Ermiyaas 14 - NABUWWA KEE MALIKWA

KAXXA QULULU

¹ YALLI qabar-giddinaamak Ermiyaasal oobise yab ah kaana.

² «Yuudah ummatta edde tanim rookitiyya; ken magaalooli edde tanim finqi adda. Yarusalaam ummatta gubbik bagul deerih gacca 'yeenih weeqat yanin. Yarusalaam mari catô-fayxih deero aban.

³ Gaddaleela buxal, keenih taamita mara leeh ruuban. Too mari leê-goranah dori elle yani'kke fanah gexaana'mmay, leey akah gexeenihiyyak baxaysiteenih yaduuren. Leeh been soor foyyah gacsan. Tohuh aban wacarriyik gexxaamah, fooca isinnik reebisan.

⁴ Robti waytih baaxo kaffa karacca 'ye. Tohuk gexxaamah, buqre aba marak niya tiddigilleh; aban wacarriyik gexxaamah, fooca isinnik reebisan.

⁵ Wayxex, taloole qaysoh waytih xalte baxa gubbil qiddeh cabta.

⁶ Dibookoli fayya 'ta ikkel gacca 'yeh wakrih innah habhabita. Qaysô-waytih intiita baaxo kaak matabla» iyye.

⁷ Ummatta too waqdi intemii: «Dambik toobinnek sarra, edde qagamqagitak sugne. Tohuk gexxaamah dambi nee yabbixem naaxigeh immay, YALLAW, isi nabnah taagah neh cab.

⁸ Israayil ummat kibaal elle lem kooy; gadaama neh tabbixe saaku, nee waddam kook, YALLAW, qibnaytu macah nel takke? Safarah gexak yamaate qibnaytuy inki bar xiineh gexa macah nel takke?

⁹ Sahda catam elle tigibdiye num nel tekke. Carbi addal boola le qaskariitay sahda catu duude waa nel tekke. YALLAW, ne'lih tanim naaxigeh, nanu ku mara kinninok, darre net macabin» iyyen.

¹⁰ YALLI tohuk a maral gacseemih: «Yok kudaanaah umaaneh abittok isinni nabsiyya maraaqisan. Tonna leemiik ken inqibeeh, aben umaane keenit macabay, ken akah digaaleyyo» 'yaanam iyye.

¹¹ Sarrak YALLI yok iyyemii, «Atu Ermiyaasow, ‹A marih taagah yoo makallacin.

¹² Soom kee dooqa abaanamah yol weeqaanamah, aban weeqa keenik moggola. Sadgatah cado akak carrisan saq qidaanamah, hinnay kaadu, dooqak keenih orobta'gidih daro yeceenimih, yi garil oggol keenik mali. Ken wadam hinnaay, carbi kee qulul kee dalkat ken seleyyo» 'yaanam yok iyye.

¹³ Too waqdi anu excemii, «YALLAW, Mulki le Dageltaw, nabuwwa, ‹Ahak wadir carbi mayanaay qulul mayan. Yalli a baaxo kulli waqdi amaanah xiiniseyyo nek iyyeh qahdi neh cule› axcuk, ummattah warsan» 'yaanam exce.

¹⁴ Too waqdi YALLI yok iyyemii, «Ama nabuwwa kinnino iyya mari sin lih edde yaabam diraaba. ‹Yalli nee ruube› 'yaanam siinik iyyaanaah, ‹Yalli wacyih woh nek iyye; ah nek iyye› iyyaana'mmay, toh diraaba. Anu ken maruubinniyo. ‹Wonnah yan saaku woh akkeleeh, ah akkele› axcuk keenih warsaanam tanim hinna. Isinni amok yeyyeeqeenih baahan yaaba.

¹⁵ Hay taway ta maray anu ruube weeh isinni amok eyyeqqa heeh, ‹Ahaysa carbih tanim mali; qulul kaadu mayan; toh Yallak noobbe yaaba› axcuk, sin lih yaabahiyyal baahu waam koh warisu waa! Carbi kee qululut ken qideyyo.

¹⁶ Oson toh akak iyyan mari kaadu, too qulul kee carbit ambaxele. Raysa keenik Yarusalaam magaalah gititteh xaqul qidelon. Lafa keenik yaaguqe mara mageyan. Taham kaadu, keenik kalah, ken agabu kee ken xaylot takku waytaama. Edde yanin umaanek keenih taguude digaala keenit abeyyo» 'yaanam yok iyye.

¹⁷ Kaadu qagseh iyyemii, «Keenik intaamah, ‹Yi maraw, isin uma mudumuh muddumtoonu waytaanaah, kaxxam biyaakittoonu waytaanam ableeh; tohuk gexxaamah, bar kee loqoh intik ximo yok caxittaah, kulli way siinih abah an weeqat an› keenik inxic.

¹⁸ ‹Afah ewqek, qeebit rabe marih raysa able. Magaala gexek, qululuh raba mara able. Nabuwwa kinnino axcuk suge mara kee seeka kabuk kabul gexak isinni taama abaana'mmay, tu mayaaxigan› keenik inxic» yok iyye.

UMMATTA YALLA KALLACTE

¹⁹ Ummatta Yallak inteemih, «YALLAW, Yuudâ-mara inkitanuuk cinah cintee? Siyon-mara tinqibeh edde cabtee? Akak ure wayna biyaakah nee akah biyaktam macaay? Amaan geennom nekkele'mmay, woo amaan mageytiminna. Biyaakak urennom nekkele'mmay, inkinnah akak cunxinna umaane nee tibbixe.

²⁰ YALLAW, dambi lem elle bahnem koo kinnim naaxigeh. Nee kee nek duma ni kaxxa abbobti edde asse dambi naaxigeh.

²¹ Isi nabnah sabbatah, darre net macabin. Yarusalaam magaalay ku dardaarinnih korsiy nabna lehiyya addal akak tani qaybik maqidin. Ne'lih abte qahdi duudus.

²² Faxe baaxoh mari yalla axcuk yaqbuden duyye rob mabahta. Qaran isih baaha rob mali. Ah abtu duddam koo kinnuk, niya elle linom, kooy ni Dagelta kinnihiyya» iyyen.