Daaniyel 4 - NABUWWA KEE MALIKWA

NABKADNESSAR SOONOL YUBLE CAXA

¹ Malik Nabkadnessar kulli baaxol tan ummattay mango afah yabtaah mango kedoodah tanihiyyah inkih, farmo ruubeeh keenik iyyeemih, «Naharak salaamatta siinil qida. Gaddi siinik amagguk yamaggay.

² Anu uble qagabak tanim kee ablewaynuy Yallay kulliimik daga raaqa yoo yuybulleehiyya siinih warsam yoh rufto le.

³ Yalli nee yaybulle qagabak tanim manxu nabna le; usuk abe ablewaynuh tanim kaxxa cayla le. Waara malikih tanim, Yalla. Kulli way mulki lem, Yalla.

⁴ «Anu buxah addal tu wee'kal innih elle faxe'nnal suge.

⁵ Barak teena qarkaytô-bagul xiinit an waqdi, kaxxam cunxo yot qida suwaawur uble.

⁶ Sarrak a soonok maqna yoh warsaana'gidih, Baabelon baaxol tan tu-taaxagoh inkih seeco abe.

⁷ Too seecol faal-qidaay baab-abeenitiiy cutuk-beya kee ramli-qidak num raaqe'kal inkih temeete. Too waqdi anu uble soono keenih warseh immay, too soonoh maqna keenik num yoh warisu yeffereh.

⁸ Ellecabol Daaniyeliy anu migaaqah Beltasaxxar akak excehiyya yol xayyoowe. Too migaq akak geem, anu liyo yalla. *Kudduusuk tan yallitteh roocaaniyya kay xagarat tan. «Anu kaak exceemih,

⁹ ‹Beltasaxxaraw, tu-taaxago-miraacow, kudduusuk tan yallitteh roocaaniyya kot tanim aaxigeeh, atu iginto sirri mayan. Anu uble soono koh warisu waak, teetik maqna yoh warsetto› kaak exce.

^10-11 Sarrak woo soono kaah warseh excemii, ‹Xiinit an waqdi baaxok gudel kaxxa caxa uble. Woo caxa qaran guffa hayteh, addunyâ-bagul yan marah inkih umbulluyyu 'tam fan, ambuk tembe.

¹² Teetik ayyuufi nabam qaxa-muquk yeneeh, addunyâ-bagul enna 'ya mara dudda hayta caxâ-miru luk ten. Dubaala akak inxicca 'yaanam inkih woo caxah silaalol silaalitte. Kimbir tet luudittet qarwa xissite. Rooci elle haytam inkih, maaqoh tet xaylo tokme.

¹³ Uxih xiinit an waqdi, woo soonol qaraanak kulli waqdi bical yan malaykattu amaatih uble.

¹⁴ « ‹Too malaykatti anay fayya haak iyyeemih: «Ama caxa irgiqay luudwa teetik kala. Ayyuufa teetik luuqusaay, tet caxah miru baaxot caxa. Tet gubal silaalitta alluwwa kee, tet luuditteh amot yan kimbir xiiriya.

¹⁵ Takkay immay caxak buxux kee ramiida elle caba. Birta kee nacaasak bicsen birti-axaw too raaqe buxuxut uxuyay; woo booxal tan qaysoh bagul elle tanay 'xica. Taway naafi kaal oobay, dabqih alluwwe kee coox lih gacay.

¹⁶ Usuk malcina sanatih gide hawri cabeleeh, kas kaak alluwwê-kas akkele.

¹⁷ Aham tiysixxigem, kulli waqdi bical tan malayka. Akah tiysixxigem, sahdayti xinto tamlikem, Yallay inkih daga raaqahiyyaay; tet isih faxe numuh yeceem ummatta inkih taaxagay; isih faxek abbootan ramma le numuh yecee» iyye› kaak exce.

¹⁸ Malik, «Anu ublem ta soono kinnih» 'yaanam iyye. «Ta way Beltasaxxaraw, teetik maqna yoh waris. Yi baaxol tan tu-taaxagok, aham num yoh warisu maduudinna. Takkay immay kot yallittê-roocaaniyya taniimih sabbatah duudetto» iyye.

¹⁹ Daaniyel tah yoobbe waqdi wariggiteeh, dago waktit iyyam magenna. Malik kaak iyyeemih, «Beltasaxxaraw, a soonok intu waytaamak mameysitin» iyye. Too waqdi Beltasaxxar kaal gacseemih, «Malikow, a soono edde yabtam koo hinnay ku naqboytiitit takkem faxak en!

²⁰ Atu tuble caxay, qaran guffa hayteh addunyâ-bagul yan marah inkih umbulluyyu 'tam fan ambuk tembeeh

²¹ ayyuufi akak qaxa-muquk yeneeh kaadu tonnah xaylo akak addunyâ-bagul enna 'ya mara adoobissahiyyay alluwwa gubal akak nookittaah kimbir luudut qarwa akak xisahiyya, koo.

²² Malikow, too caxa koo kinni. Atu naba malikiy kaxxa qande le tekke. Kaxxam tembeeh, abbootan kok qaran gufeeh, qande kok addunyâ-bagul fixixxeh.

²³ Atu qaraanak yemeete malaykattuy kulli waqdi bical yani tubleeh; woo malaykatti iyyeemih, ‹Caxa irgiqaay kala. Buxux kee ramiida teetikiiy makalina. Birta kee nacaasak bicsen birti axaw, woo raaqe buxuxut uxuyay, qayso elle tooboke booxal elle caba. Kaal naafi raday malcina sanatih gide alluwwa lih dabqih gacay› iyye.

²⁴ «Malikow, tahak maqna, Yallay inkih daga raaqa, kot takku waytaamat yaabem nee taybulle.

²⁵ Sahdak koo baxseloonuuh; alluwwa lih dabqih gacetto. Malcina sanatih gide laahi innah qayso akamuk, gubbik bagul xiinetto. Qaraanak ooba naafi xagar kok arqusele. Too waqdi sahdayti le abbootan tamlikem, Yallay inkih daga raaqahiyya kinnim aaxigettooh, tet kaadu isih faxe marah yacayu waam aaxigetto.

²⁶ Malaykatti, ‹Caxak buxux baaxol elle cab› akah iyyeemik maqna: addunya inkih xiinissam, Qaraanal yan Yalla kinnim taaxagu wayta saaku, akah sugte malikih gacetto.

²⁷ Hay, tonnal malikow, ku maganak anu koh acee fayu oobbey. Dambi lem maabinaay gitah tanim ab. Umaane cabaay, xukkot yan marah xuwaw. Tonnal gaddaliino koo cabe waytam takkeh» kaak iyye.

TOO SOONO NUMMA TEKKE

²⁸ Malik Nabkadnessarat soonol ubulla heem tekkeeh,

²⁹ tohim kaat tekkem, taban kee namma alsa sugek sarrak ten. Ayrok teena Baabelon magaalal isi qarih amol gexak suge waqdi,

³⁰ iyyeemih, «Baabelon magaala manxu nabaah! Anu inaytâ-magaalah tet akah xisem, inni qande kee inni caylaay; inni nabna kee inni hayba elle aybulle'gidi»

³¹ 'yaanam iyyuh too yab afat abbaxih, qaraanak xongolo kaal raddeeh, woo xongolo inteemih, «Malik Nabkadnessarow, kok axcem oobbey. Malaakinnu kok beenih,

³² sahdak koo baxissa heenih dabqih alluwwa lih gacetto. Malcina sanatih gide laahi innah qayso akamuk sugetto. Sarrak Yallay inkih daga raaqahiyya a addunyah abbootan yamlikeeh, isih faxe marah yacayu duudam aaxigetto» kaak iyye.

³³ Too yab too waqdiik numma yekke. Nabkadnessar ummattah addak yewqeeh, laahi innah qayso yokme. Naafi xagaral kaak oobeeh, xagor kaak xexxaarah qawî-galih innah gace. Ibi lifiq kaak kimbiroh ibih lifiqih gid yekke.

NABKADNESSAR YALLA FAYLISE

³⁴ Woo malcina sanat tatrek lakal malik iyyeemih, «Qaraanay Yalli elle yani wagga hee waqdi, kas yol gaceeh, too waqdi Yallay inkih daga raaqahiyyah candu gacseeh; kaay waarahiyya fayliseeh, essekexxeh. Kay mulki kulli way waara; Kay xinto ummaan waarele.

³⁵ Baaxol enna 'ta ummatta kay garil tu hinna. Qaraanal tan malayka kee baaxol tan ummatta inkih kay milkih gubat tan. Usuk faxeemil saduh gacu duuda num mayan. Usuk abem macah tekkeeh, iyyu duuda num mayan.

³⁶ «Maqaane yol tuduure saaku, luk suge muddaqiyinnuuy, luk suge haybaay luk suge nabna kee luk suge abbootan yoh yuduureh. Yi doolatih abbobti kee yi xintoh gexso miracwa, emeete way, yoh garayteh, duma malikih suge saaku luk suge migaaqak yayse migaq gee.

³⁷ Tonna leemiik yoo Nabkadnessar qaraanal yan Malik faylisaah kaa assakaxxeh. Usuk le nabnat yaabah, usuk abba heem inkih cakkik taniimiiy, kay giti cakki gita. Kaxxiina le marak kaxxiina kalu dudda le» 'yaanam iyye.