Ermiyaas 20 - NABUWWA KEE MALIKWA

FASCUR DEQSITA SEEKIH ABTO

¹ Immár-Fascur deqsita seekiy YALLIH Qibaadah-Qarik abbah yenehiyya ta farmo warisah yoo yoobbe waqdi,

² «Qibaadâ-Qarih daaratak Benyam Afa deqsita aracak daga le kabut raqta'kkel, gaboobi kee ibitte kaak namma caxxih fanat uxuyya haay kaa ugura» 'yaanamal amri yecee.

³ Too digaalak gaba yok kalen waqdi, saaku sek Fascur yemeeteh casbih edde suge namma caxxih fanak yoo kalla heeh yoo yeyyeeqeh. Too waqdi kaak excemii, «Ahak wadir YALLI koh yeyyeeqe migaq Fascur hinnay Magor-Missabib deqsita migaaqa» kaak exce. (Magor-Missabib 'yaanam Kulli-ikkel-cunxo-qide 'yaanama.)

⁴ «YALLI, ‹Isi nabsi kee isi kataysisih nabsit cunxo qida num koo abeyyo› 'yaanam ku giddinaamak kok iyyeh yan. ‹Kaadu ku kataysis keenik naqboytiitih yan marih gabat rabeloonuuh; toh isi intih abletto. Yuudâ-mari inkih Baabelon-malikih gabat radele. Too malik carbit yibbixe marak garab seewah isi baaxo beele. Wohuk raqtem seefit selele.

⁵ Oson buxal luk suggu 'yeenimiy edderra heenik tu macabaanay, inkih keenik beelon. Buxal luk suggu 'yen duyyek tu macabaanay keenik buubelon. Yuudâ-malikwa buxah addal luk sugte duyye inkih, kaadu isinni baaxo fan keenik beelon.

⁶ Too saaku koo kee ku kataysiisiy, atu sirrih woh ubleeh ah akkele akak axcuk sugtehiyya, Baabelon baaxo fan beeloonuuh; sarra tokkel rabetton. Magaq tokkel siinik akkele. Kok buxah marih agantah tonnal akkele› kok iyye» kaak exce.

ERMIYAAS YALLAK IYYEEMI

⁷ YALLA lih yaabeeh exceemih, «YALLAW yoo aylahisseh, kol aylahite. Qandeh yok taysem aaxigeh; caylah yok teyseh. Sinam burah af yol raqeeqissaah, anqaasah yol raban. Inkih tan ayro yol anqaasak asan.

⁸ Yaabinnaan waqdi, ‹Baati siinit temeeteh umaane sin tibbixeh› axcuk deero aba. Ku farmo warsa num ekke'mmay, ku farmo akah warsa mari anqaasah yoo leeh yoo bursutaanah.

⁹ Toh abaluk, ‹Ahaysa Yallih farmo mawarisaay YALLI woh iyye axcuk ken lih mayaaba› 'yaanam axce waqdi, ku yab afqadoh addat girah innah yok ure. Ku farmo warsaamak inni abbixem gabbateh immay effereh.

¹⁰ Sinam tutuc axcih aabbe. ‹Kulli-ikkel-cunxo-qidek, a num doolat abbobtih warisnay› 'yaanam axcih ken aabbe. Yi kataysis aylahu yok wagitta. ‹Ayrok teena aylahissa kaa hayneh kaa abbixennooh cane kaal gacsenno› iyyan.

¹¹ Takkay immay YALLAW, atu yo'lih taniih, qande kee cayla lem koo kinnuk, tutuc axcuk aylahu yoh gorrisa mari sarrah qaybit radele. Qaybi way ken macaba. Hebeltoh im gabal keenih mabicta. Sahda hawweene wayta qaybi ken abbixele.

¹² YALLAW, Nabaamak Naba Dageltaw, sahdak adda table'gidih, celta agarraabey qadaalatak tani keenit abta. Afqadot loonum taaxigeh. Tonna kinnuk yi naqboytiitik gacissa cane ablem kok faxa. Yol baaheenim kol caba.

¹³ «Ummatey, YALLA saarisa! Kaa faylisa! YALLAY yossommeeh xukkot yan mara umeynit gabak yayyaaqehiyya faylisa!

¹⁴ «Anu edde ooboke ayro abbarsimtay. Yi ina yoo xalte ayro barkatak baxaysitte ayro takkay!

¹⁵ Yi abbak, ‹Lab-baxi koh yooboke› axcuk ruffu kaa hee xaagu baahe numul abaaro obtay.

¹⁶ A num, YALLI uma baatih bayse magaaloolik kaxxih, ibak-gibda baati kaa tabbaxay! Saaku boogisa marih xongolo aytil kaak radday; Laqo carbi addat yakke weeqi aytil kaak raday.

¹⁷ Macaay inteenik, inâ-bagut yoo maqidinna! Aabukeemik dumal yoo qidaamal inni inah bagut edde raaqe raare.

¹⁸ Akah oobokem kinni sabab maaxiga. A gibdaabina kee a umaane able'gidih maay oobokee? Ta qaybi able'gidih maay kinnii?» 'yaanam exce.