Ermiyaas 17 - NABUWWA KEE MALIKWA

YUUDÂ-MARI ABE UMAANE KEE WOHUK GEEN DIGAALA

¹ YALLI iyyemii, «Yuudah-ummatey, isin edde tanin umaane birti-kalamat tunkuttubeh tan. Afqadok bagul siinik tunkuttubeh tan. Edde tankuttubem, birti-kalamay af akak gibdi-xaak yanihiyya kinniih; elle siinik tunkuttubem, afqado kee sadgat-bagul-akak-abtan-arooca.

^2-3 Sin mari silal le cooxih xaqul kee, koomaamih amo kee dululuh tan baaxol yan qaleelah amol, say-yalla akak iyyan Aseerâ migaaqal soolisen gurumuuda kee tet qibaadah xisen arooca yaqbuden. Edderra hayteenim kee maaluk elli haytaanam, a baaxoy siinih aceehiyyal abten dambih sabbatah, sin naqboytiitih gabat sin aysacawweyyo.

⁴ A baaxoy siinih eceehiyya akah cabtan innah siinik abeyyooh, aaxige waytan baaxol sin naqboytiitih naqoosa sin abeyyo. Toh siinit akah takku waytam, isin yot ugussen naqabih giray barge waytahiyya kinni» 'yaanam siinik iyye.

⁵ YALLI kaadu iyyeemih, «Yoo cinna heeh, sahdaytul yaamine numul yi abaaro oobele. Numtin qandel kibaal haa numul yi abaaro oobele.

⁶ Too num, bacarih tan baaxoy xagadak taniih kaftehiyyal tooboke caxa bis le. Tonnah yan num hebeltô-maqaane mageya.

⁷ Takkay immay yol yaamineeh kibaal yol haa num barkat geya.

⁸ Too num buyyi garil yuysubuken caxay ramid akak lee guftahiyyah bis le. Tannah tan caxa cagay yamaateemih makafta. Ayyuufi akak kulli way anxaxini. Qabar yabbixeemih makafta. Xaylo kulli way xalta.

⁹ «Kulliimik muxxi mako kee duquurisiyya lem, sahdayti-afqado. Toomeh taniih; tet adda taaxigem matan.

¹⁰ Takkay immay sahdayti-afqadot tanim taaxigem, yoo YALLA. Sahdayti afqado tacsubeemik magarcita. Kulli numul le qamalih innal mekla; kulli numuk abto elle tan innal kaal mekla» iyye.

¹¹ Qagseh, «Lakqo gita-maliinol geya num naala xale waa kimbiirih bis le. Tonnah yan num qumrik garabah yamaate saaku, gaddaliinok luk suggu 'yeemik foyyal raaqa. Ellecabol duqur yakke» iyye.

ISRAAYIL KIBAAL ELLE LEM YALLA

¹² Ni Qibaadah-Qari, dardaarinni korsiy nabna leeh dumal elle fayya 'ta qaleh amol sugtehiyyah bis le.

¹³ YALLAW, Israayil ummat kibaal elle lem koo. Koo bursutta haa mari inkih qawratak radele. Kooy sila le leeh raceynah yanihiyya cine mari siisâ-bagul yuktuben migaq akkelon.

ERMIYAAS ABE KALLACI

¹⁴ Too waqdi YALLAK excemii, «Anu candu akah gacsam dibuk kook, YALLAW, yoo wad. Atu yoo waddek, waddiimeyyo. Yoo urus; atu yoo urussek, ureyyok.

¹⁵ Ummatta yok intaamah, ‹YALLI duma net abak suge meysisso cabeh inna? Siinik abeyyo nek iyyem taway nek abay› iyyaana'mmay,

¹⁶ tohuh, anu ku taamah-loyna akkem macininniyo. A marat kaadu, gadaama takkem mafaxinniyo. Toh YALLAW, atu yok taaxigeh. YALLAW, anu axcem yok taaxigeh.

¹⁷ Gadaamita saaku wadbah liyom kook; cunxo yot maqidin.

¹⁸ Yoo xakaake kala mara qawratak qid. Takkay immay yoo qawratak maqidin. Cunxo keenit qid; yot cunxo maqidin. Gadaama keenil oobis; rike rikeh kuramkuruumaanam fan bala keenil rub!» 'yaanam exce.

SABTI YALLIH AYRO

¹⁹ YALLIH qangara yol obteeh; yok iyyemii, «Ermiyaasow! Gexay magaalak Yuudâ-malikwa akak cultaah akak tawqe afay Ummattâ-mawqa deqsittahiyyal, solla xicay yi farmo ummatah waris. Sarrak Yarusalaam magaalak sinam akak cultaah tawqe afoofih fanah inkih, gexay kaadu tokkel waris.

²⁰ Keenik intamaa, ‹Yuudâ-malikwa kee Yuudah-ummat kee Yarusalaamal tan ummatak, YALLI siinik iyyam oobbeya.

^21-22 YALLI, sabti-ayro ta magaalal duyye ukkuqqa hayteenih magaalah adda maculusina. Isinni buxaaxik kaadu duyye quukah afah mabena. Mano siinik tamqem faxxeenik, sabti ayro qiidih asaay, mataamitina. Sabti ayro taahirik tan ayro kinnuk mataamitina, 'yaanam axcuk, dumaak sin kaxxa abbobti akah amriseh sugeeh; a saaku sin akah amrisa'mmay, sabti ayro taahirik tan ayro kinnim aaxaguk, taama maabinaay qiidih asa.

²³ Duma sin abbobtik tamah exceh suge'mmay, too mari yab yaabbeeh iyyeenim oggola marak masuginnaay, yi yab cineenih. Anu aba keenik excem moggolinnon.

²⁴ Takkay immay ta saaku yan maraw, isin yi yab oggolteenik, wohoysa kaadu, sabti ayro a magaala duyye merraytul culuse wayteeniih sunkul baahe wayteenik, tonnah kaadu, sabti-ayro taahirik tan ayro kinnim ixigga hayteenik, too ayro hebeltô-taama abe wayteenik, buxal qiidih asseenik,

²⁵ tonnal, Dawud qarkaytol tan malikwa kee ken gubal tan reedon, Yarusalaam magaalat culla bukka abelon. Malikwa kee malikwâ-gubal yan mari, faras-gaarit gacca 'teenih, Yuudâ-mara kee Yarusalaam mara wakalih haysitta hayteenih, teetil meekitetton. Yarusalaam magaala daayiman dabaaqah teetil gaca mara mawayta.

²⁶ Yuudâ-magaalooli kee Yarusalaam xaqul tan gaandoodi kee, Benyam rasu kee ayrô-culmat raqta mango koomaami le baaxo kee, qaleelâ xaqu kee gabbi-qaxat raqta Yuudah baaxok, ummat Yarusalaam fanah amaatelon. Cado akak carrisan lac kee akak carrise waan lac, sadgatah yi Qibaadah-Qarih baahelon. Tonnah kaadu, daro kee qaydarus sadgatah baahelon. Fayla yoh elle gacsan sadgat kaadu baahelon.

²⁷ Tonna'mmay yi yab oggoltaanam siinil taniih, sabti ayro taahirik tan ayro kinnim taaxigeenim siinil tan. Too ayro Yarusalaam magaalah afaak magaalah adda duyye merraytul culuse waytaanama. Sunkul culuse waytaanama. Takkay immay yi yab cinna hayteenih culussen sin tekkek, Yarusalaam akak culan afat gira ruubeyyo. Too gira malik qarit gexeleeh, sarra num tet mabargusa, siinik iyyah yan› keenik inxic» yok iyye.