Daaniyel 8 - NABUWWA KEE MALIKWA

DAANIYEL MARUW KEE DABEELA SOONOH YUBLE

¹ «Belsaxxar malik yekkeemih sidochaytô-sanat yekke saaku, anu nammeyhaytô-soono uble.

² Soonoh ubleemih: Anu innih Qeelam baddak Suusa deqsitta magaalay gaso maroh edde tanihiyyah addal, Uulay deqsita weeqaytih garil soolak suge.

³ Wagga hee waqdi, woo weeqaytih qaxal maruw soolah uble. Too maruw namma gaysay xeerihiyya luk yen. Woo namma gaysak tiyak teena xexxar kee qusbaaneh akittok lafitak ten.

⁴ Woo maruwih gaysoosi ayrô-culmaay kilbat le kabu kee gabbi-qaxat inkih gufteh ten. A maruwut koysittaah kaak tasillimem mananna. Ta maruw isih faxem abitak sugeeh, tohuk gexxaamah kaxxa cayla baahe.

⁵ «Taham kinniimih waagat an waqdi, ayrô-culma le kabuk kaxxam yarde dabeeli, inkih tan baaxooxal tabak yemeete'mmay, abah yan kaxxa ardak gexxaamah ibi kaak baaxo xagak mananna. Namma inti-fanat kaxxam giffa 'ta gaysa luk yen.

⁶ Woo dabeeli weeqayti-xaqul-soolah-uble-maruyuy namma gayse luk suge fan quuruk leemiik ardih uble. Sarrak woo maruwut qeebi abah kaa uble.

⁷ A dabeeli kaxxam bagcarriteeh, maruw ingiqqi heeh namma gaysa kaak yiggileh. Maruw woo dabeelat edde koysita qande luk manannaay; dabeeli baaxok bagul kaa qideh amot taqqa kaak iyye. Too waqdi a maruw a dabeelak is cattam magenna.

⁸ Taaxige dabeeli tohuk lakal kaxxiinah lafitak lafte. Usuk qande baahak elle baahaamal, gaysa kaak tiddigilleh. Too gaysa akak tiddigille aracat kulsa le gaysoosi tooboke. Too affara gaysak tiyaay kabul afkanuk ten.

⁹ A affara gaysak tiyak teenah addak qunxa gaysê-baxa tooboke. Too gaysak qande gabbi-qaxaay ayrô-mawqa le kabu kee Baaxooxak-qaxa-tayse-baaxol inkih fixixxe.

¹⁰ Qaraanal tan qaskar kee cutuukat qeebi edde aba qande baahe. Cutuukak tu takkem baaxol qideeh amot taqqa akak iyye.

¹¹ Qaran qaskarih Mirac lih kinni way qeebi abam faxeeh, kulli ayro kaah abak sugen sadgat abe kaleh. Yallih Qibaadah-Qari nadaasa abe.

¹² Yallih ummatta too gaysah gubat gacteeh; gitat yan sadgat abaanam cabba heenih, wokkel umaane leemit asen. Nummâ-diini baaxot rade. A gaysah abinnaanim gabal bicte.

¹³ Tohuk lakal malaykattuk teeni, aki malaykattuk, «Ahamay away wacyih tanihiyya annal magide fan sugelee?» axcih oobbe. Woo malaykatti kaadu essereemih, «Kulli ayrol Yallih Qibaadah-Qaril aban sadgatih aftok, a wacyih nuble umaane magide fan sugelee? Qaraanal tan qaskar kee Yallih Qibaadah-Qarit yaaqiteenim gaba kaltu waytam, maa saakuuy?» iyye.

¹⁴ Too waqdi aki malaykatti kaal gacsemii, «Aham namma alfi kee sidiica boolih carri-bar kee saaku taturtam fan akkuk sugele. Tohuk lakal Yallih Qibaadah-Qari taahirroyseenih, akah suge'nnah aduurele» iyye.

JIBRIIL TOO SOONOK MAQNA KAAH WARSE

¹⁵ Anu ta wacyik maqna aaxigem faxak suge waqdi, garciik numtin ceelo lem foocal yok soolah uble.

¹⁶ Uulay-weeqaytu le kabuuk, «Jibriilow, ama yubleemih maqna kaah waris» inta xongolo oobbe.

¹⁷ Too waqdi Jibriil yemeeteh, xaqut yok soole. Anu too waqdi kaxxam wariggiteeh, baaxol gommoh rade. Jibriil too waqdi yok iyyeemih, «Atu cagal bani-adantu kinnito'mmay, ahamak maqna ixig. A soono edde yabtam, ellecabô-wakti» iyye.

¹⁸ Usuk yaabak suge waqdi, baaxok bagul afah radeeh inni kasat maraaqiyyo. Too waqdi xabba yoo heeh yoo ugse.

¹⁹ Iyyeemih, «Yallih naqbih ellecabo edde cabtam koh warisu waa. A suwaawur, kulliimik ellecaboy Yalli edde yaabe ayro tamaatu waytahiyya neh yascasse.

²⁰ Woo tuble maruyuy namma gaysa luk yenehiyyak maqna Meediya kee Fursih marih xinto.

²¹ Dabeelak maqna Giriik baaxoh abbootan 'yaanama. Kay namma intih fanak tewqe gaysay gersi gaysoosik giffa 'tahiyya keenik naharsi maliki.

²² Woo affara gaysay naharsi gaysa tiddigille waqdi temeetehiyyak maqna, naharak sugte doolatay affara ikkel kurruntehiyya. Too doolat qandeh duma sugte doolatih innah magacta.

²³ Woo doolatih xinto gaba kalti gexxah, oson umaaneh lafitak lafitan saakuy digaala keenil tamaatu waytahiyya, isih iyyeemik sah tu oggole waah racmatta sinniih ummatta duquurusa malik amaatele.

²⁴ Ta malik kaxxa qande baahele'mmay, woo qande isih le qande hinna. Ta malik kaxxam gibdi baatil baaxoh addal uguuguseleeh; abba haam gabal kaak bicele. Qande le mara kee Yallih ummatta kaadu baysele.

²⁵ Usuk sahda ayriseleh, sahda elle ayrisinnaanim gabal kaah bicele. Kaxxam isit akkeleleh, mango maritteetah aylahu kale'kal annaak ken qidele. Kulliimik daga raaqa malikih yab kinni way cinele. Takkay immay sarrak sahdayti qande akke sinni qandeh gabat bayele.

²⁶ A wacyiy carri bar kee maaca aban sadgat edde abe waan waktik ko'lih edde yaabeenihiyya nummak maacisele. A wacyil tanim sarrah yan dabaanal akkelek, tuktubem alifay alif asta edde hay» yok iyye.

²⁷ Anu tohuk lakal dago ayroora boolaateeh, biyaakitak suge. Sarrak ugutta exceh, malik yoo edde hee taamah gexe. Takkay immay ta wacyik gexxaamah, cisabbootiyyat sugeeh; usuk elle yani'nnih adda cedu effereh.