Ermiyaas 13 - NABUWWA KEE MALIKWA

SARÔ CEELALLO

¹ Ermiyaas iyyeemih, «YALLI iyyemii: ‹Gexay *baftak bicsen meqe-saro xaamma haay tikyah edde gac. Immay lee maxagisin› yok iyye.

² Too waqdi YALLI yok akah inxicca iyye'nnal, too saro xaamma heeh edde gace.

³ «Sarrak kaadu YALLIH qangara yol obteeh yok iyyemii,

⁴ ‹Gexay ama saro beyya haay, Furaat weeqaytuk xaqut tan forqoh fanat rub› yok iyye.

⁵ Toh yok iyye waqdi, gexxa exceh too saro Furaat weeqaytih xaqut tan xixxaq-forqoh fanat ruube.

⁶ «Waqlaak wadiril YALLI, ‹Gexay woo saro bah› yok iyye.

⁷ Too waqdi wokke gexeeh; woo saro edde ooqore forqok eyyeeqe waqdi, calagto tekkeeh, xagarat haanam luk masuginna.

⁸ «Tohuk lakal YALLIH qangara yol obteeh;

⁹ yok iyyemii, ‹Yuuda kee Yarusalaam marih kaxxiina, tama saroh innah heeyyo.

¹⁰ Oson umeynitiiy, amri yok cineenih. Yi yab aabbe waa maray isinnih faxam aba yekken. Sinam Yallih aftok taqbude tumamme, too marak kaxxih, yaqbude mara yekkeeni'mmay, tahak wadir tama saroh innah, hebeltô-tu'xiq-sinni-maray baaxot radehiyya ken abeyyo.

¹¹ Saro xagarat sartanah elle haan gurral, anu Israayil kee Yuudâ-mara innim abeeh, innil ken xayyooseh suge. Ken akah abem, yi migaq xagak yoo yassakaxxeenih faylisaana'gidi. Takkay immay oson woo mara makkinnoonuuy, yi yaabat maqal mahaysitinnon› 'yaanam yok iyye» iyye.

BUUTITTE CEELALLO

¹² Ermiyaas kaadu qagseeh iyyemii, «YALLAY Israayil doore Dagelta kinnihiyya yok iyyemii, Israayil marak intaamah, ‹Qinab-kamri edde haan buutitte akah bicsaanam, qinab-kamrik kibaana'gidi› keenik inxic. Too waqdi oson, ‹Toh timixxigeemi› kok iyyeenik,

¹³ keenik intamaa, ‹Yoo YALLI a baaxol yan marak Dawuduk raaqe dardaarinna le mara kee, seeka kee nabuwwa kee raqqa 'ye maray Yarusalaamal yanihiyya, kamrik baqqa heenih katla fan amma akah iyyan innah keenik abeyyo.

¹⁴ Too waqdi kibuk tan buutitteh innah tittat ken bodsiiseyyo. Tittin gabat ken qidsiiseyyo. Qunxa num kaxxa numut ruubeyyooh, tittin gabat ken qidsiiseyyo. Keenih maracmataay keenih maxuwaawam keenih waris› yok iyye» iyye.

YALLAK YEMEETE GARCI KALOOTU

¹⁵ Ermiyaas iyyemii, «Ummatey, ankacisaay siinik axcem oobbeya! YALLI sin lih yaabahak, kaxxiina cabba haay kay yab oobbeya.

¹⁶ Laqô-bar siinil radaah dite elle radde qaleelah bagul tandafoofoleenimik dumal, YALLAY sin Dagelta kinnihiyya eyneba! Isin faxxan ifih aftok baaxo kaxxa dite siinil takkeemik dumal, kaa eyneba.

¹⁷ Takkay immay, yoh tu gactek, kaa aynabe wayteenik, anu uqurat weeqeyyooh, kaxxa weeqah weeqeyyo. Abah an weeqak yok caxitta ximo weeqi innah oobele. Too weeqa akah abu waam, YALLIH maray seewah marin baaxo beyoonu waanahiyya kinni» iyye.

¹⁸ Ermiyaas kaadu qagseh iyyemii, «YALLI yok iyyemii, ‹Ama malik kee kay inak elle tanin dardaarinni korsik ooba keenik inxic. Woh akah excem, oson amot lon dardaarinni kalabta keenik raddeh.

¹⁹ Yuudâ-magaalooliy gabbi-qaxat raqtahiyya marot heen. Tokke fanah edde yamaaten gita mageyan. Yuudâ-mara yakkeenimiik seewah beenih› yok iyye» iyye.

YARUSALAAMAT TAKKU WAYTAAMA

²⁰ YALLI iyyemii, «Yarusalaam maraw, wagitay! Naqboytit kilbat le kabuk siinit tamaate. Amo elle muquk sugten mari, a saaku maca abe? Sin maray kaxxam edde akkaluk sugteenihiyya anke gexe?

²¹ Kataysis takkalen maray qalla lih litoonuhiyya siinik iysiissa heeh, amol siinik heek, maca abetton? Biyaakah lacawat tan barrah innah gacettoonum taaxigeenimi.

²² ‹Ah inkih net akah tekkem macaay? Sari nek akah qanxixeeh; a axxul le biyak xagarat nek akah yekkem macaay?› bagul inteenik; toh siinit akah tekkem, sin dambih manga.

²³ Data num le bisu korsam mabicta. Kabqî-xagaral tan baraabarwa kattam bicta? Mabicta. Tonnah hay, siiniy umam abitto bartehiyya meqem abu maduuda.

²⁴ Bacarih tan baaxol silisa caacay caffa elle beya'nnal, sin beeyyo.

²⁵ ‹Sin ellecabo tamaha› siinik axce. Yoo cinteenih, gabak bicsen duyyel teemeneeniih; tohuk gexxaamah anu siinih malsem tamaha. Tah intam yoo YALLA.

²⁶ Inni gabaak xagaral liton sartan siinik kalla heeh, qasunuk sin cabeyyo. Qawratak sin qideyyo.

²⁷ Anu innih niqbiyom abah sin uble. Barril, koomaamih amol duyye aqbudih sin uble. Too duyye elle aninnaan ikke, cuggayti barrah dalwah kuula num elle kuula'nnal, isin kaadu too duyye taqbudeeni'gidih too duyye elle aninnaan ikke lakal gexxan. Danan oklô-lakal nikloh elle yarde'nnal, too duyyeh lakal tarden. Yarusalaam maraw, edde taniinim baatik, taahirrowtoonu waytaanam maa saaku?» 'yaanam siinik iyye.