Ermiyaas 21 - NABUWWA KEE MALIKWA

XIDKIYA-FAXEM YALLI CINEH

^1-2 Yuudâ-rasuk malikih yan Xidkiya, Malkiyâ-Fascur deqsita num kee sek Maqseyaahû-Xafanya deqsita num Ermiyaas fan ruube. Too mari kaak iyyeemih, «Baabeloonuk yemeete Malik Nabkadnessar kee kay qaskar qeebi net abtah tanik, ku maganah YALLA neh kallac. YALLI isi abtoy qagabah tanihiyyak tuk teena abba heeh ken nek yayyaaqem takkehik, YALLA neh kallac» 'yaanam farmoh kaah ruube. Too saaku YALLI Ermiyaasal oobise qangara ah teeti.

³ Ermiyaas farmoh-yemeete-marak iyyeemih, «Xidkiyak intaanamah:

⁴ YALLAY Israayil doore Dagelta kinnihiyya iyyamaa, ‹Ama ku qaskaray magaalak irol Baabelon-malikit qeebi abtahiyya qeebil gacsiiseyyo. Baabelon-malikih-qaskar ku qaskarak qeebih aysiiseyyo. Ku qaskar keenik kudeleeh; ken silaac magaalâ gudel gaaboyselon.

⁵ Qeebi anu innih siinit abeyyooh; yi naqabu kee yi cayli le'nna isinnih abletton. Yi gaba le tamu abletton.

⁶ Ama magaalah addal rooci leemik tu macabaay; dalka keenit rubbu heeh too dalkat ken seleyyo.

⁷ Koo kee ku gubal tan doolat abbobti kee, wohuk kalah yan maray carbi kee qulul kee dalkak rooci edde raaqehiyyak inkih, Baabelon malikih gabat sin aysibixeyyo. Sarrak Nabkadnessar xabba sin heeh takkeenimiik sella sin heele. Too malik siinih maracmataay, saaboh num siinik macabay, takkeenimiik sella sin heele. Tahat yabtam yoo YALLA› 'yaanam yok iyyek, tama farmo tama innal kaah warisa» 'yaanam farmoh usuk ruube maral kaah ruube.

⁸ Sarrak kaadu YALLI yok iyyeemih, «Ummatak intamaa, ‹Yoo YALLI raba kee manok yayse gita doorittaanam siinil caba.

⁹ Ama magaalah addal raaqu waa mari carbi kee qulul kee dalkah rabele. Takkay immay magaalah addak eweqqa 'yeh magaala marot yabbixe maral gaba yecee num rabak cattiimeleeh, isi rooci wadele.

¹⁰ A magaala cabam mafaxay baysam faxa. Baabelon malikih gabat tet bayseyyo. Too malik carrissaay gomboduh gacissa tet heele. Tahat yabtam yoo YALLA› 'yaanam iyye» keenik exce.

YALLI YUUDÂ-MALIKWAH RUUBE FARMO

^11-12 Ermiyaas kaadu iyyemii, «YALLIH qangara yol obteeh yok iyyemii, Dawuduk rade Yuudâ-dardortik intaamah; ‹YALLI siinik iyyamaa, «Baaxol cakki yanim kee ane waam wagitaay yab cakkil kura. Sinam biyaaka mara kee biyaakisan marih fan wagitay yab qadaalatal keenih kura. Dulmi elle baahen numih cakki aba. Abe wayteenik, tonnal toh yi naqabu xaleleeh, yi naqbi sarra maxabbacoowa» 'yaanam keenik inxic› yok iyye.

¹³ «Yarusalaam magaalak kaadu iyyeemih, ‹Yarusalaamey, atu intam: Fayya 'ta ikkel aniih, yoo xagtam matanaay, yi adda num macula 'yaanam inta'mmay qeebi anu kot abeyyo.

¹⁴ Bahte umaaneh koo digaaleyyo. Malik qariy ku addal yanit gira ruubeyyo. Too gira kulli'kket gexeleeh, kullim gomboduh gacissa heele. Tahat yabtam yoo YALLA› 'yaanam yok iyye» iyye.