Ermiyaas 24 - NABUWWA KEE MALIKWA

ERMIYAAS YUBLEEMI

¹ Ermiyaas iyyeemih, «Baabelon malikiy migaaqah Nabkadnessar deqsitahiyya, Malik Yahoyaakím-Yahoyaasin kee kay gubal ten xintoh abbobti kee, naggaaritte kee taamah ixxiga luk yen mara gaabossa heeh, Yarusalaam magaalak Baabelon rasu fanah seewah beyya heek lakal, YALLI wacyih namma kafaqay YALLIH Qibaadah-Qarik foocal daffessa heeniy addat *sublâ-xaylo akak tani yoo yuybullee.

² Kafaqak teenat nabam meqe *sublâ-xayloy naharak toobokehiyya ten. Nammeyhaytô-kafaqah addat toome xayloy yakmeenim sinnihiyya uble.

³ Sarrak YALLI wacyih yo'lih yaabe. Yok iyyemii, ‹Away tableemit yaabey› yok iyye. Anu too waqdi excemii, ‹Taway ablem *sublâ-xaylo immay, kafaqak teenat tanim meqeh taniih; akittot tanim toomeh tanih yakmeenim leh matan› exce.

⁴ «Sarrak YALLIH qangara yol obteeh yok iyyemii,

⁵ ‹Hay tonnal, yoo YALLAY Israayil doore Dagelta kinnihiyya axcemii, Yuudâ-baaxok Baabelon rasu seewah ruube mari tama sublâ-xayloy naharak toobokehiyyah bis le. Meqe xintoh ken xiiniseyyo.

⁶ Baabeloonul yaniinim fanah, innih amo keenik wagitak sugeyyooh, sarra a baaxo ken gacseyyo. Ken gacsek lakal, ken xiseyyo'kkal ken maggilaay; caxah innah ken daabiseyyo'kkal, ragidiik ken masiiba.

⁷ Anu yoo edde yaaxigen kas keenih aceeyyooh, tohuk wadir isinnih yoo aaxigelon. Yi mara akkeloonuuh, anu kaadu ken Dagelta akkeyyo. Macaay inteenik, oson tikka 'yaanamaak yol aduurelon.

⁸ Takkay immay Yuudah yooboke Xidkiya deqsita malik kee, kay gubal tan xintoh abbobti kee, Yarusalaam magaalah maray garab akkel akak raaqeeh garab Masri fanah akak gexehiyyak axcem liyo. Too mara tama sublâ-xayloy toomehiyyah innah ken heeyyo. Tahat yabtam yoo YALLA.

⁹ Baadal enna 'ya mari keenit tekkem yaabbu waa waqdi, kaxxa wariggah wariggitelon. Sinam elle tasuule mara ken abeyyo. Anu ken baadisu waa baaxol, sinam ken migaq xagak gersi mara bursutele. Titta abaara mari, «Woo marat tekkem siinit takkay» axcuk abaaroh ken haysiteloonuh, keenit tekkem missila akkele.

¹⁰ Duma ken kaxxa abbobtih ecee baaxoy away oson elle yaniinihiyyal saabo cabba haanam fanah, way carbiiy, way qululuuy, way kaadu dalka keenit ruubak, sella ken heeyyo› 'yaanam yok iyye» iyye.