Ermiyaas 15 - NABUWWA KEE MALIKWA

YALLAK YEMEETE GACSA

¹ Tohuk lakal YALLI yok iyyeemih, «Muusa kee Samuwel akkel yi foocal solla 'yeenih ken qaadah yoo kallacaanamah, a marih tiya keenik oggolak mananniyo. Away yi foocak wonnah ken rub; wonnah yok gexa keenik inxic.

² ‹Anke genxoo?› kok iyyeenik, keenik intaamah, YALLI iyyem ah teeti: Sahdak garab dalkat siinik ambaxeloonuuh, tonna leemiik tokke gexelon. Sahdak garab carbit ambaxeleeh, tonna leemiik too mari tokke gexele. Sahdak garab qululuh ambaxeleeh, too mari kaadu tokke gexele. Garab kaadu marin baaxo seewah beelon.

³ Yoo YALLI ta affaraamay ken bayissu waytahiyya keenil ruubu waamal gaba kaleh an. Carbit rabeloonuuh, ginaada keenik kuuta hirriigiseleeh, qambil gadda akkele. Wohuk raqtem garboh alluwwa akmele.

⁴ Ciskiyyaahû-baxi Manasse, Yuudal malikih yen saaku abe umaanek gexxaamah, baadal enna 'ya mari anu siinil baahem yaabbu waa waqdi, kaxxa wariggah wariggitelon» 'yaanam yok iyye.

YALLI YARUSALAAMAH ABE QAADIYYA

⁵ YALLI iyyemii, «Yarusalaam marak, aham siinit takke saaku, siinih xuwawtu waytam iyyay? Siinih rookittu waytam iyyay? ‹A marat tekkem macaay› axcuk, dagooh gide kinni way sin essera mara maay geetton?

⁶ Yoo cinteeniih; isinni uma taamat wadir tuduuren. Tonna leemiik gaba siinil qideh sin bayseyyo. Wadirih siinih xuwaawam maaba.

⁷ A rasul enna 'ta magaaloolih addal, caacay bee caffa sin abeyyo. Yi maraw, edde tanin uma taamak taduureenim cinteeniih; tonna leemiik xaylo siinik qideh sin bayseyyo.

⁸ Gubuunuh raaqe agbi mangah baddi afih qiddeytak aymaggeyyo. Oson xalen furrayna qidaana'gidih, qado loqo naqboyta keenit ruubeyyooh; inanti keenik rookitele. Cube'kal akak cunxittan umaane siinit ruubeyyo.

⁹ Xaylok malciin le inak malciin rabeleeh, is wariggah qawlele. Laqo bari bis teetil akkele. Sinam burutta barray kulli way niya akak baxaqta akkele. Rabak raaqu waa mara keenik carbi gadda abeyyo. Tahat yabtam yoo YALLA kinni» iyye.

ERMIYAAS YALLAL WEEQE

¹⁰ Ermiyaas iyyemii, «Woyyow yi nabsow! Yi-ina yoo akah xaltem maca? A baaxol yan mari inkih wiilih yoh yan. Abuuduh tu akak bee num mayyuuy tu akah ecee num mayyu'mmay, tohuh kulli num yi abaarot yan.

¹¹ YALLI yok iyyemii, ‹Meqem koh abuh koo cateyyo. Naqboytit gibdaabina kee boola ken tabbixe waqdi, kallacih elle tamaate num koo abeyyo. Taham koh abeyyom koh diggoysa.

¹² Tonna'mmay birta gabah yaggilu duuda num mayan. Axcihiiy kilbat le kabuk yamaate birtay nacaas agleh lehiyya yaggilu duuda num mayanam ixig› yok iyye.

¹³ YALLI qagseh, yok iyyemii, ‹Yi marih duyye kee edderra heenim keenik beyu waa mara keenit ruubeyyo. Toh keenik akah abu waam, a baaxol aben dambih sabbata.

¹⁴ Oson aaxige waan baaxol ken naqboytiitih naqoosa ken abeyyo. Yi naqbi baruge wayta girah gide» yok iyye.

¹⁵ Too waqdi anu excemii, «YALLAW, anu elle ani'nna kee edde an caalat yok tableh tanik, yoo kassa haay yoo cat. Yoo qidaanam fanah tibba keenik maxcin. Yoo akah xaafaanam ku sabbat kinnim kassa haysaay, yoo xakaake kala marak cane yoh gacis.

¹⁶ Atu yok intam qangara qangarah kok aabbe. YALLAW, Nabaamak Naba Dageltaw, anu ku num kinniyo. Tonna leemiik ku qangara bagu yok ruffa hayta.

¹⁷ Yasuule mara lih asal kee digirit inni wakti mabaysinniyo. Ku amrih oggoluh, dibuk gacca elle exce'kkel, ableh an umaane naqabu yot qidde.

¹⁸ Hay ta gideh biyak yot akah yakkem macaa? Liyoh an dale yok akah ure waytam macaay? Cagay kafa buyyih innah, foyyal yoo cabtam maay faxxaa?» 'yaanam exce.

¹⁹ Too waqdi YALLI yol gacsemii, «Yol tuduurek, koo gacseyyooh, uxih inni naqasu koo abeyyo. Maqna sinni yaabat yaabe waytaah, sinaamah tuxxiq le farmo warissek, uxih yi nabiy akah sugteh koo gacseyyo. Ellecabol sinam elle tamaate numuy sinam fanah gexe waahiyya koo abeyyo.

²⁰ Nacaasak bicsen birtay xaggiime waa keenil akketto. Qeebi kot abe loonu'mmay, kok mayaysan. Anu innih ko'lih gaceyyo. Koo xagtu waytam matan.

²¹ Umeynit kee sarri-leelak anu innih koo cateyyo; inni dacayrit koo heeyyo. Tahat yabtam yoo YALLA» yok iyye.