Ermiyaas 18 - NABUWWA KEE MALIKWA

BUUTI BICSA NUMIH BUXA

¹ YALLIH qangaray Ermiyaasal obtehiyya ah teeti. YALLI iyyemii,

² «Kallak buuti bicsa num yanik, too numih buxa gex. Tokkel warissu wayta farmo kol ruubeyyo» iyye.

³ Tokke gexe waqdi buuti bicsa numul emeete. Too num anu wokke emeete waqdi kallak buuti bicisak yoh suge.

⁴ Buuti akak bicsam faxa kallayti buutit meqe'nnal bice waam yuble waqdi, wokkek kalla heeh woo kallaytuk gersi buuti gersi qaynatal bicisah uble.

⁵ Too numih wagittot an waqdi, YALLIH qangara yol obte. Yok iyyemii,

⁶ «Israayil ummatak, tama num kallak abam, anu siinik abam maay duudaa? keenik inxic. Ama buuti bicsa num buuti akak bicsa kallak isih faxem elle aba'nnal, anu kaadu sin inni gabah addat liyooh, innih faxam siinik abam duudah.

⁷ Faxe doolat takkuu, faxe mara takku ken bayseyyo. Caxa ragidik elle siiban innal, ragidik ken siibeyyo. Finqa ken abeyyo.

⁸ Sarrak woo mari woo umaaney edde sugehiyyak yuduure kaa tekkek, anu kaadu exceemik aduureyyooh, abeyyo exceemik raaqeyyo.

^9-10 Hinnay kaadu, sin bicseyyooh siinih amqeyyo akak exce doolat kee ummat, yi amri cinna hayteh uma taamat assek, keenih abeyyo exceemik raaqeyyo.

¹¹ Tonna'mmay taway, Yuuda kee Yarusalaam magaalal yan marak, anu siinik abu waamih malat aniih, sin digaaleyyo siinik iyye keenik inxic. Edde yanin dambiy kulli way abaanahiyyak uduura keenik inxic.

¹² Takkay immay, ‹Aleeyyah edde nan gitak akah naduurem mannu. Yabti-cina kee uma-taamak ninnih fanxeh gide abenno› 'yaanam kok axcelon, yok iyye» iyye.

ISRAAYIL ISI DAGELTA CINTE

^13-14 YALLI iyyemii, «Israayil rasul ahayduma akke waytem tekkeh tan. Lubnaan rasul tan qaleelah amol arroqle kibuk suge wayta ayro masuginna. Woo qaleelah baguk lee darah oobe wayta saaki masuginna. Annah tanim kulli way taniimiiy qusbam hinna. Yi marah tu gactek, qusbaamay ceele waytahiyyat aseh yan. Ahayduma sinam abe wayteeh, aabbe wayteemit aseh yan. Toh macaay inteenik, Israayil mari edde asem, uma yabulih taniimi.

¹⁵ Yi mari yoo cabba heeh tu xiqe sinni gabak bicsen duyyey yallah loonuh qaydarus ruuban. Meqe gitay kataate raareenihiyyak, too duyyeh qibaaday edde yaniini ken raaqisseeh, makot ken beyte. Ken kaxxa abbobti kataatak sugte gita cabba heenih, makot yan gitat gexaanam dooriten.

¹⁶ A baaxo akak meysitan baaxo akkele. Teetit tekkem yabalu waa mari ken sabbatah tet burtele. Gitah teetik xaqu gaceh gexu waa mari ah yable waqdi wariggitele. Ahamal qagabsiteloonuuh, namma xabanal gaba hayya heenih ‹A baaxot tekkem, gibdiimik tanih tan!› axcelon.

¹⁷ Ayrô-mawqa le kabuk silsa caacay siisa gabat elle beya'nnal, inni mara, ken niqbah yan naqboytiitih foocal tonnal beeyyooh, fixixiseyyo. Too bala keenil oobisu waa waqdi, darre keenit cabeyyooh, ken able waah innah gaceyyo» iyye.

ERMIYAASAL UMAANE HAANAM FAXEN

¹⁸ Too waqdi ta mari iyyeemih, «Ermiyaasak tuk teena abnam nel tan. Nek faxxintaah nel tanim neh warissa seeka taniih, kasloytiitiy fayu neh yacee kaadu linoh. Yallih farmo neh warissaamak kaadu nabuwwa tanik, Ermiyaas tiyak tuk teena innaama. Usuk axcinnaanim aabbe waynaama» iyyen.

¹⁹ Too waqdi anu kallaci abeeh exceemih, «YALLAW, yi kallaci oobbey! A mari yol baaham faxa umaane yok cubbus!

²⁰ Maqaane abe numul umaane gacsaanaa? Keenih abe maqaanel, galtoh edde rada boodo yoh dagan. YALLAW, ku bagcarra ken biyaktaamak, ken taagah ku foocal abe kallaci yok taaxigeh.

²¹ Tahaysa, YALLAW, xaylo keenik qulul gadda ab. Carbit ken sel. Agabu keenik xalay-maleela kee gubun ab. Labha keenik dalkat selli hay; furrayna carbit keenik sel» 'yaanamat emeete.

²² «Anu edde rada'gidih, boodo yoh dagaanamat yaniiniih; garciik edde rada'gidih, oflo yoh heenih yaniini'mmay, oson cube'kal, buxa keenik buuba mara keenit rub. ‹Woyyow, net tekkeemow!› axcuk ken weeqis.

²³ YALLAW, yoo qidaana'gidih aban mala atu taaxige. Ta umaaney yot abaanam faxaanahiyya keenit macabin. Aban dambih ken digaal. Isik foocal irimbi selte caxa ken ab. Bagcarritta waqdi, keenih maracmatin» exce.