Daaniyel 9 - NABUWWA KEE MALIKWA

DAANIYEL ISI UMMATTAH DOOQA ABE

¹ Meediya deqsita marah yooboke Daryawes Baabelon rasul malikih yen. Kay abba migaaqah Ekserkas deqsitak yen.

² Usuk edde reede naharsi sanatat, anu taahirik tan kitooba akrayuk, Yarusalaam abuuruh edde raqtu waytaamay YALLI nabi Ermiyaas lih edde yaabeh sugehiyyah acsubuk suge. Abuuruh malcina-tabanih sanat sugtu waytam uble.

^3-4 Too waqdi dooqa abeh, Yalla kallace. *Qabuddat sartanah gaccaay soomuh assa exceh, gomboduk addat daffa exce. Sarra abne umaanet yaabeeh, Yallay yi Dagelta kinnihiyya kallace. Exceemih, «Goytaw, atu naba Dagelta kinnito; nanu kok meysinnah. Koo kicna mara kee ku amri oggola mara lih abe bica xagura Dagelta kinnito. Woo mara lih lito kacni mayambaxa.

⁵ Nanu dambi le taamat asneh, mako lem bahne. Umam abneh nan. Koo cinneh, atu nek aba intem abnu cinneeh, gitak taniimiy atu nee tuybulleehiyya maaqilleh.

⁶ Ku migaaqal yabte nabuwway ku naqoosah tanihiyya, ni malikwaay ni miracwa kee ni kaxxa abbobtiiy ni ummattah inkih warissem cinneh.

⁷ Goytaw, atu kulli way cakkik tanim abta. Neh tu gactek, nanu kulli way qaybih aninnaanim ninnil bahna. Neey Yuudah yooboke mara kee Yarusalaam mara kee, tonnah kaadu, inkih yan Israayil maray xayi'kke kee xer ikkel yanihiyyay ko'luk yen imaan cabeemih sabbatah atu baaxot fixixih rubtehiyyak inkih, qaybit radnam numma.

⁸ YALLAW, nee kee ni malikwaay ni miracwa kee ni kaxxa abbobti dambi lem kol bahneemih sabbatah, edde nanim wacarriyi.

^9-10 Yallaw, ni Goytaw, koo cinneh ku nabuwway ku naqoosah tanihiyya Yallih xintol eemena axcuk ne'lih yabte yab oggole cinneh immay, atu racmatta kee qafu le Dagelta kinnito.

¹¹ Israayil mari inkih gitah taniimiy atu nee tuybulleehiyya maaqileh ku xinto intam abu cineeh ku yab cineh. Nanu dambi lem kol bahne. Tonna leemiik atu ku xintoy Muusay ku naqasuh yanihiyya baahel tunkuttube abaaro nel oobisse.

¹² Nee kee ni abbobtik abeyyo intem abteh. Yarusalaam magaala a addunyah bagul enna 'ta magaaloolik inkih digaalah lafteh.

¹³ Muusa baahe xintol warissa hayte digaalah nee digaalte. Takkay immay YALLAW, ni Dageltaw, nanu uxih nummâ gita katayakaay, edde sugne dambik uduurra 'neh, koo ruffa mahannino.

¹⁴ YALLAW, ni Dageltaw, ni digaalah bical gacteeh, kulli way cakkik tanim abtaamih sabbatah, nee digaalteh. Nanu atu aba intem cinneh.

¹⁵ Goytaw, ni Dageltaw! Isi qande ayballuk Masrik nee teyyeeqeemih a saaku fan, ku migaq yaabben migaq yekke'mmay, dambi lem abneeh qellat bahne.

¹⁶ Nanu bahne dambi kee ni kaxxa abbobti abak sugte umaanek gexxaamah, Yarusalaam magaalak cuggaaneh yan mari Yarusalaam kee ku ummatta bursuteh. Goytaw, duma kulliimik nee catak sugte. Uxih Yarusalaam magaalah maral ahaysa isi kaxxa bagcarra xabbacos. Yarusalaam ku magaala. Is ku qaley taahirik tanihiyya kinni.

¹⁷ Goytaw, ni Dageltaw, anu ku naqasuh anik, aba kallaci yok oobbey! Ku qariy yiddigillehiyya meqe intit wagit. Atu Yalla kinnitom kulli mari akah yaaxige'nnah, ku qari meqe intit wagit.

¹⁸ Yi Dageltaw, ayti yoh ucuyaay axcem yok oobbey! Nanu edde nan gadaama ubul! Ku magaalay abuuruh raqtahiyya wagit. Nanu koo akah kallacnam, cakki bagul yan mara nekkek sah hinnay, atu racmatta le Dagelta tekkek sah koo kallacna.

¹⁹ Goytaw, innam nek oobbey! Goytaw, qafu neh ab; nee fan haysit; tibba nek maxcin. Yi Dageltaw, atu Yalla kinnitom kulli num yaaxige'gidih, a dooqa xayuk ugdub. A magaala kee a mari inkih kuumu» axcuk dooqa abe.

MALCINA TABANIH WAKTI

²⁰ Dooqa wohut mayseedeyinniyoy, qagseh innih abe dambi kee Israayil mari abba hee dambit inkih yaabeh; YALLAY yi Dagelta kinnihiyya isi qari akah suge'nnah gacsa'gidih, kaadu dooqa abe.

²¹ Anu too dooqat an waqdi, Jibriiliy duma soonoh ublehiyya haadak anu elle ani'kke fan yemeete. Usuk yemeetem carri-barih sadgat edde aban waktik ten.

²² Too waqdi iyyeemih, «Daaniyelow, akke akah emeetem, takku waytaamih adda koo barsa'gidi.

²³ Atu Yalla kallactam qimbisse waqdi, Yalli woo kallaci koh oggoleh. Yalli kaxxam koo kicnah; tonna leemiik anu away atu abte dooqa Yalli kok oggolem koh warsa'gidih emeete. Taway Yalli Ermiyaas yuybulleemik maqna koh warseyyo'mmay, nagay yoo ankacis.

²⁴ Ku magaalay taahirik tani kee ku ummattah, waktik malcina-tabanih waqdi malciin-gide keenih yeexege. Too waktih addat Yalli aben umaane kaleleh, dambi cabeleh, amri-cinak qafu abele. Tonnah kaadu, way kate sinni qadli gaceleeh; yublen suwaawur kee akkele akak inxicca 'yeenim inkih nummak maaciseleeh; taahirik tanim askutelon.

²⁵ Taaxigem meqemii, Yarusalaam nammayhaak xisoonuuy, elle sugte'nnal tet gacsoonuh amri yeceenim kee, Yalli doore mirac yamaateemik fanat, waktik malcina waqdi malciin-gide kee, lactam kee namma waqdi malciin-gide tatrele. Gititte kee qande le megdeb luk tet xiseloonuh immay too waktil kaxxa gadaama akkele.

²⁶ Too waktih ellecabot Yalli doore mirac tu luk suge waak, kaa qidelon. Woo magaala kee Yallih Qibaadah-Qari, qande le malikih qaskaray woo magaala tibbixehiyyah gabat finqitele. Ahimih ellecabo, Yalli bicse carbi kee finqa gabat luk, weeqi'nnah amaatele.

²⁷ Too malik inki malciin-gide mango marah bica abele. Woo malciinik garab taturra 'ya waqdi, ummatta abak sugte sadgat kee mattaco inkih abe ken kalele. Yalli faxe baati too ikke amma 'tam fanah, kaxxam umâ-yabulih tanim Yallih Qibaadah-Qarik fayya 'ta aracal heelon. Tamah nagay cubbusay mahawweenin» yok iyye.