Ermiyaas 10 - NABUWWA KEE MALIKWA

NUMMÂ-QIBAADA KEE DIRAB-QIBAADA

¹ Israayil maraw, YALLI siinik iyyam oobbeya.

² YALLI siinik iyyamaa: «Sinam abtam maabina. Qaraanal duma able waak sugten asta tableenimih macunxitina. Sinam annah tan asta table waqdi cunxitaanam tableenimih, isin macunxitina.

^3-4 Macaay inteenik, a marih diini foyyâ-diini. Garboh addak caxa irgiqqa haanaah too caxa coox-ora-numul yaceen. Too num too caxa orra haah bicissa heek lakal, dahab kee lakqok bilan. Sarrak radaamak bismaarat aracak teenat daabisan.

⁵ Too cooxuy yalla akak iyyaanahiyya cabcab elle yooboke aracal, woo cabcab kimbir yakmeemik kimbir akak meysita'gidih, sartan edde hayya heenih sahdayti gurral soolisen caxxih bis le. Afak mayaaba; mayangayyaay magexa. Aracak arac ken beyaanam faxan waqdi, sunkul hayya ken heenih quukah beyan. Hay, siinil baaham maliiy siinih xiqam malik, akak mameysitina» siinik iyyah yan.

⁶ YALLAW, ku bis lem matan. Atu qande le Dagelta kinnito. Ku migaq nabna kee qande le.

⁷ Inkih tan ummatih Malikow! Nabna koh taguudek, koo assakaxxe waytam iyyaay? Addunyal kasah dareeman mara kee addunyal tan reeda le malikwak inkih ku bis lem matan.

⁸ Yakkeenimik inkih duquuraay; hawri akak gexe mara kinnon. Cooxuk bicsen duyyey yaqbudeenihiyya tu ken barissu madudda.

⁹ Galdaddaqin lakqo Isbaaniyah rasuk baahaanaah; dahab kaadu Uufad deqsitta baaxok baahan. Tonnal gabâ-naggaarinna le mari, lakqo kee dahab kee cooxuk yalla-'yeenih-yaqbuden-duyye bicsan. Sari cixxa yaaxige mari kuclinan kee qasdiimin sara bicissa heenih sartanah edde haan. Too duyyey yaqbudeenihiyya inkih bicissam, gabâ naggaarinna le mara.

¹⁰ Takkay immay YALLI numma Dagelta kinni. Waara Dagelti kaa; ambaxe sinni reeda le Malik kaa. Usuk bagcarrita saaku baaxo axaxittah. Kay naqabut koysita mari mayana.

¹¹ Too duyye yaqbude marak intaanamah, «Isin taqbuden duyye qaran kee baaxo magininna. Tonna immay isih bayak maaciseleeh, baaxo bagul maraagta» keenik inxica.

¹² YALLI addunya isi qandet gine. Isih leh yan ixxigat inkih yan baad yukluke. Qaran kaadu fidise Dagelta kinni.

¹³ Usuk amrisa waqdi, qaraanal tan lee kaxxa xongoloh xongolta. Baaxô maggaraqak qamburre bahtam Yalla. Rada roobih addat cankaxa qaraanak rubtam Yalla. Caacay daanah elle yabbixe aracak ruuba waqdi silisa.

^14-15 Tah inkih abalih, sahda xangi maleelay tut rade wayta tekke. Yalla axcuk yaqbuden duyye dahabak bicsa mari wohut wacarriyele. Oson bicsan yalla akak iyyan duyye anqaasah elle rabaanam ikkal, rooci leeh ufuy lem hinna. Ta duyye deedala'kkalah, tu xiqtam hinnaay tanim hinna; Yallih digaala tamaate saaku, baatu wayta duyye.

¹⁶ Yaqkuub doore Dagelti woo duyyeh bis le Dagelta hinna. Kullim gintem kaa; Israayil ummat ikoytah lem kaa; Kay migaq YALLAY Nabaamak Nabahiyya.

YALLIH MARA SEEWAH BEELON

¹⁷ Yarusalaam maraw, marot sin yabbixeenik, duyye gaaboysita.

¹⁸ Macaay inteenik, YALLI iyyaamah: «Away a baaxok ken xiiriyeyyo. Kaxxa gibdaabinay uma'nnah ken biyaakisahiyya keenil oobiseyyo» iyyah yan.

¹⁹ Yarusalaam-ummatta too waqdi weqteeh: «Woyyow ni nabsow! Uma mudumuh muddunneh nan. Nanu abnem akak uran mudum hinna» iyyen. Takkay immay bagul, «Ni biyaakal nasbirem nel tan.

²⁰ Siraq nek abuuruh raaqe; sirooqa edde soolisne akoota tiggiriqeh; xaylo nek baaxo cabteh. Ahak sarra siraq neh soolisa mari baaxol maraaqinna. Siraq golit sara neh takra mari maraaqinna» iyyen.

²¹ Too waqdi anu keenik excemii, «Nek saqoltih yan mari xangi-maleela kinnon. YALLAK, ‹YALLAW gita atu nee uybulluy› maxaccinnon. Ni marat ah akah tekkeeh, fixix ken akah yibbixem tohu.

²² Toh too tiya'mmay, away xaagi yemeeteh yanik oobbeyay! Kilbat le kabuk kaxxa waxxaqa kee deero aba mari yamaate iyyaana'mmay too mari yamaatu waa waqdi, Yuudâ-magaalooli bacarih gacissa heelon. Oson elle sugen arac wakri guub akkele» 'yaanam keenik exce.

²³ YALLAK kaadu excemii, «YALLAW, sahdayti gufe ikke isik mayaaxiga; isi mano yamlike num mayana.

²⁴ Tonna'mmay YALLAW, isi mara umaanek gacis. Abba hannaanimil nee makataatin. Bagcarritta waqdi digaalak nee cat. Abba hannaanimil nee katatteeh, bagcarritta waqdi nee digaaltek, wonnal baatik sa qamballam mannu.

²⁵ Abta bagcarra koo aqbude waah koo cine maral gacis. Too mari neey ku mara kinnihiyya qideeh nee sele mara kinnon; baaxo nek abur aben» 'yaanam exce.