Ermiyaas 16 - NABUWWA KEE MALIKWA

YALLI ERMIYAASAK FAXEEMI

¹ Ermiyaas kaadu qagseh iyyemii, «YALLIH qangara yol obteeh yok iyyemii,

² ‹Annah tan baaxol madigibinaay xaylo maxalin.

³ Akkel yaabaku waa urru kee ken xaleenat takku waytam koh warisu waa.

⁴ Kaxxa dalka keenit ruubeyyooh; too dalkat ambaxelon. Keenih rookitaah ken yaagaqu waa mara mageyan. Raysa keenik guddaafah innah qangalaylak cabelon; yakkuqe num mageytima. Carbit rabe kee qululuh ambaxi akkelon. Lafa keenik haada kee garboh alluwwah maaqo akkele.

⁵ «YALLI qagseh yok iyyemii, ‹Sahda elle rookitah table qari maculin. Faxe numih rabah marookitin. Anu ahak wadir a marak inni barkat kaleeh, keenih luk suge kacanuk raaqeeh, keenih maxuwaawa.

⁶ Gaddali kee baacoyti keenik inkih, ta rasul elle rabeleeh, num keenih marookitaay, num ken mayaaguqa. Ken rabih rookah isi xagar num masalliyaay amo isik num mamoola.

⁷ Kicinuk sugen num rabaamah, taqdiyyah sinam tittal matamaataay, rabe numih rabeynah maaqo titta lih mayakman. Numuk ina kee abba rabtaamah, taqdiyyah kaal yamaate num mageytima.

⁸ « ‹Xigla addal akak aban buxa maculin. Maaqo ken lih maxagin. Ken lih maaqubin.

⁹ Yoo YALLAY Nabaamak Nabah, Israayil doore Dagelta kinnihiyya ta maral baahu waam koh warisu waa. Kaxxa farcat kee asalay abak sugeenihiyya ken cabsiiseyyooh, digiibal farcih abak sugen qililo kee digir ken waysiiseyyo. Taham isin addunyal anih akah abletton.

¹⁰ « ‹Taham atu keenih warissu wayta waqdi, «YALLI annah tan kaxxa digaalah nee akah digaalam faxam macaay? Maca kaal bahnee? Sugay noysommeeh, ninni Dageltay YALLA kinnil bahnem macaay?» 'yaanam kok axcelon.

¹¹ Too waqdi keenik intu waytaamah: YALLI siinik iyyaamah, Dumî dabaanal isin akak radden sin kaxxa abbobti yoo cabba hayteh gabak bicsen duyye aqbuduk sugen. Yi yab kee anu keenik aba exceemit maqal mahaysitinnoonuuy cinak sugen.

¹² Siinih tu gactek, uma-taamah isinni kaxxa abbobtik lafittaanaah, yi yab yaabbe num siinit mayanaay, yabti-cina kee uma-taamah-abittoh num numuk siinik mayaysaay inki bis liton.

¹³ Tonna leemiik a baaxok sin ayyaaqeyyooh, duma sin kee sin kaxxa abbobtik num aaxaguk suge wee baaxo fan sin ruubeyyo. Tokkel bar kee laqoh yi aftok xeet kee cooxuk bicsen tumamme aqbudetton. Tahak wadir yi kabuk siinih racmataanam gaba kalteh, 'yaanam keenik inxic› yok iyye» iyye.

SEEWAH KEN BEEN BAAXOK ADUURELON

^14-15 YALLI kaadu iyyemii, «Ahaysa ummatta, ‹Waara YALLAY Israayil ummat Masrik yeyyeeqehiyyah migaaqal xiibinna› 'yaanam duma axcuk akah sugen innah, m'iyyaanay; ‹Waara YALLAY Israayil ummat kilbat le kabut raqta baaxo kee, wohuk kalah tan baaxo baadissaay wadir ken gacissa heehiyyah migaaqal xiibinnah nan› edde iyyoonu waan ayroora amaatele. Macaay inteenik, away ken baadiseh immay sarrak, ken baaxoy duma ken kaxxa abbobtih ikoytah eceeh sugehiyya fanah ken gacseyyo. Tahat yabtam yoo YALLA» iyye.

TAMAATU WAYTA DIGAALA

¹⁶ Kaadu qagseh iyyeemih, «Mango kullum-tabbaxo ken tabbixe'gidih keenit ruubeyyo. Mango admo-abeynit ken tabbixe'gidih keenit ruubeyyo. Too mari qaleelah amot ken macabaay, koomah amot ken macabaay, gablah addat ken macabaay forqot ken macabaanay, ken selelon.

¹⁷ Macaay inteenik, yok qellittam matan. Oson aban dambik magarcita.

¹⁸ Oson aban uma-taama kee dambil namma addah taduure digaalah ken digaaleyyo. Macaay inteenik, baaxol yok umâ-yabulih-tan-duyyey rooci sinnihiyyat wasak aben. Woo duyye yalla axcuk yaqbuden» iyye.

ERMIYAAS YALLAH ABE FAYLA

¹⁹ Too waqdi anu excemii, «YALLAW, qande yot haytam koo. Umaanek reebu yoh takkem koo; gadaamak eleelitam koo. Baadal tan ummatta baaxô-maggaraqak koo fanah amaateleeh, ‹Ni kaxxa abbobti tu xiqe sinni xeet kee cooxuk bicsen duyyey yalla 'yeenih yaqbudeenihiyyak sah gabat midirih tu luk masuginnon.

²⁰ Sahdayti isi Dagelta isi gabak bicsam, bictam hinna'mmay, ni abbobti toh abak sugte. Gabak bicsen duyye Yalla matakka› 'yaanam axcelon» exce.

²¹ Too waqdi YALLI iyyemii, «Hay tonnal, a mari sarrah yi xiq kee yi cayla yeexegeenih akah raaqan innah, YALLA kinniyom ken aybulleeyyo» iyye.