Daaniyel 5 - NABUWWA KEE MALIKWA

GIDAAR BAGUL TAN KUTBE

¹ Ayrok teena malik Belsaxxar alfi yakke maray kay xintoh miracwah yanihiyyah, isi buxal qibnaytiinoh kaxxa afxago keenih xage. Belsaxxar qinabak bicsen kamri ken lih aaqabuk suge.

² Maqabat yanin waqdi, kaa kee kay xintoh-miracwaay kay agabu kee caggô-gubbih caggoh ginnaaqot le agabu elle yaaqubeeni'gidih, Belsaxxar amri yeceeh iyyeemih, «Gexay yi abba Yarusalaamal yan Yallih Qibaadâ-Qarik baahe dahab kee lakqok bicsen kobbaayiy kee sacnitte annah addah culusa» iyye.

³ Too waqdiik dahabak bicsen kobbaayiy kee sacnittey Yarusalaamal yan Yallih Qibaadah-Qarik dannabah orbiseenihiyya kay qarih adda baahen. Too waqdi too duyyel, kaa kee kay maray xintoh miracwah yanihiyya kee kay agabu kee caggô-gubbih caggoh ginnaaqot le agabu tooqobe.

⁴ Oson woo qinabak bicsen kamri yooqoben waqdi, Yallih aftoh lon duyyey dahab kee lakqooy nacaas kee birtaay xeet kee cooxuk bicseenihiyyah saare aben.

⁵ Oson tohut yanin waqdi, garciik kay qarih gidaarih bagul, sahdayti gaba tumbulleeh; woo gaba gidaarak noorâ-bagul axcih faanus elle ifisak suge aracal aktubih yublen. Malik too gaba aktubih yuble waqdi,

⁶ wariggiteeh; abeh yan wariggak gexxaamah fooci kaak burraaciteeh, guluuba kaak axaxxeh, yinnikisseh.

⁷ Too waqdi, «Faal-qida kee baab-abeenit kee cutuk-beyah yoh seeca» iyyeh xongole. Woo mari yemeete waqdi, malik keenik iyyeemih, «A kutbe yakriyeeh teetik maqna yoh warisu waa numuh, malik buxah mari haa qasdiimin sartan kee dahabak bicsen silsilatay massakaxxah fillat haanahiyya aceeyyo. Abbootanah kaadu yok gubal sidochaytô-num akkele» iyye.

⁸ Too mari inkih kutbe fan xayyooweh; takkay immay aham num keenik yakrayu yeffereh. Malikih a kutbe intaamih maqna warsa num keenit mageytiminna.

⁹ Tahak iyyaanaah abaanam waagiseenih. Too waqdi malikik fooci burraacinaanah dumak lafteh, kaxxam meysite. Kay xintoh miracwa kaadu tahak iyyaanaah abaanam aaxige cineenih.

¹⁰ Malik-ina, malik kee kay muddaqiyyi abah yan waxxaqto toobbe waqdi, afxago elle xagak sugen qari culte. Too waqdi, «Malikow, qumri kok waarayik, a gide mankakkaqinaay annah magacin.

¹¹ Ku xintoh gubat tan baaxoh addal, *Kudduusuk tan yallitteh roocaaniyya xagarat akak tan num yaniih; ku abba malikih yen saaku, a num tut xayih radiyyaay ixxiga kee yallitte-kas le num kinnim kaak tumbulleh sugte. Ku abbah yen Malik Nabkadnessar, faal-qida kee baab-abeenitiiy cutuk-beya kee ramli-qidak inkih abba kaa abeh suge.

¹² Num aalle waa kas kee ixxiga leeh; soonok maqna warisuh dudda akah le. Missilak kaadu maqna yaaxigeeh, sirrih taniimik maqna yafdige. Too numuh farmo rub. Kaak migaq Daaniyeli. Malik migaaqah Beltasaxxar kaah yeyyeeqeh suge. Usuk ahamih maqna koh warsele» kaak inte.

¹³ Daaniyel woo waqdiik malik buxah baaheeniih; too waqdi malik kaak iyyeemih, «Yi abba Yuudâ-baaxok seewah baaheeh Daaniyel akak 'yaanam koo innaa?» kaak iyye.

¹⁴ Qagseh kaadu kaak iyyemii, «Yallittê-roocaaniyya kot taniih, atu duddaay ixxiga kee kas lito 'yaanam oobbe.

¹⁵ Tu-taaxago kee faal-qida akke baaheenih sugeeniih, ‹Aham ikriyaay maqna akak yoh warisa› 'yaanam keenik exceh immay, num keenik yoh warisu maduudinna.

¹⁶ Takkay immay too maral gibdaabina lem kol sahlih taniih; sinam gita akah wayteemih atu gita geyta 'yaanam kok iyyan. Tonna leemiik atu a kiraati tikriyeeh maqna akak teexegek, malik buxah mari haa qasdiimin sartan kee dahabak bicsen silsilatay massakaxxah fillat haanahiyya koh aceeyyo. Abbootanah kaadu yok gubal sidochaytô-num akketto» kaak iyye.

¹⁷ Daaniyel kaal gacseemih, «Anu mattaco faxam mayyu immay, gersi marah taceek muuma. Tonna'mmay malikow, akkel tunkuttubem kee teetik maqna koh warseyyo.

¹⁸ Malikow, Yallay kulliimik daga raaqahiyya ku abbah yen Nabkadnessar kaxxa malik abeeh migaq kee heebatiiy nabna kaah yecee.

¹⁹ Usuk nabna le numuk yeneemih sabbatah, mango baaxoh mara kee mango meelah yoobokeeh mango afah yaaba mari kaak aben meysi kaak axaxitak sugen. Qidam faxa num qidak sugeeh, wadam faxa num wadak suge. Qawratat qidam faxa num qidak sugeeh; yassakaxxem faxa num assakaxxuk suge.

²⁰ Takkay immay kaxxa kaxxiina kee isih iyyeemih fayxi baahe waqdi, malikannuk oobeeh luk suge nabna weeh.

²¹ Ummattah addak yewqeeh, kas kaak saqi kas yekke. Dabqih dibookalwa lih gaceeh laahi'nnah qayso yokme. Xiina waqdi qaraanak ooba naafi xagar kaak arquse. Sarra ellecabol Yallay kulliimik daga raaqahiyya a addunyah abbootan yamlikeeh, isih faxe marah yaceem yeexegeh.

²² «Takkay immay kooy kay baxah yanihiyya aham aaxagih, Yallah marammitinnitooy,

²³ qaraanal yan Goytak giddih tan taamah taamitteeh; kay qarik dannabah orbisen kobbaayiy kee sacnittel, koo kee ku xintoh miracwaay ku agabu kee caggô-gubbih caggoh ginnaaqot lito agabu, qinabak bicsen kamri tooqoben. Too waqdi yalla axcuk dahab kee lakqooy nacaas kee biriitaay coox kee xeetik bicissen duyyey tu aabbe waytah tu able waytah tu aaxige waytahiyya faylisse. Yallay koo wadaah koo qidaah atu abba haytem inkih gabat lehiyya massakaxxinnito.

²⁴ Tonna leemiik, Yalli taktube gaba akah ruubem, tohih sabbata.

²⁵ «Tunkuttube kutbe, ‹Loowo. Loowo. Qilsa. Baxsa› 'yaanam inta.

²⁶ «Loowo 'yaanamak maqna: Yalli ku abbootan sugu waah gide loowak sugeeh, ellecabo teetik xayyoyse, 'yaanama.

²⁷ «Qilsa 'yaanamak maqna: qilsak takkeh gide kok yaaxigeeni'gidih miizaanal koo heenih immay, tu'qilsa luk masuginnito.

²⁸ «Baxsa 'yaanamak maqna kaadu: ku doolat baxambaxsinteh Meediya kee Fursih yooboke marah tontocowwe» 'yaanam kaak iyye.

²⁹ Too waqdiik malik isi marak, «Daaniyelih malik buxah mari haa sartanay ibak lifiq gufay qasdiimini kee, dahabak bicsen silsilat fillat kaak haa» iyye. Abbootanak kaadu isi gubal sidochaytô-num kaa abe.

³⁰ Malik isih, too barat edde, marin gabat rabe.

³¹ Daryawesiy Meediyah yoobokeh barak lactam kee nammayat yenehiyya, kay aracal gaceh Baabelon-baaxoh-malik yekke.