Ermiyaas 22 - NABUWWA KEE MALIKWA

¹ Ermiyaas kaadu iyyeemih, «YALLI yo'lih yaabeh iyyemii, Malik qari fan gexay intamaa:

² Yuudâ-malikiy Dawuduk radehiyyaw, YALLI iyyam oobbey! Koo kee ku gubal tan doolat abbobti kee ku maray akke culahiyyak, YALLIH qangara oobbeya.

³ YALLI, ‹Cakkik tanim abaay qadaalatat taamita› siinik iyyah yan. ‹Dulmi aba mara kee edde yakke marih fan wagita. Dulmi edde yekke numih cakki aba. Allî-baaxoh maray sin addal yanil umam mabaahina. Qayxiixa kee gubuunul umam mabaahina. Dambi-maleelak qabal macaxina.

⁴ Anu taway siinik inxicca elle axce'nnal abteenik, tonnal Dawuduk rade mari dumaak luk suge dardaarinna luk raaqeleeh, baxak baxal keenik raaqele. Ken kee ken gubal yan mara a qarih afak dumaak elle abak sugen innah, faras-gaari kee faroosat gacca 'yeenih culla bukka axcelon.

⁵ Takkay immay yi amri oggole wayteenik, malik-qari abuur abeyyoomuh inni migaaqal siinih xiibita. Tahat yabtam yoo YALLA› 'yaanam siinik iyya.

⁶ «Yi garil, malik-qari Lubnaan qaleela kee Gilqad rasi qaxah leh gide le. Takkay immay too qax-maqaane le qari bayissa heeh, abur kaa abeyyoomuh inni migaaqal xiibita.

⁷ Anu malik-qarih ruubu waa mari, godmat aagaruk, kaat tan qamidway *sariidak bicseeni kitittiffa heeloonuh, girat qidelon.

⁸ Mango baaxoh maray a magaalah garik gitah gaceh gexu waahiyya tet baati yable waqdi, ‹Labhay, a magaala kaxxa magaalak tenek, annah tan umaane YALLI macah teetil oobise?› axcelon.

⁹ Sinam, ‹Amah YALLI teetil akah baahem, teetil yen mari YALLAY ken Dagelta kinnihiyya lih luk yen qahdi hawweeneenih, kaa cabba heenih duyyey gabak bicseenihiyya yaqbudeenim baahen› 'yaanam axcelon, 'yaanam kaak inxic, yok iyye» iyye.

YALLI MALIK YOWAACAD GIDDINAAMAK IYYEEMI

¹⁰ Yuudâ-maraw, Malik-Yoosiyaahuh maweeqina. Kay rabah markitinaay marookitina. Takkay immay kay baxa Yowaacadah kaxxam weeqa. Akak aduure waa beytoh kaa been. Ahak wadir elle yooboke baaxo wadirik mayaduura.

¹¹ YALLI, Yoosiyaahû-Yowaacad giddinaamak iyyeemih, «Usuk isi abbah aracal malikih suge'mmay a baaxok kaa beeniih;

¹² tahaysa wadiriik mayaduuraay marin baaxoy seewah kaa elle beenihiyyal rabele» 'yaanam iyye.

YALLI MALIK YAHOYAAKIM GIDDINAAMAK IYYEEMI

¹³ Isi buxa cakki-maliinot xiseeh, isi marih cawalay tu elle ecee weehiyyat xise numow, kum tekkeh! Qarik amol sinam xoqut roosan xise numow, kum tekkeh!

¹⁴ «Dabqah elle gaca'gidih kaxxa qari xissiteyyo. Amol akak kaxxam naba roosan xiseyyo. Bagu naba taagoota edde heeyyo. Adda akak qaxmeqe luucaanay sariidak bicissa heeh, bagu akak qasa kalamat askuteyyo» iyya numow, kum tekkeh!

¹⁵ Hay tah abam faxa numow, tah abtam kaxxa malik koo abelem maay takkale? Ku abba meqe manoh sugeeh qadaalat kee maqaane le numuk ten. Tohuk gexxaamah abinnaanim gabal kaak bicak ten.

¹⁶ Masaakiina kee tu'dagoytiitih cakki aba numuk ten. Tohuk gexxaamah abinnaanim gabal kaak bicak ten. Tonnah tanim abtam yoo yaaxige numu'mmay,

¹⁷ koh tu gactek, liyom yoo duddah iyya num hinnitooy, marin im dulmih beytaah, dambi-maleelâ-qabal foyyah caxxa. Isi mara tadlumeeh, keenit xukkuttaah, ken biyaktah.

¹⁸ Tohu'mmay YALLI kok iyyaamah, «Yoosiyaahû-Yahoyaakimow, ku rabah num weeqe waama. ‹Woyyow ni toobokoytaw› axcuk koh boogise waanama. ‹Woyyow, Yi amoytaw! Yi malikow!› iyyaah koh weeqe num ane waama.

¹⁹ Rabta saaku, rabe danan hirriigisak elle beyan innal, lafa kok hirriigisak beyya heenih magaalak afal qidelon» 'yaanam kok iyye. YALLI iyyeemih:

YARUSALAAMAT AKKELEEMI

²⁰ «Carbil sin catak yen mari a saaku qeebil gaceh yanik, Yarusalaam maraw, isin Lubnaan-qaleelah amo eweqay boogisa. Basan-rasu fan gexay kaadu boogisa. Abaarim-qaleelah amo eweqay; tokkeek, boogisa.

²¹ Gaddaleelah sugten saaku, anu sin lih yaabeh immay, ‹Ku yab mankacisna› inteenih yoo cinteenih. Qunxaaneey takke yi yab oggolten saaku manton.

²² Isin abten umaaneh qaybit radettoonuuh; qawrat sin abbixele. Abbobti siinik caaco caffa elle beyta'nnal beeloonuuh; carbil sin catak yen mara seewah beelon.

²³ Lubnaan rasuk baahen sariidak bicsen qarwat yan malikow, kaxxa biyaakay akah araadaqissahiyya koo abbixele. Dabbaqanta barrah innah iihisetto» 'yaanam iyye.

YALLI MALIK YAHOYAASINIK IYYEEMI

²⁴ YALLI, malik Yahoyaakím-Yahoyaasinik iyyeemih, «Anu waara Dagelta kinniyom teexegek, migdi gabah ferrantoh yok sugta way feerak siibba koo heeh,

²⁵ akak meysitta maray koo qidam faxah gabal koo haak en. Taway kinni way too marih gabal koo heeyyo. Malik-Nabkadnessar kee kay qaskarih gabal koo heeyyo.

^26-27 Koo kee ku-ina marin baaxo seewah rubsuuseyyo. Siinik num elle aabuke wee baaxo fan sin ruubeyyo. A baaxo sarrah mataduuraanaay, takken nammayak marin baaxoy seewah sin beenihiyyal rabetton» kaak iyye.

²⁸ «Yahoyaasin yiddigille galqiy num tu edde wee waah, baaxot qideenihiyya yekkeh mayanaa! Kaa kee kay buxah mara num ken elle aaxige waa baaxo seewah ken akah beenim, wohuk tanih matanaa!»

²⁹ Woyyow yi ummatey, woyyow yi ummatey! YALLI siinik iyyam oobbeya.

³⁰ YALLI iyyam ah teeti: «A num xale xaylo, xale weeh gide. Abba heem gabal kaak mabicta. Yuudâ-baaxol Dawud qarkayto nagra samad kaak maraaqa. Tahat yabtam yoo YALLA» 'yaanam iyye.