Ermiyaas 12 - NABUWWA KEE MALIKWA

ERMIYAAS YALLAL ABE ESSERO

¹ Inni Dagelta lih yaabeeh excemii: «YALLAW, qadaalat le Dagelta kinnito. Yi Dageltaw, yot tekkem ku amol haysitu waa; qadaalat le cokmi yoh abettom aaxigeeh, mawaagisa'mmay, atu qadaalat elle abta'nnak uxih cede weemiy koo esseram faxa liyo. Uma-qamal-leela gaddaloola akah tekkem macaay? Aamanti sinni maral kullim akah bictam macaay?

² Yi Dageltaw, caxah innah atu ken daabisseeh; oson kaadu ragid baahen. Caxa saadda waqdi xaylo elle xalta'nnal, dadlaanaah xaylo xalan. Kulli way migaq kok ugsaanah immay, niya koo fan malon.

³ YALLAW, atu yoo taaxigeeh; abba haam yok tableh. Kacanuh koh liyoh gide kaadu yok taaxigeh. Hay, yi Dageltaw, a umeynit, masgaadah giitak beyan illih innal, yok ken eyxeer. Ken edde bayissu wayta ayro fanah, sahdak ken baxisay; ken deel!

⁴ Baaxo nek qabaarah kafte. Toobokeh sugte qayso kaffa karacca 'te. Lac yembexeeh, qaraanal haada haadaytih agantah tembexeh. Toh akah tekkem, tet addal yan mari aba uma-taama. Oson kaadu ‹Yalli nanu abnam mayabla› 'yaanam afak iyyan. Ta mara hay, ma waqdi digaaletto?» 'yaanam exce.

⁵ Too waqdi Yalli yok iyyemii, «Ermiyaasow, sinam lih qalaltu tefferek, faaris lih qalaltu mannal duudetto? Xeet sinni booxal tinnikissek, Ordon rasul tan garboh addat gexxu mannal duudetto?

⁶ Ku tooboko kee ku buxah mari ku naqboytit lih gacca 'yeenih koo ganaanamih addat yaniiniih qeebi kot abaanam faxan. Tonna leemiik meqe yab ko'lih yaabaanamah ken maamanin» 'yaanam yok iyye.

YALLI ISI MARA DIGAALE

⁷ YALLI iyyemii, «Anu Israayil marak obboodeh; innih doorite marat darre cabeh an. Ken kiciyyoh immay ken naqboytiitih gabal ken haah an.

⁸ Inni maray innih doorehiyya a saaku yi naqboytiitik maacisen. Garboh addat suge lubak yol yekkeeniih, tohuk gexxaamah yi naqabu yussukuqen.

⁹ Yi maray anu dooritehiyya, kimbiiriy qawi kulli kabuk maraasiytehiyya yekken. Alluwwa ken takme'gidih akah seeca.

¹⁰ Allî-baaxok yemeete reedon yi baaxoy qinab xala coox elle aabakuk sugehiyya bayseh. Yi baaxoy buqre elle aabakuk sugtehiyyak amot taqqa 'yeenih gexen. Yi baaxoy qax-muquk sugtehiyya, caxa elle aabuke wayta bakarroyta aben.

¹¹ Baaxo yok bakarroyta aben. Lac sinniih num sinni baaxo tet aben. Inkih yan rasi abuuruy sahda elle deedalta yekkeh; tohuk tu iyya mari mayan.

¹² Baaxo inkitanuuk bayisu waa mara ruubeyyo. Carbi keenit abu waa mara keenit ruubeyyo. Sinam buubu waa mari, gitah bakarroytah tan fayya le aroocaak gacak, wararah keenit amaatelon. Ahaysa amaan mageyan.

¹³ Buqreh kamadi qideloonu'mmay, daro orbah gacca 'ta saaku kamadih aftok keenan orbiselon. Yi kaxxa bagcarrak gexxaamah buqret kaxxam cawale loonu'mmay, akak orbisoonu waanam malon» iyye.

YALLI ISRAAYILIK DERAAFIL YAN MARAH ABE XAGNA

¹⁴ YALLI qagseeh kaadu iyyemii, «Yi ummatay Israayilih toobokehiyyah anu-ecee-baaxo foyya-abe-marak axcem liyo. Tohuu, too mari umeynitiiy; tonna leemiik away elle yanin baaxok, caxa ragidik elle siiban innal, ken siibba heeh ruubeyyo. Yuudâ-maray oson umam elle baaheenihiyya ken gabak ayyaaqeyyo.

¹⁵ Woo baaxok ken kalek lakal, keenih xuwaaweyyo. Kulli baaxoh mara keenik le rasuh gacseyyo.

¹⁶ Oson yi mari elle yaamine diinil baguuk yeemeneeniih, duma yi marak Baqal deqsitta duyyey yaqbudeenihiyyah migaaqal xiibita axcuk barisak akah sugen innah, a saaku toh cabba heenih, tohih aftok yi migaaqal xiibiteenik, yi mara ken abeyyooh; barkat keenit heeyyo.

¹⁷ Takkay immay faxe ikkekiiy yanoonay yi yab cineenik, ragidiik ken bayseyyo. Tah intam yoo YALLA» iyye.