWA KEE MALIKWA

ERMIYAAS IS QIDAANAMAK MEYSITE

¹ Ermiyaas iyyemii, Yoosiyaahû-Yahoyaakim Yuudâ-malik edde yekke sanatat xayi ayro,

² YALLIH qangara yol obteeh yok iyyeemih, «YALLIH Qibaadah-Qarih daaratal solla inxicaay Yuudâ-magaaloolik qibaadah tokke yamaate mara lih yab. Anu taway kok inxicca axceemik tu macabinay qangara qangarah keenih waris.

³ A yab yaabben waqdi, edde sugen uma-taama cabaanam takkeh. Ta yab oobba haan waqdi, edde yanin umaanek raaqen ken tekkek, umaane keenil mabaahaay keenik abeyyo excem keenik maaba.

⁴ Kol ruuba farmo ah teeti. Keenik intamaa, ‹YALLI siinik iyyamaa: Yi yab ankacisaay anu ahak dumaak siinil oobise kitaabay yi xinto elle tanihiyya intam abaay;

⁵ sin fan ruuba nabuwway yi farmot tanihiyya siinik intaamah ayti acuya. Mango adda sin fan ken ruubak suge'mmay, siinik iyyeenimih ayti maacanniton. Away siinik axcem ankacise wayteenik,

⁶ ama qariy yi qibaadah xiseenihiyya Siiloh innah hayya heeyyo. A magaala foyya abba heeh; sarra teetit tekkem yubleeh yoobbe mari itta abaara waqdi, «Woo magaalat tekkem siinit takkay» axcuk, abaaroh tet haysitelon› 'yaanam keenik inxic» yok iyye.

^7-8 Seekaay nabuwwa kinnino iyya mara kee, wohuk kalah yan maray raqqa 'yehiyya inkih, qibaadah qarih addal ta farmoy YALLI Ermiyaasak warisa iyye keenih warisak suggu 'yeh gaba kale waqdi, xabba kaa heeniih, deero kaal aben. Sarrak, «Taway edde yaabak sugte yaabal rabi kol yamaate.

⁹ YALLI, ‹A Qibaadah-Qarik Siilok abem abeyyo› iyyeeh, ‹A magaala num dabaaqah elle gace waa abur abeyyo› iyye; akah intem macaay?» axcuk, yakkeenimiik kaa dadhen.

¹⁰ Yuudah-abbobti tekkem yoobben waqdi, malik buxah gasoy elle sugeenihiyyak YALLIH Qibaadah-Qari fan yemeeteeniih; tokkel Qusba-afa deqsita aracal daffeen.

¹¹ Tohuk lakal seeka kee nabuwwa yabteeh, Yuudah-abbobti kee raqqa 'ye marak iyyeenimii, «A num ni magaalak ceele-waytam iyyeeh; toh isin isinni aytih toobbeenih. Taway hay, taham iyyeemih rabi cokmi kaal yamaateh yan» 'yaanam iyyen.

¹² Too waqdi Ermiyaas too yaabal gacsemii, «A Qibaadah-Qari kee a magaalah giddinaamak siinih warissa heem inkih YALLI yok inxica iyyeemi.

¹³ Awayah tu gactek, edde tanin uma gitak uduuraay, YALLAY sin Dageltah yani siinik iyyem oobbeya. Toh abteenik, YALLI siinih loowe bala siinil moobisaay siinih racmatele.

¹⁴ Yi tiyah tu gactek, anu away sin gabat anih aniih, siinit ceelinnaanim yok abbaasita'mmay,

¹⁵ yoo qidden sin tekkek, dambi sinni numih qabal foyyah caxxeenimih, umaane sin kee a magaala kee a magaalah mara macabtam taaxigeenimi. Macaay inteenik, yoo rubteeh aham keenih warisaay aylahu keenih kal yok intem, nummaak YALLA» keenik iyye.

¹⁶ Too waqdi makaabon kee raqqa 'ye mari yakkeenimiik, seeka kee nabuwwa kinnino iyya marak iyyeenimii, «A num edde yaabam, YALLAY ni Dageltah yani kaak inxica iyyeemiiy, isi amok yeyyeeqem hinna. Tonna leemiik rabi kaal mayamaata» iyyen.

¹⁷ Sarrak baaxoh idoolak garab ugutta 'yeh wokkel gaabooweh suge marak iyyeenimii,

¹⁸ «Ciskiyyaahu, Yuudâ-marak malikih yen saaku, nabi Miika deqsita nabiy Moreset rasul yoobokehiyya ummatah inkih YALLI kaak inxica iyyem warseh yeneeh, too nabi too saaku iyyemii, ‹Siyon qale buqre elle takke booxah raaqele. Yarusalaam magaala abuuruh raaqele. Yallih Qibaadah-Qari elle yan qale garbo akkele› iyyeh yen.

¹⁹ Malik Ciskiyyaahu kee Yuudâ-mari, Miika toh iyyeemih kaa maqidinnon. Malik Ciskiyyaahu YALLAK meysita numuk teneeh, a magaala YALLI bayse waa'gidih YALLA kallace. Too waqdi YALLI kaadu keenil oobise raare bala keenik raaqiseh. Taway nanu kaadu too malikik kaxxih, kaa qide waynaama. Kaa qidnek, umaane ninnih ninnil bahnem deqsitele. Tonna-leemik ta num cabnaama» iyyen.

YAHOYAAKIM GERSI NABI ELLE QIDE'NNA

²⁰ Ermiyaasak kalah kaadu, Samaqyáh-Uriyya deqsita nabi yen. Too nabi elle yoobokem, Kiriyat-Yaqaarim deqsitta magaalak ten. Too nabi kaadu Ermiyaasak kaxxih, a magaala kee a marat takku waytaamay YALLI kaak warisa iyye warseh yen.

²¹ Malik Yahoyaakim kee kay gubal yan mari usuk iyyem yoobbeeh, tohuk gexxaamah too malik kaa qidam faxe. Uriyya malik kaa qidam faxam yoobbe waqdi meysiteeh, Masri fan kude.

²² Malik Yahoyaakim, Qakbór-Alnaatan deqsita num lih wakalih sinam hayya heeh, kaa baahaana'gidih, kay lakal ken ruube.

²³ Too mari Uriyya Masrik baaheh, malik Yahoyaakim fan kaa been. Malik kaa qidsiiseeh; sarrak masaakiina magaqah edde haan aracat raysa kaak heen.

²⁴ Takkay immay Ermiyaasah tu gactek, Safán-Acikam deqsita num maroh amol yaabal kaa cateeh, tonna leemiik rabak cattiimeh.