Ermiyaas 2 - NABUWWA KEE MALIKWA

YALLIH MARI NAHARAK KAA ELLE KATAYE'NNA

¹ YALLIH qangara kaadu yol obteeh yok iyyemii,

² « ‹Away kol ruuba farmo Yarusalaam-magaala gexxa 'xicay ummat elle tani'kkel keenih waris› yok iyye. Sarrak too farmo yoh warseeh yok iyyemii, ‹Bar qunxuk tenen saaku, imaanak yol luk teneenih gide siinik aaxigeeh, qibna baqalah kacanuh tassalle inna, yoh assalluk tenen. Bacarih tan baaxoy tu elle aabuke waytahiyyal foocat siinik gacca exceh sin elle beyaamal yoo macininnitoonuy yoo katayak sugten.

³ Woo saaku, Israayil maraw, yi marak sugteeniih, yok sah taaxigeenim luk masuginniton. Tonna leemiik taahirik yan marah sugten. Siinil umam baahinnaan maral biyak kee dalka ruubak suge. Tah siinik intam yoo YALLA› yok iyye».

ISRAAYIL MARIH ABBOBTI ABTE DAMBI

⁴ Ermiyaas ummatak iyyeemih, «Yaqkuubuk radeeh Israayilih yooboke maraw, YALLIH qangara ankacisa!

⁵ YALLI siinik iyyam ah teetik, oobbeya. Sin kaxxa abbobti yot geyteemiy makot akah gexak sugeeni macaay? Maca keenil baahe? Gabak bicsen duyye yaqbudeenim taamah haysiten. Tu xiqe-sinni-duyyeh qibaadat gaceeniih tu xiqe-sinni-mara isinni aben.

⁶ ‹Masrik addak nee eyyeqqa heeh goloola kee bacarih tan baaxoy num sinniih lac sinniih gibdaabina leeh bakarroytah tanihiyyak addak isih foocat nek gacca 'yeh nee baahe Dagelti maca abeh?› maxacinnon. Yoo hawweeneeniih caagid yot mallinnon.

⁷ Tokkeek niqmatah tan baaxoy kudaar kee buqre elle aboonu waanahiyya fan ken baahe. Takkay immay yi baaxoy siinih eceehiyya caraamu yok abten. Baaxo yok wasak abten.

⁸ Seeka, ‹YALLI maca abeh?› maxacinna. Anu ruube xinto barsa mari yoo aaxige cineh. Baaxoh-abbobti anu niqibyo taamat asen. Oson nabuwwah luk sugen mari yaabe kaa tekkek, ‹Baqal woh iyye; ah iyye› 'yaanam keenik axcuk, isinnih kaadu tu xiqe sinni duyyey gabak bicseenihiyyah qibaadat gacen.

YALLI ISI MARAK WAYTO LE

⁹ «Tonna'mmay a saaku kaadu siinik waam liyo. Ta saaku sin kee sin xayloh xaylok malkitam liyo. Tah intam yoo YALLA.

¹⁰ Ayrô-culmal yan Kobros deqsita rasu fan gexay; ayrô-mawqal tan Keedar deqsitta baaxo fan gexa. Wokkel yan mari abam abletton. Too mari isin abteenih taniinim abeh masuga.

¹¹ Too mari dumaak yalla 'yeenih aqbuduk sugen duyyey isinni gabak bicseenihiyyal uxih yaamineeniih, akak makorsitinnon. Isin yi maraw, siinih tu gactek yooy naba Dagelta kinnihiyya cabba hayteenih tu xiqe sinniimih qibaadat gacten.

¹² Qaraanow, tah atu xiqta umaane hinnak, hagga inxicaay axaxit.

¹³ Macaay inteenik, yi mari namma dambit aseh yan. Yooy banaadantu bakaarak waddaah sila le lee bisu lehiyya cabba heenih lee addal akak salale wayta dorwah dagot gacen. Tah intam yoo YALLA.

ABEN DAMBI XALEEMI

¹⁴ «Israayil-xayloy, naqoosak mananniton. Naqoosâ-samad luk manannitoonu'mmay, sinam admoh akah gexxa naqoosa tekken.

¹⁵ Sinam lubooka siinil akah tekkem maay taaxigen? Baaxo siinik abur aben. Dabaaqah elle sugten magaalooli siinik carariseeniih tu elle ane wayta baaxoy haanah tani siinik aben.

¹⁶ Moof kee Tacfanhis deqsitta magaaloolil yan mari moyyak gude siinik molla heeniih sinam qangaasal sin aben.

¹⁷ Israayil xayloy ta axxul le umaane siinit akah tekkem, yooy sin Dageltah yaniih gita sin beyak sugehiyya cabteenimih sabbata. Tamah isinnih isinnil bahten umaane.

¹⁸ Taway Masri fan gexxaanam maca siinih xiqelem siinit celta? Masri mara lih bica akah abteenim, Niil weeqaytuk taaqubeeni'gidi maay kinni? Assuuriyah rasu akah gexxaanam faxxaanam macaay? Assuuriyah mara lih bica akah abteenim, Furaat weeqaytih lee taaqubeeni'gidi maay kinni? Toh kaadu siinih xiqtam mali.

¹⁹ Abten-umaane siinil aduurele. Yoo hawweenak abak sugten dambi sin abbixele. Yooy sin Dagelta kinnihiyya maaqiltaanaah imaan yol hee waytaanam, biyaakak leh gide baritettoonuuh aaxigetton. Tah intam yoo YALLAY Dagelta kinnih, Nabaamak Nabahiyya.

ISRAAYIL MARI YALLIH AFTOK GERSIM YUQBUDE

²⁰ «Israayil ummatey, yi yab dumaak cinten. Yi amri cinteeniih, ‹Koo manaqbuda› inten. Too waqdi qaleelah amo kee kaxxa cooxih gubal, niqmat neh baahele akak intan duyye qibaadat gacak, dalwa abten.

²¹ Nabam meqe caxay kulsa le qinab akak yaabukeh innah, dooren maray kulsa lehiyya sin abe'mmay, a saaku qamal akak yoome maray yi yab oggole waahiyya tekken.

²² Edde asseenih tanin dambik faxeemit kaqaltan way mataahirrowtan. Abten dambih wasak, faxe saabunut kaqaltaanamah, sin macaba. Abten dambih nadaysa uxih yi garil tan. Tahat yabtam yoo YALLAY mulki lehiyya.

²³ « ‹Away nadaysa leemit maasinnino› elle intaanam mannaay? ‹Baqal deqsitta rooci sinni duyye maqbudinnino› mannal intan? Goloh addal abten dambi isinnik maay taaxigen? Taaxigeenih. Abtaanam isinnik maay tablen? Tableenih. Maatah tan ala tekken.

²⁴ Alá rakub isil radaamih fayxih xobbaaqak teneek ecella 'ta way nokka 'ta. Sarrak rakub teetil radam faxaamah kaa mataqbissay qaadilih nokka kaah inta.

²⁵ ‹Israayil ummatey, Yalla akke sinni duyye taqbudeeni'gidih ib-qassih magexina. Katla isinnik foyyah makafsina› 'yaanam siinik exce'mmay isin, ‹Aleeyyah, ahaysa manaduura. Marin mari yaqbudem naqbudem kicinnoh, akak maraqna› 'yaanam inten.

²⁶ «Anu siinik axceemih: Garqi, garqot kaa yabbixen waqdi, qaybit elle rada'nnal, Israayil maraw, isin kaadu takkeenimik qaybit radetton. Sin kee sin malikiiy sin doolatak kaxxa mara kee sin seekaay sin nabuwwa inkih qaybit radele.

²⁷ Yoo fan tafkuneenimik, darre yot cabteeniih, caxak, ‹Ni-ina› intaanaah, xaak, ‹Ni-abba› intan. Takkay immay gibdaabini siinit yakke waqdi, ‹Yallaw, nel uduuray nee wad›, yok intan.

²⁸ Anu siinik axceemih: Yalla akak intan duyyey isinni gabak bicisseenihiyya ankel tan? Ta duyyey yalla akak intaanahiyya mangah sin magaaloolik madagok, gadaamittaanaah caalat siinil uma waqdi, sin akah cate waytam macaay? Sin edde wadan dudda maay lon?

²⁹ YALLI Israayilik iyyaamah: «Yi yab cina mara tekkeenih taniiniih, weeqah yok litoonum macaay?

³⁰ Duma sin mara digaaleh immay too digaalat maaduurinnon. Umaanek sin gacsam faxeh immay taduuroonu cinteenih. Sin fan ruube nabuwwal, qansaritta lubooka tekkeeniih seefit sella ken hayten.

³¹ «Siinik axcem yok toobbeenik sin esseru waak ankacisay! Anu bacarih tan baaxoy num bakaarak elle waddiime waa, siinil ekkem maa saakuu? Ditey baaxo akah able waytaanahiyya siinil ekkem maa saakuu? ‹Ahaysa currik yan mara kinninooh; ninnih fanxem abenno ikkal, ku fanah manamaata› 'yaanam akah intaanam macaay?

³² Sugay, qibna fillí-bila hawwentaa? Qad-qari-qibna teetih baahen bila cabba hayteh qad-qari orobtaa? Moorobtam kulli num yaaxige tiya. Yi maraw, isin hay loowo akak igmon ayroorah gide yoo hawwenten.

³³ Gabak bicisseenih taqbuden duyye kaxxam kicinton. Sayyok inkih qamal umaaneh lafitta inta barra kinni way uma-taamah sin meelelta.

³⁴ Xagarat liton sartan tu-maleela kee umaane sinni marih qabalat isinnik bayisseenim matablan. Masaakiina akke waytek, umeynitil bahtaanam manton. Tonna'mmay ta axxul le umaanet taniiniih,

³⁵ ‹Umaane mabna; Yalli nee maniqba› 'yaanam intan. Abten dambi yengedde mara kinnitoonuuh; tohuk gexxaamah sin akah digaaleyyo.

³⁶ Cubbuse wayti kee baaqid sinnak gexxaamah, edde sugten caalat korisseenih. Assuuriyah mari sin akah wacarroyse innah, Masri mari kaadu sin wacarroysele.

³⁷ Masri addak wacarriyih gamoomak awqetton. Anu isin elle teemenen mara siinik cineh. Tonnal oson siinih tu xiqe waa mara akkelon» 'yaanam YALLI siinik iyya.