Ermiyaas 19 - NABUWWA KEE MALIKWA

YIDDIGILLE BUUTIH CEELALLO

¹ YALLI yok iyyemii, «Gexay kallak bicsen buuti xaamay bah. Ummattak idoola kee seekah abbobtih yan mara gabat bah.

² Ken lih gacca 'xicay Galqi deqsitta afaak, Hinnom Golo deqsita arac fanah gexa» yok iyye. «Tokke gufta waqdi intaamahaa,

³ ‹Yuudâ-malikwa kee Yarusalaamal yan maraw, YALLI siinik iyyam oobbeya. YALLAY Nabaamak Nabah, Israayil doore Dagelta kinnihiyya a baaxol ibaak gibdi balay yaabbe marih xagarak xoq qiddahiyya siinil ruubeyyo.

⁴ Macaay inteenik, yoo maaqilteeniih, yot darre cabteeniih, yalla axcuk taqbuden duyyey xeet kee cooxuk bicseenihiyyat baaxo wasak abten. Taham duma sin kaxxa abbobti aaxaguk sugtem hinnaay; isin, Yuudâ-malikwak, kaadu aaxaguk sugteenim hinna. Tohuk kalah kaadu, a baaxo tu baahe wee marih qabalat bayissen.

⁵ Baqal akak iyyaanamay taqbudeenihiyyah isinni lab-xaylo sadgatah elle qiddan arooca bicissen. Too aroocak bagul isinni xaylo sadgata axcuk nuwwih girat carrissan. Annah taniimit asettoonum way makkalinniyooy, way kaadu aba siinik excem hinna. Inkinnah afak edde yaabem hinna.

⁶ Tonna'mmay a arac migaaqah Toofet madeqsitaay Hinnom Golo madeqsita. Takkay immay, Masgaadâ-Golo deqsitele. Too ayroora gitat tan.

⁷ « ‹Ta aracal Yuuda kee Yarusalaam mari abba haa mala keenik foyya abeyyo. Ken naqboytit qeebih keenik aysiiseyyo. Carbit ken qidsiiseyyo. Raysa keenik guma kee garboh alluwwah maaqo abeyyo.

⁸ Yarusalaam magaala kaxxa baatih bayseyyo. Tet yabalu waa mari teetik akah sakkitta 'ya biyaakah tet biyaakeyyo. Gari akak gaceh gexa mari, «A magaalat tekkem gibdiimih taniimi» akak inxicca 'yan baati teetit abeyyo.

⁹ Ken naqboytiitiy ken selam faxxahiyya keenit ruubeyyo. Too mari magaala marot keenik heeleeh, akak yawqen afa mageyan. Tohuk gexxaamah xaleena xaylok cado akmele. Mari marin cado maaqoh keenik akmelem keenih waris› » yok iyye.

¹⁰ Qagseh yok iyyemii, «Too yaabak gaba kalta waqdi, tama ko'lih yan marak foocal ama buuti iggil.

¹¹ Sarrak keenik intamaa, ‹YALLAY Nabaamak Nabahiyya siinik iyyamaa, A mara kee a magaala tama buuti elle yiddigille innal aggileyyo. Yiddigille buuti wadir bicsaanam mabictaay; tonnah kaadu ta mari sarrah sinam akah akke waan innah keenik abeyyom keenih waris. Rabe mara elle yaaguqen arac wayya heenih Toofet bagul aaguqelon.

¹² A magaala kee teetil yan mara Toofet innah heeyyo. Tahat yabtam yoo YALLA.

¹³ Yarusalaam magaalah qarwaay, malikwâ qarwa kee magaalal enna 'ya marih qarwa, nadaysa akah takke innah abeyyo. Too qarwah amol, yaqbuden cutuukah qaydarus ruubak sugen. Mango qaynatih duyyey yaqbudeenihiyyah amol, qibaadah qinabak bicsen kamri caxak sugen. Tonna leemiik too qarwa inkih nadaysa akah takke'nnah absiiseyyom keenih waris› » yok iyye.

¹⁴ Too yaabay YALLAK yol oobehiyya Toofet deqsita aracal warisak sugga exceh, gaba kale waqdi uduureh. Uduure waqdi, Yallih Qibaadah-Qarik daaratal solla exceeh, inkih tan ummat lih yaabe.

¹⁵ Keenik excemii, «YALLAY Nabaamak Nabah, Israayil doore Dagelta kinnihiyya siinik iyyam ankacisa. ‹A magaala kee teetil yan maraay tet dariifal tan magaaloolil yan maral, duma siinil oobiseyyo exce balak tu macabay siinil oobiseyyo. Keenil akah oobisu waam, yi yab aabbe waah aba keenik excem abe waa mara yekkeeniih; tohuk gexxaamah, bala siinil ruubeyyo› siinik iyyah yan» keenik exce.