Ermiyaas 1 - NABUWWA KEE MALIKWA

¹ A kitaabal tanim, Benyam rasuk Qanatot deqsitta magaalal dabqah yen Ermiyaas edde yaabe yaaba. Ermiyaas-abba sek Cilkiyya deqsita numuk ten. Too num dabqah elle yenem kaadu, seeka elle sugte Qanatot magaalak ten.

² Amón-Yoosiyaahu Yuudâ-rasul malik edde yekke taban kee sidochaytô sanatat, YALLIH qangara Ermiyaasal obteeh;

³ kaadu Yoosiyaahu baxi Yahoyaakim malik edde yekke saakuk xabba haanamaay, Yoosiyaahû-Xidkiya malik edde yekke saakuk taban kee inikhaytoh sanat tikka 'yam fanah, YALLI mango adda isi qangara kaal oobisak suge. Too sanatak konoyhaytoh alsat Yarusalaam-magaalal suggu 'ye mara seewah marin baaxo fan been.

YALLI ERMIYAAS SINAAMAK ADDAK DOORE

^4-5 Ermiyaas iyyeemih, «YALLIH qangara yol obteeh yok iyyemii, ‹Rooci kot hayyaay koo uysubukka haamak dumal elle, koo eexegeeh koo dooreh sugeeh; baadal tan ummattah yi qangara warissa'gidiiy, nabi takke'gidih, ummat addak a taamah yaguude num koo abe› yok iyye» iyye.

⁶ «Too waqdi anu Yallak exceemih, ‹YALLAW, Mulki le Dageltaw, anu innih qunxa num kinniyooh, elle yaaba'nna maaxiga› exce.

⁷ Takkay immay YALLI yok iyyeemih, ‹Qunxa num kinniyo 'yaanam maxcinay, koo elle ruuba mara fan gexettooh; anu kok axcem keenih warsetto.

⁸ Anu koo cata'gidih ko'lih aniih; num kot baaham mali. Tah intam yoo YALLA'mmay, keenik mameysitin› 'yaanam yok iyye.

⁹ Sarrak YALLI gaba yi fanah ruubeeh, feerah sokto yok xage. Too waqdi yok iyyeemih, ‹Edde yabtu wayta yab afat kok haah an.

¹⁰ Ummatta kee doolat ragidik edde siibtaah deerik afah ken edde korissaah edde ken bayissaah edde ken xise kee buxux keenik edde daabise takke qande kot heeh ani'mmay a saaku tama yab yok raaqis› yok iyye» 'yaanam iyye.

ERMIYAAS YUBLEEMI

¹¹ Ermiyaas qagseeh kaadu iyyeemih, «YALLIH qangara yol obteeh, ‹Ermiyaasow, taway tablem yoh warisey› 'yok iyye. Too waqdi excemii, ‹Taway ablem saakad deqsitta caxak ludda› 'yaanam exce.

¹² Too waqdi YALLI yok iyyeemih, ‹Numma kok. Anu kaadu edde yaabe yab numma elle yakke innih cubbusiyyat an› yok iyye.

¹³ Sarrak kaadu YALLIH qangara yol obteeh yok iyyemii, ‹Away kaadu maca table?› yok iyye. Too waqdi kaadu exceemih, ‹Laqa buuti yoh yambulle. Too buuti kilbat le kabuk nee fan qeegah ableh an› exce.

¹⁴ Too waqdi YALLI yok iyyeemih, ‹Umaane kilbat le kabuk a baaxol yan maral facak amaatele.

¹⁵ Macaay intek, kiblat le kabut raqta doolatwah seeco abeh aniih; too doolatwah amoytit a baaxo amaatele. Yarusalaam magaalak culmeynal dardaarelon. Yarusalaam magaalat maroh tan gasoosah dariifa kee Yuudâ-magaaloolit inkih qeebi abelon› 'yaanam yok iyye.

¹⁶ Qagissa heeh yok iyyemii, ‹Yi mari umaanet asa. Yoo cabba heenih yalla axcuk yaqbudeenimih qaydarus ruubaanaah; isinni gabak bicsen duyyeh qibaadat gacen. Tohuk gexxaamah ken digaaleyyo.

¹⁷ Tonna'mmay taway ugutay, anu kok axcu waam keenih warissa'gidih bical gac. Keenik mameysitin. Keenik meysitta intek, ken foocal kaxxa cunxoh akak cunxittam kot ruubeyyo.

^18-19 Yuudâ-malik kee doolat-abbobti kee seekaay, a baaxol yan mara inkih, naqboytit kok akkelon. Takkay immay keenit edde koysitta dudda koh aceeyyo. Ta saakuu, maro edde tan magaalay naqboyti cule waa kee, birtak aben qamidduy addigille waa kee nacaasak yan birtak xisen gasoy xaggiime wayta, koo abeh ani'kkal, num tu kol mabaaha. Faxe qeebi kot abaanamah, anu ko'lih ani'kkal, kot baahaanam malon› 'yaanam YALLI yok iyye» iyye.