Daaniyel 6 - NABUWWA KEE MALIKWA

DAANIYEL LUBOOKA EDDE TAN BOODOH ADDAT ELLE QIDEN INNA

¹ Daryawesiy kay xintoh gubat tan baaxooxal, bool kee labaatanna takke abbobti reedise.

² Toh lih kaadu woo abbobti abta taama wagtaana'gidih, Daaniyel kee gersi namma num reedise. Malik isih taqbe waa'gidih, xinto meqe'nnal gexxa'gidih, woo sidiica num reedise.

³ Daaniyel gersi marak kasah aysuk yeneemih sabbatah, xayi saakih addat, kaa'lih sinam wagittot heen mara kee baaxoh abbobtik, inkih tayse taamah taamitam kaak tumbulle. Tonna leemiik malik inkih tan baaxoh abba kaa abam faxe.

⁴ Tohih sabbatah kaa'lih sinam wagittot heen mara kee baaxoh abbobti, Daaniyel baaxo meqe'nnal xiinisuh abah yan taamat qellat kaak geyaanamih goranat gacen. Takkay immay Daaniyel qellat kee ayrisiyya celtaamak tu'bagul geytimak manannay, tonna leemiik hebeltô-qellat kaat magennon.

⁵ Too waqdi tittak iyyeenimih, «Diini kabuk kaat amaate waynek, gersi innak qellat kaal elle hayya hayna'nna nableh manan» 'yaanam tittak iyyen.

⁶ Tonnal kaak aboonu waanamal malissa heeniih; tohuk wadir Malik Daryawesil yemeeteeniih, iyyeenimih, «Malikow qumri kok waaray!

⁷ Neey ku xintoh gubal abbootan lehiyyay garab akak taamita marih amô-wagittot yaniih garab xintoh abbobtih akak yaniih garab kaadu xintoh abbobtih gubal yan mara kee doolat abbootan elli haa marak titta elle geyneemih: soddom ayroh gide koo akke waytek, gersi mara kee faxinnaan yallal num tu essere waamal bicnek, atu toh xintô-madqa takke'gidih amri ucuy. Ta amri cininnaan num lubooka edde tan boodoh addat nek qid» iyyen.

⁸ «Toh kulli num dirkih akah oggolaah; aham Meediya kee Fursih xintoy kore waytahiyya akah takke'nnah, isi asta elle hayte warkatal nee amris» kaak iyyen.

⁹ Too waqdi malik Daryawes isi milikkit elle hee warkatay wohim elle amrisehiyya yuktube.

¹⁰ Daaniyel a amri yontocowweem yeexege waqdi, isi buxah gexeeh amô-qari yewqe. Too qarih taagat Yarusalaam magaala fan afkunuk yen. Too taagataak dumaak akah abak yene'nnah, fakimit yan taagatih garik gulubuh gacca 'yeh, kulli saaku ayrol sidiica adda Yalla kallacak dooqa abak suge.

¹¹ Daaniyel naqboytit yakkeenimik temeeteeh; Yalla kallacam kaak yublen waqdi,

¹² kaak malkitaani'gidih malik fan gexen. Too waqdi malikik iyyeenimii, «Malikow, atu soddom ayroh gide, koo akke waytek, gersi mara kee faxinnaan yallak tuk teena essera num, lubooka elle tan boodot qidenno, 'yaanam elle tan warkatay ku milikkit elle tanihiyya tunkuttubem hinnaa?» iyyen. Malik keenil gacseemih, «Tunkuttubeh. Woo amri gibdiih, Meediya kee Fursih marih amriy kore waahiyya» keenik iyye.

¹³ Oson too waqdi kaak iyyeenimii, «Hay tonnal, Daaniyeli iyyaanah Yuudâ-baaxok seewah baahen numuy akkel yanihiyya koo mayassakaxxaay atu tecee amri cinna heeh, kulli ayrol sidiica adda dooqa aba» kaak iyyen.

¹⁴ Malik toh yoobbe waqdi faxe cineeh; Daaniyel elle catta haa gurra geyam gabbate. Carri tikka 'yam fan, kaa elle cata'nnih malat gace.

¹⁵ Sarrak taaxige mari butta tikka 'yeh, nammeyhaak kaal yemeeteeniih kaak iyyeenimih, «Malikow, Meediya kee Fursih marih xinto elle inta'nnal, inki adda yewqe amri nammeyhaak milaagaanam mabicta» kaak iyyen.

¹⁶ Too waqdi malik, «Daaniyel baahay boodot kaa qida» 'yaanamih amri yeceeh; toh aben. Takkay immay malik Daaniyelik annah iyye. «Ku Dageltay atu baguuk taqbudehiyya koo catay» kaak iyye.

¹⁷ Daaniyel woo boodot qideenik lakal, num kaa akah fake waa innah, malik-milikkit kee kay doolatih asta bagul akak tan kaxxa-xaat, woo boodok afa alfen.

¹⁸ Tohuk lakal malik isi buxah yuduureeh, inkih yan bar maaqo yakamu cineeh, sinam lih walalu cineeh, xin kaadu kaat rade cineh.

¹⁹ Maaci maacise waqdi, malik ugutta 'yeh sissikuk woo boodo fan gexe.

²⁰ Tokke yemeete waqdi meysitak Daaniyelih seeceh, «Daaniyelow, waara Yallih naqasow, atu baguuk taqbude Yallay ku Dagelta kinnihiyya lubookak koo catee?» kaak iyye.

²¹ Daaniyel kaal gacseemih, «Malikow, qumri kok waaray!

²² Yi Dagelti a lubooka tu yol baahe wayta'gidih, af keenik taxee malayka ruube. Yalli woh akah abem, anu qellat baahe weeh kol umaamat ase weem aaxaguk yeneemih sabbata, malikow» kaak iyye.

²³ Too waqdi malik kaxxam ruffu yeh, «Boodok kaa eyyeeqa» iyye. Daaniyel boodok yeyyeeqen waqdi, Yalla yeemeneemih sabbatah, xagaral anxaqa kaak mananna.

²⁴ Tohuk lakal malik, «Baatil kaak malkite maraay ken agabuuy ken xaylo inkih, woo boodoy lubooka edde tanihiyyah addat qida» iyye. Woo boodot ken qiden waqdi, lubooka boodok iqiya gufe'kal kaqqa inteh xagaral keenik raddeeh, lafof keenik butuk butuk hayte.

²⁵ Tohuk lakal Malik-Daryawes kulli rasih ummatta kee mariiy isi kedooda kee isi af akak le ummattay isi xintoh gubat tan baaxooxal geytimtahiyyah inkih, warkat ruubeeh iyyeemih, «Naharak salaamatta siinil qida. Gaddi siinik amagguk yamaggay axcih!

²⁶ Yi xintoh gubat yan maraw, kulli num siinik Daaniyel yaqbude Dageltak meysitaah kaa yassakaxxem siinil amrisa. Waara Yalli kaa kinniih; ummaan way waarele. Kay xinto way mabaata. Kay abbootan mayamurruqa.

²⁷ Umaanek cattaah waddam kaa. Able weeniih aabbe weenim, qaran kee baaxô-bagul abtam kaa. Lubookah afak Daaniyel cattem usuk yaqbude Dagelta» 'yaanam iyye.

²⁸ Daaniyel, Daryawes kee Koorisiy Fursih yooboke dardaarinni-dabaanal, kullim gabal akak bicta num yekke.