Daaniyel 3 - NABUWWA KEE MALIKWA

DAHABAK BICSEN CEELO

¹ Malik Nabkadnessar dahabak bicsen ceeloy xexxaarah lactam cusul takkeeh, baguh kaadu lica cusul takkehiyya bicseh, Baabelon rasuk Duura deqsitta booxal soolise.

^2-3 Tohuk lakal, kay gubal taamita marak, malik xaylooy xintoh-abbobtiiy, xintoh abbobtih gubal taamita maraay, makaabonuuy, cokmaabaay, cokmaabak gubal yan maraay, doolat lakqo daanah gabat akak tan mara kee baddah abbobtih inkih, seeco abe. A seeco akah tekkem, malik soolise ceelo yaqbudeeni'gidik ten. Ama malik gubal taamita mari inkih woo ceeloh foocal soole waqdi,

⁴ xaagu sinaamah yaysaabbe num sollu 'yeeh anay fayya haak annah iyye. «Kulli rasih ummatta kee mariiy, isi nasab kee isi af akak le ummattak inkih,

⁵ *baanta kee fooximaay kirar kee *begenaay karambo kee gersi duyyey gadah yaagureenih anay taabboonu waytan waqdi, Malik Nabkadnessar soolise ceeloy dahabak bicseenihiyyah qibaadah, takkeenimik inkih gommoh radetton.

⁶ Gommoh rade wee num, woo waqdiik, habug inta kaxxa-muufeh innal bicsen aracah addat kaa qidelon» iyye.

⁷ Too ummatta inkih too duyyey gadah yaagureenih anay toobbe waqdi, woo ceeloy malik soolisehiyyah gommoh raden.

⁸ Too waqdi Baabelon rasih marak garab, Yahuud maral qellat edde baahaanam geen.

⁹ Malikik iyyeemih, «Malikow, qumri kok waaray!

¹⁰ Atu isih, ‹Baanta kee fooximaay kirar kee begenaay karambo kee gersi duyyey gadah yaagureenih anay oobba haan waqdi, kulli num dahabak bicsen ceeloh gommoh raday!

¹¹ Rade waa numuuy, habug inta kaxxa-muufeh addat qidelon› 'yaanam inte.

¹² Malikow, Yahuud marak Baabelon rasih baddah abbootan akah tecee maray migaaqah Sadrak kee Meesak kee Qabednago deqsitahiyya, kooy malikih yanihiyyah amri cineeniih, ku yalla mayaqbudaanaay; atu soolisse ceeloh gommoh maradan» iyyen.

¹³ Toh yoobbe waqdi, malik kaxxam bagcarriteeh, «Gexay woo sidooca num yol baaha» iyye. Ken baaheeniih;

¹⁴ too waqdi malik keenik iyyeemih, «Sadrak kee Meesak kee Qabednagok, isin nummah yi yallitte aqbude cinteeniih, anu soolise dahabak bicsen ceeloh gommoh raddoonu cinteenii?

¹⁵ Taway meqek, a gadah yaaguren duyyeh anay taabben waqdi, gommoh raday, ama ceelo uqbuda. Gommoh rade wayteenik, urta muufeh addat sin qideloonu'mmay, yi gabak kalah sin cata yalli mayana» keenik iyye.

¹⁶ Too waqdi woo sidiica num kaal gacisseemih, «Malikow, nek abtu waytaamak, edde koysinnam mannu.

¹⁷ Takkay immay muufek addat nee qiddaamah, nanu naqbude Dagelti nee yayyaaqu duudaah, ku gabat nee biyaakite kalam duudah.

¹⁸ Takkay immay nee cate waamah, atu yallah litom manaqbudaay, atu soolisse ceeloh gommoh maradna» kaak iyyen.

WOO LABHA KAXXA-MUUFEH ADDAT QIDEN

¹⁹ Too waqdi Nabkadnessar bagcarriteeh, naqabuk gexxaamah inti qabal innah kaak gacte. Isi marak iyyeemih, «Muufet gira urusaay dumak malcina adda laqnah lafitta 'xica» iyye.

²⁰ Sarrak qaskar addak celeemah yan marak, «Uxuyya ken haay muufek addat ken qida» iyye.

²¹ Too mari, a sidiica num amot kalabtaay dallaabiyat kee xagarat haan gersi sartan luk uxuyyu ken heeniih, girat ken qiden.

²² Takkay immay malik, «A muufe xayuk urusaay laqna kaxxam bahsiisa» iyyeemih sabbatah, woo gira muufet ken qide mara alelteh tokmeh.

²³ A sidiica numuy yooxeenihiyya woo girah addat raden.

²⁴ Sarrak Nabkadnessar garciik waaga tibbixeeh, gubaak kaqqa 'yeh, fayu kaah yecee marak iyyeemih, «Noxeeh muufeh addat qideenim sidiica num hinnaa?» iyye. Osonuuy, «Sidiica num qidnem digga le» iyyen.

²⁵ Too waqdi malik iyyeemih, «Hay, a girah addat affara num wonnak annah gexah ablek, ah macaay? Axawat kaadu mayaniinaay xagaral keenik cararow kee biyaakak tambulleem matan. Fereyhaytô-num yallittek tiyak teenah tan kaa» iyye.

²⁶ Sarrak Nabkadnessar urta muufek afah amma 'yeh iyyeemih, «Sadrakow! Meesakow! Qabednagow! Yallay kulliimik daga raaqahiyyah naqoosay eweqay!» keenik iyye. Oson too waqdi xayuk yewqen.

²⁷ Malik-xaylooy, xintoh abbobtiiy, ken gubal taamita mara kee malikih fayu yecee mari inkih, woo sidiica numuy gira tu elle baahe waytehiyya yable'gidih yemeete. Xagorta kinni-way keenik carareh manannaay, sari kaadu keenik carareh mananna. Xagaral keenik qerti suruy kinni-way mananna.

²⁸ Too waqdi malik iyyeemih, «Sadrak kee Meesak kee Qabednago taqbude Dagelta faylisa. Ken Dagelti malaykattu keenih ruubeeh, keeniy kaal yaamineeh kaa yaqbudehiyya cateh. Oson yi amri cineeniih, yalla 'yeenih gersim yaqbudeenimik, faxem keenit takke way, isinni Dagelta yaqbudeenimil gaba kalen.

²⁹ Hay, taway, anu sin aysixxigeemih: Faxe baaxoh num yakkuu, hinnay faxe nasabak yanuu, hinnay kaadu, faxe afah yaaba num takku, a sidiica numih Dagelta xaafek, iba kee gabal kaa argiqeyyooh buxa kaak abuuruh cabeyyo. Ken Dageltih innah cata gersi yalli mayana» iyye.

³⁰ Sarrak malik, Sadrak kee Meesak kee Qabednagoh dumak yayse abbootan Baabelon rasih baddal keenih yecee.