Ermiyaas 23 - NABUWWA KEE MALIKWA

YALLI SINAM WADA MALIK RUUBELE

¹ YALLI iyyemii, «Yi mara bayissaah fixixih rubta malikwat yi cokmi yakku waa saaku, cokmi keenil agibdeele!

² Yoo YALLAY Israayil doore Dagelta kinnihiyya inni mara dacrisa akak exce marak axceemih, ‹Yi mara madacrisinniton. Fixixih ken rubteeniih baaxok ken baadisseenih. Ta saaku ta umaaney abteenihiyyah sin digaaleyyo› siinik axce.

³ «Inni maray baatik saaboh raaqehiyya away fixixih elle abbixe baaxok gacseyyooh, elle yooboken baaxo fan ken gacseyyo. Ken gacsek lakal, isinni baaxol mango xaylo xaleloonuuh andarrelon.

⁴ Amo keenik meqe'nnah wagittu wayta abbobti keenih heeyyo. Yi mari ahaysa cunxoh marabaay, ‹Maca net akkeleh?› did m'iyyaanaay, fixixih magexan. Ahat yabtam yoo YALLA» 'yaanam iyye.

⁵ Qagseh iyyeemih, «Dawuduk radeeh cakki gitat gexa malik siinih edde reedisu waa ayroora amaatele. Too malikiy Dawud-Luddal muggaaqisaanahiyya reedu waa saaku, ummat kasat xiinisaah qadaalat le malik akkele. Baaxo qadaalatat xiinisele.

⁶ Kay dabaanal Yuudâ-mari waddiimeleeh, Israayil-mari amaanah xiinele. Too malikiy yamaatu waahiyya migaaqah, ‹YALLAY Cakki neh Yekke› deqsitele» iyye.

^7-8 YALLI kaadu iyyeemih, «Ummat, ‹Waara YALLAY Israayil ummat Masrik yeyyeeqehiyyah migaaqal xiibinna› 'yaanam duma axcuk akah sugen innah, m'iyyaanay; ahak wadir, ‹Waara YALLAY Israayil ummat kilbat le kabut raqta baaxo kee wohuk kalah tan baaxo fan baadissaay wokkek wadir ken gacissa heehiyyah migaaqal xiibinnah nan› edde iyyoonu waan ayroora amaatele. Tahak wadir isinni baaxol nookiselon» iyye.

DIRAB LE NABUWWA

⁹ Ermiyaas dirab le nabuwwah giddinaamak iyyeemih, «Cisab yoo yibbixeeh; afqado dub yok inta; xagar yok axaxitah. YALLAY *kudduusuk yani kee Yallih qangarah meysih, yiskire numih innah gaceh an. Mango kamri yooqobe numih bis elle an.

¹⁰ Baaxo inkih YALLAL luk sugen imaan cabe marak temegge. Abaarô-sabbatah baaxo kafteh; rookat tan. Lacti qayso luk teneeh, lac elle alooluk yen baaxo kafteh. YALLAL luk sugen imaan keenik yeerreh; umam aban. Lon abbootanat gita maliinoh tanim aban» iyye.

¹¹ YALLI iyyeemih, «Nabuwwa kinnino iyya mara kee seekah yooboke marak num mayaysay inkih darre yot caben. Yi Qibaadah-Qarih addal oson aban umaanet anu innih ken ibbixe.

¹² Oson edde gexan giti, dite kee futuci le gita; aydafoofole ken liyooh too waqdi annikisselon. Digaala keenit abu waa saaku, bala keenil oobiseyyo. Tahat yabtam yoo YALLA kinni.

¹³ Duma Samaariyah rasul nabuwwa kinnino iyya mari abe umâ-yabulih tanim ubleh suge. Baqal migaaqal, ‹Woh akkeleeh ah akkele› axcuk sugen. Ta mari yi mara gitak hoxseeh, makot ken beyak yenen.

¹⁴ Takkay immay Yarusalaamal yan maray sinam nabuwwah le wohuk gactam abah able. Too mari dalwa abaah diraabat yaaba. Uma-taamak sinam akah aade wayta'nnah, umam sinam barsan. Ta mara kee Yarusalaamal yan mari inkih yi garil Sodom kee Gomorral suge marak baxsa maliiy too marih intit ken able.

¹⁵ Tohuk gexxaamah yoo YALLAY Nabaamak Nabahiyya Yarusalaamal yan maray nabuwwa kinnino iyyak axcemii: ‹Qeero le maaqo sin askameyyooh, summik tan leek sin afqeyyo. Sin umaanek gexxaamah diini maleela baaxol temeggeh. Sin umaanek gexxaamah Yallih meysi sinni mari baaxo kibeh› axce.

¹⁶ «Toh too tiya'mmay, Yarusalaam maraw, yoo YALLAY Nabaamak Nabahiyya siinik axcem liyo. Toh macaay inteenik, ama mari siinil yaceem numma makkalina. Deedaltam siinil yaceenim, gee waytaanam geettoonu siinik iyyan. Siinil yaceenim, isinni amok yeyyeeqen yaaba ikkal, anu keenik excem hinna.

¹⁷ Yoo buri intit yable marak, ‹YALLI, «Amaanah sin xiiniseyyo. Kullim siinil amqele» siinik iyye› iyyan. Yi yab aabbe waa maray isinnih faxam abahiyyak kaadu, ‹Umaaneh siinit takku waytam mali› iyyan» iyye.

¹⁸ Anu exceemi: «Ta maray nabuwwa kinnino iyyahiyyak addat inki numuy YALLIH maroh addal anuk YALLI lih yaabehiyya mayan. Inki numuy kay yab yoobbeeh warse mayan.

¹⁹ YALLIH naqbi mermeritta-caacoh gideey; umeynit baysele.

²⁰ YALLIH bagcarra isih faxem abe'kkal, maxabbacowta; keenih loowe digaala keenit abele'kkal, macaba. Yamaatu waa dabaanal tahat radettoonuuh; aaxigetton.

²¹ YALLI, «Anu a mara maruubinniyo. Farmo keenil maruubinniyo'mmay, tohuh ta mari farmo yi migaaqal baahaanamak maaseehedinnon. Sirrih, Yalli woh nek iyyeeh ah nek iyye 'yaanam uxih macabinnon.

²² Yi maroh addal, anu lih yaaba mara yakkeenimil, yi marah warisa keenik excem warisak yenen; away edde yanin umaane kee edde gexan uma gitak ken raaqisak yenen» 'yaanam iyye.

²³ YALLI iyyamaa: «Anu kulli ikkel yan Dagelta kinniyooh; dibuk inki arac hinna elle anim.

²⁴ Sahdayti abaamay yok qellittahiyya matan. Qaran kee baaxol inkih yan Dagelta kinniyo» 'yaanam iyya.

²⁵ Qagseh, «Ama nabuwwa kinnino iyya mari edde yaaba yab aabbeeh, garci akak mayyu. ‹Aham Yalli soonol nee yuybullee› iyyan.

²⁶ Ta mari ta dirab kee duquurusiyyal, yi mara yok yayxeeroonuh taqba mara kinnon. Annah tanim magide fan akkuk sugelee?

²⁷ Duma ken abbobti Baqal akak iyyan duyyeh qibaadat gacca 'yeenih yok elle yexxeereenih sugen innal, a saaku kaadu oson edde yaaban soonot yi mara yok yayxeereenim faxan.

²⁸ Soono yuble num, ‹Anu wonnah tan soono uble›, axcuk, yuble soonot yaabek faxeemi'mmay, ‹Yallih wacyi yol oobe› axce waama. Wonna hinna'mmay, nummah yok kaal obte farmo tekkek, qaduk keenih warsaamaay nummat ken lih yaabaama. Caffa kee daro inkim hinna. Tahat yabtam yoo YALLA.

²⁹ Yi farmo giray urtahiyyaay, maatakay xeet yaggile'kkal qellu mali.

³⁰ Nanu nabuwwa kinnino iyyaah, isinnih tittal yaceen diraabak ‹Akak noobbem Yalla› iyya marak, anu naqboyta kinniyo.

³¹ Isinnih bahiten diraabak, ‹Yalli neh warse yaaba› iyya marak naqboyta kinniyom yok yaaxagoonay.

³² Ummatey, anu siinik axcem ankacisa. Yok amaate wayte soono ‹Yallak nel temeete› iyyaah; anu keenik axce weem ‹Yalli nek iyye› iyya maray nabuwwa kinnino iyyak naqboytah yan Dagelta kinniyom yok ixiga. Ta mari isih edde yan mako hinna'mmay, ummat yok makot beyan. Akke waanaah gideh isinni haan. Ken rubtem yoo hinna. Farmoy keenil ruube mayyu. Ken kee oson bahneh iyyan farmo, ummatah xiqtam le farmo hinna. Tahat yabtam yoo YALLA kinni» 'yaanam iyye.

³³ Ermiyaas iyyemii, YALLI yok iyyeemih, «Tahak wadir yi marih num takkuu, seeka kee nanu nabuwwa kinnino iyya marak numuk teeni, ‹YALLI farmoh maca kol ruube. Ta saaku kaadu quukah maca nel haam faxa?› kok iyyeenik, keenik intamaa, ‹YALLAL quuka tekkem siiniiy; tohuk gexxaamah YALLI sin bayisaamat yemeeteh yan› keenik inxic.

³⁴ Hinna'mmay oson, ‹YALLI ruube quuka› 'yaanam axcih ken toobbek, toh iyya num kee kay buxah mara bayseyyom keenih waris.

³⁵ Anu excem yaaxigem faxa num yenek, isi kataysa kee isi ramad essera waqdi, ‹YALLI kaa essereenimik maca iyyeh? YALLI wohul maca gacse?› 'yaanam iyyoonay.

³⁶ Sahda, waara YALLAY Nabaamak Nabahiyyay ken Dagelta kinnihiyyah yab makkook makot beyan. Tahak wadir ‹YALLI ruube quuka› 'yaanam axce waanama. Toh iyya num yenek, yi farmo nummah quuka kaal abeyyo.

³⁷ Isiniiy, nabuwwak, ‹YALLI kaa esserteenimik maca iyyeh? YALLI wohul maca gacse?› inxica.

³⁸ Yi amri cinna hayteenih, ‹YALLI ruube quuka› 'yaanam inteenik,

³⁹ tonnal tahak wadir sin kee isin elle tanin magaalay duma sin kaxxa abbobtih eceeh sugehiyya ukkuqqa heeh baaxot qideyyo. Inni foocak sin kaleyyo.

⁴⁰ Sarrah sin cabe waa qaybi kee migaq umaane siinil oobiseyyo» 'yaanam iyye, keenik iyye.