Ermiyaas 25 - NABUWWA KEE MALIKWA

KILBAT LE KABUK YAMAATU WAA NAQBOYTA

¹ Yoosiyaahû-Yahoyaakim malik edde yekke fereyhaytô sanatat Yuudâ-marih giddinaamak YALLIH qangara Ermiyaasal obte. Toh kaadu Nabkadnessar deqsita malik Baabelon malik edde yekke sanatak ten.

² Too waqdi Ermiyaas Yuuda kee Yarusalaam marak iyyemii,

³ «Amón-Yoosiyaahu malik edde yekke taban kee sidochaytô-sanataay takke fanah, labaatanna kee sidiica sanatah, YALLIH farmo fiiruk geerah siinih warsa'mmay, maqal yok edde mahaysitinniton.

⁴ YALLI mango adda isi nabuwwa sin adda ruube'mmay, iyyaanam keenik mankacisinnitoonuuy ken farmot baaqid mahanniton.

⁵ Too nabuwway sin adda amaatuk sugtehiyya siinik inteemih: ‹Uma taama kee qamalliinoy edde taniinihiyyak raaqa. Tahak raqteenik, YALLI sin kee sin kaxxa abbobtih kulli waqdi ikoytah yecee rasul muquk xiinetton› siinik iyyen.

⁶ ‹Yallak sa tu maqbudina. Isinni gabak bicissen duyye maqbudinaay, Yallih naqabu isinnil moobisina. YALLI aba siinik iyyem abteenik, Yallih digaalak cattiimetton› siinik iyyen.

⁷ «YALLI, ‹Yi yab cinteeniih, duyye qibaadat gacteenimih sabbatah, yi bagcarra sin maadde; yi naqabu isinnih isinnil oobissen› 'yaanam siinik iyye» keenik iyye.

⁸ Kaadu qagseh keenik iyyemii, «YALLAY Nabaamak Nabahiyya siinik iyyamaa, ‹Yi yab cinteeniih; tohuk gexxaamah,

⁹ kilbatak sinam baaheyyooh, Baabelon malikiy migaaqah Nabkadnessar deqsitaah yi naqasuh yanihiyya siinit ruubeyyo. Ta mara bahha heeh, a baaxo kee a baaxol yan mara kee dariifal yan marat inkih ruubeyyo. Keenit tekkem yabalu waa mari hagga axcele. Buruten maray baaxot qideenihiyya ken abeyyo. Sarrah akak ugute waan baatih ken bayseyyo. Tahat yabtam yoo YALLA› iyye.

¹⁰ YALLI kaadu qagseh iyyemii, ‹Luk tenen rufto kee abak tenen farcat sin waysiiseyyo. Digibil farcatah akkuk yen digir ahaysa mayan. Zeytiy (Saliidiy) bar faanus edde urusak teneenihiyyah agantah sin waysiiseyyo. Eceyyal riyak tenen daro ahaysa mageytan.

¹¹ Inkih yan rasu abuuruy sahda elle deedalta abeyyo. Baabelon-malikih gabat iysibixe baaxooxa, malcina-tabanih sanat Baabelon xintoh gubat gacele.

¹² « ‹Too malcina-tabanih sanat gaba kalla haa saaku, Baabelon malik kee kay baaxoh mara kee, Baabeloonuh yooboke marih rasuy tikka iyyahiyya inkih bayseyyo. Tonnah tanim keenil akah baahu waam, ken umaane. Tohuk wadir ken baaxo abuuruy num sinniih lac sinnihiyya akkeleeh, daayiman abuuruh raaqele.

¹³ A kitaabal edde yabba excem abeyyooh; Baabelon baaxooxa akah inxicca exce'nnah, bayseyyo. Ermiyaas edde yaabem inkih abeyyo.

¹⁴ A saaku oson yibbixen baaxooxah mara naqoosah loonu'mmay, oson isinnih, marin naqoosa edde yakkoonu waan ayro tanih. Marin naqoosa ken abeyyo. Oson sinaamal bahha heenim keenil baaheyyo› 'yaanam iyye» keenik iyye.

YALLIH DIGAALA

¹⁵ Ermiyaas qagissa heeh iyyeemih, YALLAY Israayil doore Dagelta kinnihiyya, «Ermiyaasow! Ayka, a kobbaaya beyay anu koo elle ruuba maral ucuy. Ama kobbaaya kibuk akak tanim yi naqabu'mmay, tama naqabuk ken afqetto.

¹⁶ Yaaquboonu waan waqdi lagaq axceloonuuh cissit maraaqan. Cissit akah raaqe waanam, anu keenit ruubu waa maray carbi keenit abu waahiyyah sabbata» yok iyye.

¹⁷ Too kobbaaya YALLIH gabak beeh, usuk «Fan bey» akak iyye marah fan beeh; ken akak efqeh.

¹⁸ Naharak, Yarusalaam kee Yuudâ-magaaloolil suggu 'ye mara kee, ken malikwa kee makaabon inkih too kobbaayat taniimik efqe. Toh akah abem, a saaku akah yanin innal, a magaalooliy oson elle sugeenihiyya num sinniih lac sinni abur takke'gidiiy; keenit tekkem yubleeh yoobbe mari, ‹Woo marat tekkem siinit takkay› axcuk sinam titta abaarinnaan waqdi, kulli way ceelalloh haan mara yakkeeni'gidi. Tonnah kaadu sinam buruttaah ilaqta mara yakkeeni'gidik ten.

¹⁹ Too marak kalah kaadu, a kobbaayat taniimik efqe mari yan. Tohumuu, Masri malik kee kay gubal tan doolat abbobti kee makaabonuuy, Masri mara kee

²⁰ allî-baaxoh maray Masril dabaaqah yene kee, Quux deqsitta baaxoh malikwaay, Filistiin magaaloolik Askalon kee Gaada kee Ekron akak iyyan magaaloolil dabaaqah ten malikwaay, Asdood deqsitta magaalal baatik raaqe maraay,

²¹ Edom kee Mooyab kee Qammon maraay,

²² Suur kee Sayda deqsitta namma magaalah malikwaay, Maditraaniyah badih dariifal ten malikwaay,

²³ Dadan kee Teema kee Buud deqsitta sidooca magaalal yen maraay; amô-xagor namma seltak isik argaquk yen maraay,

²⁴ Qarab baaxoh malikwa kee bacarih tan baaxol guubuh ten kedoodah amoytit inkih ta kobbaayat taniimik efqe.

²⁵ Too marak kalah kaadu, Dimri kee Qeelam kee Meediya akak iyyan baaxooxal yen sidooca malik kee,

²⁶ kilbat le kabut raqta baaxok xer ikke kee xayi'kkel ten malikwak num macabinniyoy tiya tiyah ken efqe. A addunyah bagul enna 'ta doolatwa inkih ta kamrik efqe. Kulli marak ellecabot Baabelon malik efqe.

²⁷ Sarrak YALLI yok iyyeemih, too marak intaamah, «YALLAY Nabaamak Nabah, Israayil doore Dagelta kinnihiyya, ‹Tama kamrik baqqa hayteenih edde iskirraay allittaay, sarra akak ugute waytan niksoh innikissa intaanam fanah sin afqeyyo. Toh akah axcem, anu siinit ruubu waa maray seefit sin selu waahiyyah ceelallo› 'yaanam siinik iyya» keenik inxic.

²⁸ Kobbaaya gabak kok tabse cinnaay, «Manaaquba» kok iyyeenik, tonnal keenik intamaa, «YALLAY Nabaamak Nabahiyya, ‹Maabinay uquba.

²⁹ Ama magaalay yi migaq addal akak yanihiyyat baati ruubam qimbisek, hay, isin gersi maraw, digaalak cattiimettoonum maay akkaluk sugten? Digaala raq siinik matallaay; carbit sin selu waa mara siinit ruubeyyo. Addunyâ bagul yan marak inkih toh abu waama. Tah intam yoo Nabaamak Naba YALLA› 'yaanam keenik inxic» yok iyye.

³⁰ Kaadu qagseh yok iyyeemih, «Taway kaadu keenit takku waytaamat yaabak, keenik intamaa, ‹YALLI qaraanak bagcarritele; kay dabqay taahirik yanihiyyah amook isi marat bagcarriteleeh, kaxxa xongoloh xongolele. Carbih gexa mari edde haa tirtirat heele. Addunyâ-bagul yan marat xongolele.

³¹ Usuk aba xongolok radah yan qalê-berri baaxô-maggaraqal antaabbele. YALLI ummattak inkih malkitele; keenik waamah isih keenil ackumele. Uma-maral rabi cokmi abele. Tahat yabtam YALLA› 'yaanam keenik inxic.

³² «Qagisay keenik intamaa, YALLAY Nabaamak Nabahiyya siinik iyyamaa, ‹Bala temeetek, wagita. Umaane fuluk axcuk baaxook baaxoh marat tabta. Baaxô-maggaraqak kaxxa caaco ugutta› keenik inxic» yok iyye.

³³ Too saaku YALLI qide marih raysi addunyak a exxaay woo exxal qangalaylut raaqele. Too marah num marookita. Raysa keenik ugussaah ken taaguqem mageyan. Saqi dacah innah, elle ken qiden ikkel, elle yanoonay ken axcelon.

³⁴ Baaxoh abbobtih yan maraw, weeqa boogisa. Rookitaay gombod bagul ubruka. Sin edde yasguudoonu waan uddur yemeeteh. Yasguuden maruwih innah maasayya maasayyah sin kuramkurelon.

³⁵ Kudmah gexxan rike mageytan; akak tawqen foxo matan.

³⁶ Ankacca haay! Baaxoh abbobtih yan mari weeqat yan. YALLI baaxo keenik bayseh, booget yanin.

³⁷ YALLIH naqbi baaxo keenik bayseeh finqa abe. Amaanah elle sugen baaxo abur abe.

³⁸ YALLI, qansarite lubaakay gablah addak yewqeh innah, ken baaxot dadho abe. Kay bagcarra kee carbi baaxo abuuruy lac sinniih num sinni abte.