Ermiyaas 11 - NABUWWA KEE MALIKWA

YALLIH QAHDI

^1-2 YALLIH qangaray Ermiyaasal obtehiyya ah teeti. «Qahdi qangara koh warisu waah, Yuuda kee Yarusalaam marak intaamah:

^3-4 ‹Yoo YALLAY Israayil doore Dagelta kinnihiyya, sin kee yi fanal yekke qahdi xagure waa mara abaareyyom keenih waris. Ta qahdi, anu ken kaxxa abbobti Masri rasuy urta gira keenil yekkehiyyak ken baahe saaku, ken lih hee qahdi. Too saaku, «Yi amri oobbeyaay anu siinik aba axcem aba» 'yaanam keenik exceh en. Yi yab oggolteenik, yi mara akkettoonuuh; anu kaadu sin Dagelta akkeyyo, keenik exceh en.

⁵ Tonnal hay, ken kaxxa abbobti lih niqmatak tan baaxo siinih aceeyyo axcuk abeh suge qahdi kulli way duudusah. A saaku kinni way keenik rade mari elle yanim too baaxo› 'yaanam keenik inxic» iyye. Anu too waqdi «YALLAW, numma kinnih» exce.

⁶ YALLI too waqdi yok iyyeemih, «Yuudâ-magaalooli kee Yarusalaam magaalah gititte fan gexay, tokkel yan marah yi farmo warisa. Titta lih hayne qahdil aba keenik excem aba keenik inxic» yok iyye.

⁷ Kaadu yok iyyemii, «Sin kaxxa abbobti Masrik baahe saaku, ‹Yi yab oobbeya. Yi amri oggola›, 'yaanam fiirik geerah keenik exceh eneeh; uxih a saaku fan a marak axcem tohu.

⁸ Takkay immay yi yab cineeniih baaqid edde mahaysitinnon. Kulli num keenik ken afqado keenil tecee uma taamat asen. Titta lih haysinne qahdih giddinaamak, ‹Siinik excem duudusa›, keenik exceh ene'mmay, woh cineenih. Tohuk gexxaamah a qahdi duuduse wayteenik, abeyyo-exce-digaala keenil abe» yok iyye.

⁹ YALLIH yab kaadu yol oobeeh, yok iyyemii, «Yuuda kee Yarusalaam mari yol malsah.

¹⁰ Ken kaxxa abbobtiy yi amri cintehiyya abak ten dambi, oson kaadu aban. Yalla akke sinni duyyey gabak bicseenihiyya yaqbuden. Israayil kee Yuudah ummat, anu duma ken kaxxa abbobti lih heeh suge qahdi yol makeenih.

¹¹ Tonna leemiik yooy YALLAH yani taway bala keenil ruubu waam naharal ken aysixxigeh ani'mmay, kudaanam faxaanamah mayasillimaanam yaaxigeenimi. Catoh yol weeqaanamah, keenik maabba.

¹² Anu too bala keenil ruubu waa waqdi, Yuuda kee Yarusalaam mari, ‹Ni rabbi› axcuk sadgat akah abakaay qaydarus elle ruubak sugen duyyeeya ken mawadda.

¹³ Yuudâ-mari yalla 'yeenih yaqbuden duyyek mangah ken magaalooli tikki 'tah gide lon. Yarusalaam mari kaadu umâ-yabulih taniimiy Baqal akak iyyaanahiyyah sadgat elle abaana'gidih bicsen arooca, mangah ken magaalah gititte takkeh gide takke.

¹⁴ Tonna'mmay Ermiyaasow, ta marih qaadah, dooqah gaba yol maruubin. Ken qaadah yoo makallacin. Gadaamitoonu waan waqdi, yoo kallace loonu'mmay keenik maabba› yok iyye.

¹⁵ YALLI kaadu iyyemii, «Yi maray anu kicinuk sugehiyya umam abam ableh anik, hay sugay, yi Qibaadah-Qarih adda culaanamih ruksat keenih teceem iyyaay? Nadri yoh culaanaah, sadgat yoh abaanamah, keenil obtu wayta bala isinnik cate loonum maay yakkalen? Tah ken ruffa haytam tekkek, abbaasitoonay.

¹⁶ Mango ayyuufa kee meqe xaylo xalta *daytuun caxah migaaqal keenih seecak suge saaku liyoh immay, a saaku qaraanak obte kakkaqoh anay le xongolot ken carariseyyo» iyye.

¹⁷ «Yoo YALLAY Nabaamak Nabahiyya duma Israayil kee Yuudâ-mara caxah innah uysubukeh suge'mmay, ta saaku bala keenil oobiseyyo. Toh keenik akah abu waam, umaamay dambi lehiyya baahaanaah, Baqal akak iyyaanamay yaqbudeenihiyyah sadgat abaanaah, naqabu yot culsan» 'yaanam iyye.

NAQBOYTIT ERMIYAASAH MALISSE MALA

¹⁸ Ermiyaas kaadu qagissa heeh iyyemii, «Yi naqboytit yoh malissa mala YALLI yoh warseh. Too waqdi eexegeh.

¹⁹ Yi naqboytit, ricidih beyan marqay is beyan ikke gexahiyyah innah, yoo qidaana'gidih yoo beyaanam faxaanam YALLI yoh warse. Anu toh aaxaguk masuginniyo. ‹Caxa saade'kal akah yargiqen innah, wadiriik kaa kase waana'gidih, a num a waqdiik qidnay› axcuk, yi qidimil malisak sugen. Anu ta umaanet yoh yaniinim keenik aaxaguk masuginniyo.

²⁰ Takkay immay toh eexege waqdi, inni Dagelta kallacak kaak exceemih, ‹YALLAW, Nabaamak Naba Dageltaw, atu cokmi qadaalatal aba Dagelta kinnito. Sahda tacsubem kee sahda niyat lem table'gidiiy kinnon mara keenik tasmite'gidih ken wagittah. Yol baahaanamak abtam atu isih taaxigeh. Kol cabah an. Yi Dageltaw, yol baahoonu waanamah, keenit abtu wayta digaala abali yoo hay!› axcuk xaaqime» iyye.

^21-22 Too waqdi YALLAY Nabaamak Nabahiyya yok iyyemii, «Qanatot mari koo qidam faxaah, ‹YALLIH migaaqal tu neh warissek koo qidenno› iyyaana'mmay, anu keenik abu waam ah teeti. ‹Tahah anu ken digaaleyyooh, furrayna keenik carbit seleyyo. Qunxa urru keenik qululuh qideyyo.

²³ Qanatot maral bala ruubu waa wakti xayyooweh yani'mmay, too saaku num keenik mawaddiima› 'yaanam yok iyye» iyye.