Daaniyel 12 - NABUWWA KEE MALIKWA

RABE MARIH UGUTMA

¹ «Too malaykattuy meqe-sarot sartanah yani yok iyyeemih, ‹Too saaku woo qande le malaykattuy Mikaayil deqsitaah ku ummatta dacrisahiyya amaatele. Kaxxa gibdaabini edde yan wakti sugele. Ummatta tunkullukeemik xabba haanamaay akke, sinaamat way akke wayte gadaama akkele. Too saaku ku ummattak migooqa Yallih kitaabal akak tunkuttube mari inkih cattiimele.

² Mango maray rabeh yomoogoqeh sugehiyya ugteleeh wadir gacele. Garab keenik ambaxe sinni waarah waarele. Aki garabaay amurruqe sinni qaybi kee ilaq-gadda akkele.

³ Kas le miracwa qaraanal yan ifih innah ifele. Too maray sinaamak cakkih tanim aba axcuk fayu acayuk sugehiyya, kulli way cutuukah innah ifelon› yok iyye.

⁴ «Kaadu yok iyyeemih, ‹Daaniyelow, ama kitab alifay ellecabo edde takke wakti fanah alifay asta edde hayis. Mango mari takkeemih maqna yaaxige'gidih, kaxxam taqabelon› iyye.

⁵ «Tohuk lakal namma malaykattuy weeqayti xaqul soltahiyya uble. Keenik tiyaay woo weeqaytuk a qaxa kee woo qaxal soolah uble.

⁶ Keenik numuk teeni, *baftak bicsen meqe-sarot sartanah yen malaykattuy weeqayti amol soolak yenehiyyak iyyeemih, ‹A qajiibik tanim maa saaku fan sugeleeh?› iyye.

⁷ «Too malaykatti namma gaba fayya haak, waara Yallih migaaqal xiibitah kaa oobbe. Iyyeemih, ‹Wakti kee waktitte kee waktik garab fan sugele. Yallih ummattak qande bayisu waa saaku, tahim inkih gaba kalele› iyye.

⁸ Usuk iyyem maxcok oobbeh immay maqna akak macediyyo. Tonna leemik, ‹Yi amoytaw, ahim inkih mannal gaba kalele?› exce.

⁹ Too waqdi usuk yok iyyeemih, ‹Daaniyelow, aham ellecabô-wakti yakkem fanah uqurat sugteh, num aaxige waama.

¹⁰ Mango ummatta amqiyyiruk taahirroowele. Uma mari tahat maradaay, akah sugen umeynitih raaqelon. Ahat raddu waytam, kas le mara.

¹¹ Kulli ayro acayuk sugen sadgat edde yeyseeden ayroy woo kaxxam umâ-yabulih tanim edde hoonu waanak, wadirih alfi kee namma bool kee sagla-tabanih ayro tatrele.

¹² Alfi kee sidiica bool kee soddom kee koona ayro taturra 'tam fan asbiruk sugu waa mari, ruffa le mara.

¹³ Tonna'mmay, Daaniyelow, atu lito imaan ellecabo fan boolaate'kal kok sugay. Rabettooh, isi galto ellecaboh ayro geyta'gidih ugtetto› yok iyye».