Daaniyel 7 - NABUWWA KEE MALIKWA

DAANIYEL SUWAAWUR GURRAL AFFARA ALA YUBLE

¹ Baabelon baaxok malikih yen Belsaxxar edde dardaare sanatat, Daaniyel bar qarkaytol deerih yan waqdi, soono kee wacyi innah tanim yuble. Soonoh yublem warkatal yuktubeh raaqise.

² Daaniyel yuble soonot yaabeeh iyyeemih, «Bar annah wagga hee waqdi, affara gambik yamaate caacayay bad kaxxa caffo bahsiisahiyya uble.

³ Too badak fereey takke alluwway nabam nabahiyya amaatih uble. A alluwwa titta ceelak manannaay, tiiy isi ceelo keenik luk yen.

⁴ «Naharsi ali lubak ceelak yen. Takkay immay gabilleemah innah galwa luk yen. Woo ala wagitak suge waqdi, galwa kaak kalen. Sarrak woo ala xinkiyya heeniih, too waqdi sinam innah salafti namma ibah soole. Tohuk lakal sahdayti-le-kas kaat heen.

⁵ «Aki ali yemeeteeh; woo ali uma-alay sahda qidahiyya ceelak yeneeh; salafah daffeyak yen. Too ali masangalê-lafoofuk sidoc afat luk yen. Too waqdi too alak, ‹Ugutay cadok dudda haytah gide akum› kaak iyyen.

⁶ «Anu too alih wagittot an waqdi, gersi ali yemeete. Woo ali kabqi ceelak yen. Buucusul kimbir galwa celtaamak fereey luk yen. Affara moyya luk yen. Abbootan too alah yontocowwe.

⁷ «Anu tohih wagittot an waqdi, too wacyil fereyhaytoh ali yemeete. Too ali kaxxa qande luk yeneeh kaxxam akak meysitan alay cunxo sinaamat qidahiyyak ten. Kaxxa moddiiniy biriitah yanihiyyat qide mara kitif kitif heeh yokme. Sarrak wohuk raqteemik amot taqqa 'ye. Too ali gersi alluwwah inna hinna'mmay tabna gaysa luk yen.

⁸ «Anu woo gaysoosi kaxxam wagitak suge waqdi, qunxa gaysa keenik addak awaqih uble. Too gaysa arac geyta'gidih, duma sugte gaysoosik sidoc buxuxuk yeyyeeqen. Too gaysa sahdayti intiita kee af luk ten. Afak hida ceela yaabat yaabak ten.

⁹ «Anu wokke fan wagitak suge waqdi, makaabon daffeynah koraasi uble. Woo koraasik tiyak teenal ‹Kulli Waqdi Yaní› daffeyah uble. Sari kaak cankaxi qidih inna luk yeneeh; xagor kaak qado illi xagoorih inna luk yen. Kay korsih ibittey koramkortahiyya akak bicseenim girak ten. Too korsi girah innah urak ten.

¹⁰ Muxxa giray weeqi innah caxittahiyya kay foocal caxitak ten. Tokkel alfitte yakke mari kaah taamitak yen. Mangah loowo akak amixxige wayta mari kay foocal soolak kaah taamitak yen. Too waqdi cokmi buxal daffeyna tekkeeh kitooba fakeenih.

¹¹ «Qunxa gaysa hida ceela yaabat yabtaah tirtirissaamih sabbatah, anu wohim wagitak raaqe. Fereyhaytoh-ala anu abalih qideenih, raat kaak baysaana'gidih, raysa kaak urta girah addat qiden.

¹² Aki alluwwak luk sugen abbootan beenih. Takkay immay dago waktih gide rabe'kal yanoonay ken iyyen.

¹³ «Anu bar woo soonoh addat an waqdi, sahdayti-baxi ceeloh innal tanim uble. Ta sahdayti ceelot yan numuy qamburre marot tabbixe amaatih uble. Sarrak woo ‹Kulli Waqdi Yaní› wokkel sugehiyya fan gexeeh, kay foocal kaa xayyoysen.

¹⁴ Too waqdi mango baaxoh tooboke ummatta kee mango kedoodah tan ummattaay, tonnah kaadu, mariy isi afat akak yaaba inkih, kaa akah taqbude'nnah, too sahdaytuh ceelot yan numuh, nabna kee malikanni qande tontocowweeh ten. Usuk le abbootan waara abbootanak ten. Kay dardaarinni gaba kala dardaarinna hinna.

¹⁵ «Yoh tu gactek, too wacyiy ublehiyya kaxxam yoo wariggiseh kinni'nna aaxige cineh.

¹⁶ Wokkel soolak suge marak numuk teenal amma exceh, ‹Ahak maqna yoh warisey› kaak exce. «Usuk tohih maqna yoh warseh. Yok iyyeemih,

¹⁷ ‹Fereey takke alluwway nabam nabahiyya, affara doolatay addunyâ bagul reeddu waytahiyya.

¹⁸ Takkay immay keenik lakal, Yallay inkih daga raaqahiyyah ummatta too abbootan geeleeh; woo abbootan ken gabak way makata› yok iyye.

¹⁹ «Tohuk lakal woo fereyhaak uble alay, gersi alluwwah ceelo luk suge weeh kaxxam sinam akak meysitta ceelo luk yenehiyyay nacaasak yan iba kee birtak yan moddin luk yeneeh qide mara bututtukku heeh taqqa edde iyyeh gexehiyya, kinnim aaxigem faxe.

²⁰ Tonnah kaadu woo tabna gaysay woo alak amot tene kee, gersi gaysay sarrak tewqeeh sidiica gaysa tiggilehiyyah qaada kaadu aaxigem faxe. Too gaysa intiita kee af luk ten. Gersi gaysoosik elle baxsintaamah, keenik giffa 'ta ceelo luk teneeh, kaxxiinah hiddootak yaabak ten.

²¹ Anu too wagittot an waqdi, too gaysa Yallih marat qeebi abteeh keenik teyseh.

²² Sarrak woo ‹Kulli Waqdi Yaní› yemeeteh cokmi abeh, ‹Cakki lem, Yallay inkih daga raaqahiyyah mara› iyye. Yallih mari abbootan edde gee wakti gufe.

²³ «Lih yaabak en num, ‹Tohuk maqna ah teeti› yok iyye. ‹Fereyhaytoh ali, fereyhaytô-doolatay tamaatu waytahiyyaay; too doolatat gersi doolatwak baxsa aallele. Baaxol suggu 'teemit inkih ibah aaqatuk baysele.

²⁴ Tabna gaysa kaadu tabna malikiy woo doolat xiinissu waytahiyya kinni. Wohuk kalah aki malik amaatele. Too malik duma sugte malikwak inkih baxsa le malik akkeleeh; sidooca malik abbootanak oobisele.

²⁵ Yallay inkih daga raaqahiyyak aaminnaanim axceleh, Yallih ummattat xukkutele. Muusa keenih yecee xinto kee qiddi ayroora elle suge wayte'nnal korisam keh gabbateleeh; wakti kee waktitte kee waktik garab gide isi amrih gubat heele.

²⁶ Sarrak qaraanal tan cokmih buxal cokmi yakke'gidih daffeyna heelon. Too daffeynal usuk luk suge qande kaak beeloonuuh inkitanuuk kaa bayselon.

²⁷ Addunyal enna 'ya marih xintoh qande kee nabna, Yallay inkih daga raaqahiyyah ummattah aceelon. Ken daadarinni, ambaxe sinniih waara daadarinna. Xintoh abbobtiy a addunyah bagul enna 'tahiyya inkih ken akdumelon, amri keenik oggolelon› yok iyye.

²⁸ «Ublem tama gide. Tohuk lakal anu innih kaxxam meysiteeh, fooci yok burraaciteh. Ubulla heem inkih baguh raaqise.»