Daaniyel 2 - NABUWWA KEE MALIKWA

NABKADNESSAR NABA CEELO SOONOL YUBLE

¹ Nabkadnessar malik yekkeemih nammeyhaytô-sanatat soono yubleeh, woo soonoh sabbatah waagiseeh xin kaat amaate cineh.

² Tonna-leemiik soonitem kaah warsaana'gidih, soono yafdige maraay faal-qidaay baab-abeenitiiy cutuk-beya kee ramli-qida-marah amma 'yaanam inkih seeco abe. Oson yemeeteeniih foocal kaak soolen waqdi, keenik iyyemii,

³ «Soono ubleeh, woo soono cisab yol tekkeeh; away teetik maqna aaxigem faxa» keenik iyye.

⁴ Oson too waqdi Suuriyah afat kaal gacseenimih, «Malikow, ku qumri waaray. Tuble soono neh waris, maqna akak koh warsennok» kaak iyyen.

^5-6 Malik keenik iyyeemih, «Uble soono isin yoh warisaay, maqna teetik kaadu isin yoh warisa. Toh abe wayteenik, iba kee gaba rike-rikeh siinik argiggiqeyyooh, buxa siinik kaadu abuuruh cabeyyo. Takkay immay uble soono yoh warisseeniih maqna kaadu yoh akak warisseenik, wohih galtoh meqe mattaco siinih aceeyyooh, naba mara sin abeyyo. Uble soono yoh warisaay maqna akak kaadu yoh warissaanamal, inni bagul gaba kaleh» keenik iyye.

⁷ Too waqdi a mari kaal gacseemih, «Naharak atu tuble soono neh warisaay maqna nel akak cab» kaak iyyen.

^8-9 Too waqdi malik iyyemii, «Tahaay ekkelem kinnih! Isin away a soonoh maqna yoh warse wayteenik, inkih inki digaalah sin digaaleyyo 'yaanamal gaba kalem tublen waqdi, wakti rubtaanam faxxan. Wakti kulli way inki innal masuga yaanamah dirab yol teceenim faxxan. Toh hinnak, soonok maqna taaxigeenim elle aaxaguh, uble soono naharak yoh warisa» keenik iyye.

¹⁰ A mari kaal gacsemii, «Malikow, atu faxxam addunyâ-bagul warisu duuda num mayan. Ahaydumah annah tanim, kaxxa qande kee nabna le malikwa kinni-way, faal-qida kee baab-abeenitiiy cutuk-beyal messerinna.

¹¹ Annah tanim kaxxam gibdiimiiy; yallittek kalih mari yaaxagu maduuda. Yallitteh tu gactek, sahdayti addal mageytinta» kaak iyyen.

¹² Malik toh yoobbe waqdi naqabuh gira yekkeeh, «Baabelon baaxol sugga 'te tu-taaxago inkih qida» iyye.

¹³ Tonna-leemiik malik amrisem kay gubal yan marah ascassuk yiysixxige. Rabaanamih cokmi elle aben marat loowoh, Daaniyel kee kay kataysis yesgelleenih yenen.

¹⁴ Too waqdi Daaniyel, malik qaskarak abbah yen numuy, tu taaxago qida akak iyyeenihiyyal gexe. Too num migaaqah Ayruk deqsitak yen. Sarra edde yaaba yab isik cubbusak, Daaniyel too numuk iyyeemih,

¹⁵ «Malik annah yan gibdi amri akah yeceem macaay?» iyye. Aryuk aham elle tekke'nna kaah warse.

¹⁶ Daaniyel too waqdi malik fan gexeeh, «Soonok maqna koh warsa'gidih, wakti yoh ab» kaak iyye. Malik woh kaah oggoleh.

¹⁷ Sarrak Daaniyel buxah gexeeh, Cananya kee Misaayel kee Qadaryay kay kataysiisih tanihiyyah tikka 'tem inkih keenih warse.

¹⁸ Keenik iyyeemih, «Nee kee kalah tan tu-taaxago cattimna'gidih, Yalli a soonoh maqna nee yayballayuh, qaraanal yan Yalla kallaca» keenik iyye.

¹⁹ Too bar Yalli Daaniyelih too soonoh maqna wacyi gurral kaa yuybulle. Too waqdi Daaniyel qaraanal yan Yallah candu gacseeh, kaa saariseeh, iyyeemih:

²⁰ Kas kee qande lem Yalla; fayla kulli way kaah takkay.

²¹ Kulli wakti tamlikem kaa; malik abtaah kaltam Yalla. Kas le marah kas taceem kaa; numuh ixxiga taceem kaa.

²² Qellittaah sirrik tanim qaddossam kaa. Diteh addat qellittam tablem kaa. Ifi maroh edde yanim Yalla.

²³ Yi kaxxa abbobti tuqbude Dageltaw, kas kee qande yoh teceem koo. Candu koh gacsah koo faylisa. Koo esserrem atu yoo tuybulleeh; malikih warisnu waynam nee tuybulleeh; candu koh gacsah koo faylisa» axcuk Yalla faylise.

DAANIYEL SOONO KEE TET MAQNA MALIKIH WARSE

²⁴ Sarrak Daaniyel, Aryuk deqsita numuy malik woo mara akak qida iyye fan gexe. Kaak iyyeemih, «A soono anu kaah warseyyok, malik fan yoo beyaay; Baabelon baaxol tan tu-taaxago maqidin» kaak iyye.

²⁵ Aryuk woo waqdiik, Daaniyel malik fan beeh, kaak iyyeemih, «Malikow, Yuudâ-baaxok seewah bahne marih numuy atu tuble soono yaaxigehiyya geeh» kaak iyye.

²⁶ Malik too waqdi Daaniyeliy Baabelon-mari migaaqah Beltasaxxar akak iyyehiyyak iyyeemih, «Anu uble soono kee woo soonoh maqna yoh afdigettom duddaa?» kaak iyye.

²⁷ Daaniyel kaak iyyeemih, «Malikow, aham tu-taaxago kee faal-qidaay baab-abeenit kee cutuk-beyak num yaaxagu duudam hinna.

²⁸ Takkay immay Yallay qaraanal yanihiyya sirrih tanim yableeh yaybulle. Yalli, atu xiinit sugte waqdi, sarra yan saaku takku waytam koo yuybulleeh yan. Tublem aham teeti:

²⁹ Malikow, qarkaytol deerih tan waqdi, sarra takku waytam cisaabisak teneeh; Yallay sirrih tanim yaaxige, sarra takku waytam koo yuybulle.

³⁰ Yoh tu gactek, away a soonoh maqna yoh tumbulleeh; akah yoh tumbulleem, sinaamak kasah maysa. Takkay immay, atu a soonoh maqna taaxige'gid kee, kol yemeete cisaabak maqna taaxige'gidi.

³¹ «Taway tuble soono koh warisu waa. Malikow, gabak bicsen ceeloy kaxxam nabahiyya foocal soolah isik tuble. Woo-ceeloh-ifi bixiq axcuk yeneeh, intih yabloonu xiqaanamak manannon.

³² Amo akak nabam meqe dahabak bicseenih yenen. Alil kee gaboobi akak lakqok bicseenih yenen. Axca kee mayxay akak nacaasak bicseenih yenen.

³³ Lak akak birtak bicseenih yeneeniih; ibittek garab akak bicseenim, birta kee kallak ten.

³⁴ Atu woh wagitak sugte waqdi, kaxxa xaa, num gabah kaa xage'kal, qalek baxsimma 'yeeh, rade. Woo ceeloh-ibay kalla kee birtak bicseenihiyyat boodeeh butukku hee.

³⁵ Woo waqdi woo birta kee kallaay, nacaasaay lakqo kee dahab inkih, inki-adda caffa tekkeeh, caacay woo caffak raat cabe'kal inkih beeh. Takkay immay woo kaxxa xaa, baaxo inkih dudda qale yekke.

³⁶ Tuble soono tamah teetiiy; taway maqna akak koh warisu waa.

³⁷ «Malikow, atu kulli malikwak naba malik kinnito. Qaraanal yan Yalli baaxok inkih amoyta koo abeeh, qande kee milkiiy migaq inkih koh yecee.

³⁸ Baaxô-bagul tan ummattaay, alluwwe kee haadah abbootan inkih koh yecee. Woo soonol tuble dahabak bicsen amo, koo.

³⁹ «Kok lakal gersi doolat amaatele'mmay, ku doolatih gide nabnak matalla. Ku lakal tamaatu wayta sidochaytô doolatay nacaas inna le, inkih tan baaxo xiinisele.

⁴⁰ Tohuk lakal fereyhaytô doolat amaatele. Too doolat qandeh birti innah gaceleeh, teetik duma sugte doolatwa aggiggile leeh bututtukku heele.

⁴¹ Woo ceelok ibittey birta kee kallak yesgelleenihiyya tuble. Tohuk maqna too doolatih addal sittin-way akkele 'yaanama. Kalla kee birtay agleh tanik, woo doolatak garab caylah birti inna aallele.

⁴² Ibi-feeraarik garab kallaay, aki garab birtak bicseenih yeneeniih; tohuk maqna woo doolatak garab qanxaffe le doolat akkeleeh, aki garab boola le doolat akkele.

⁴³ Tonnah kaadu birtay kallat yesgelleenihiyya tubleeh; tohumuk maqna kaadu, woo doolatih malikwa doolat qande bahsiisaana'gidih, baxak ballis akkelon. Takkay immay wohim birta kee kalla yasgalleenimih bis aallele.

⁴⁴ «Too malikwah dabaanal, qaraanal yan Yalli baye wayta doolat xisele. Too doolatak faxe doolat mataysaay; sugte doolatwa bayissa hayteh elle raaqeleeh waarele.

⁴⁵ Gabah num xage'kal qalek baxsimma 'yeh rade xaay soonol tublehiyyak maqna toh teeti. Too xaa, birtaay nacaasaay kallaay lakqo kee dahabak bicsen ceelo aggilih tuble. Yallay Nabahiyya sarra takku waytam koh warseh yan. Atu soono elle tublem, hununuh tama'nnaay; teetik nummâ-maqna koh warseh» kaak iyye.

⁴⁶ Tohuk lakal Malik Nabkadnessar Daaniyel foocal gommoh radeeh, kaa yeynebe. Sarrak, «Daaniyelih sadgat abaay mattaco kaah acuya» iyye.

⁴⁷ Tohuk lakal kaadu iyyemii, «Ku Dagelti yallittek naba Dageltaay; malikwâ Malik kinnih; sirrih tanim taybulleem kaa» iyye. «Woh elle aaxigem, sirrih taniimik adda yoh warisseh» kaak iyye.

⁴⁸ Tohuk lakal malik Daaniyelih kaxxa arac yeceeh, mango mattacoy nabam meqehiyyak mangom kaah yecee. Baabelon-rakaakayih abba kaa abe. Kalah kaadu, malikih fayu yecee marak inkih abba kaa abe.

⁴⁹ Daaniyel malikik, «Sadrak kee Meesak kee Qabednago deqsita mara, Baabelon-rakaakayih caagiidah abbobti ken aba» iyyeeh, malik toh abe. Daaniyelih tu gactek, malik-qaril elle raaqe.