Daaniyel 11 - NABUWWA KEE MALIKWA

¹ Meediya deqsita marah yooboke Daryawes edde reede naharsi sanatat, anu innih Mikaayil catak kaa agiirise› yok iyye.

² Qagseh iyyeemih, ‹Anu taway koh warisu waam numma. « ‹Ahak sarra Fursi-rasul sidiica malik reedele. Keenik lakal yamaatu waa fereyhaytô-malik gaddaliinoh keenik inkih aysele. Usuk leh yan qande kee gaddaliinok gexxaamah, Giriik xintot qeebi abam faxele.

MALIKWA QAADA

³ Tohuk lakal agiruh yan malik amaatele. Too malik kaxxam naba abbootan luk sugeleeh; isih faxxa heem abele.

⁴ Usuk kaxxa qande elle baaha ikkel, kay doolat addigilleleeh, affara ikkel gacele. Kay durruyyatak ane waa mari, kay aracal reedele'mmay, qandeh kay inna mayallan. Tonnal kay doolat kurruumeleeh, aki mari elle reedele.

⁵ « ‹Masril gacu waa malik kaxxa qande baahele. Kay qaskar abbobtik tiyak teeni, kaak naba qande baaheleh, kaxxa doolatih abba akkele.

⁶ Dago sanootak lakal Masri malik Suuriyah malikit qalla haysiteleeh; baxá digibih kaah aceele. Takkay immay ken qalli kaxxam masuga. Tet qande maraqtaay; baqli-qande kaadu gaba kalele. Woo waktih addal tet kee, tet baahak qalla haysite mara kee, tet abba kee qande teetih acayuk yen num inkih bayelon.

⁷ « ‹Sarrak teetih ramad le marak numuk teeni, tet abbah aracal malik akkele. Woo malik Suuriyah malikih qaskarat qeebi abele. Ken megdebitteh adda culeleeh; qeebil keenik aysele.

⁸ Oson yalla 'yeenih yaqbuden duyyeey birtak bicsen ceeloola kee, dahab kee lakqok bicsen duyye Masri fan dannabah beele. Tohuk lakal dago sanootah Suuriyah malikit qeebi maaba.

⁹ Sarra Suuriyah malik Masri wararele. Takkay immay wadir kaa gacselon.

¹⁰ « ‹Suuriyah malikih xaylo qeebih bica abeleeh mango qaskar gaaboysele. Keenik numuk teeni, weeqi'nnah duufut beyak warareleeh, ken naqboytiitih megdeb elle yani ikke fan qeebi abak amaatele.

¹¹ Too waqdi Masri malik bagcarritak, Suuriyah malikit qeebi abeleeh; kay qaskaray mangohiyya qeebit abbixele.

¹² Too waqdi woo marak abeh yan iisak gexxaamah kaxxiina baaheleeh; mango alfitte takke qaskar qidele. Takkay immay tohuk wadir iisa geyak maraaqa.

¹³ Macaay intek, Suuriyah malik uduurra 'yeh duma luk suge qaskarak ixximah mango qaskar gaaboysele. Bica geya saaku, mango qaskaray nagay tan tikya lehiyya haysitta heeh kaadu gexele.

¹⁴ Too saaku mango mari Masri malikit qeebi abele. Ku baaxoh marak Daaniyelow, inkinki qamalleelah yan mari yublen soonoh sabbatah, kay milkih gacaanam cineloonu'mmay, abaanam ken gabal mabicta.

¹⁵ Suuriyah malik gaso maroh edde tan magaalat maro hayya heeh tet abbixele. Too saaku Masri qaskar qeebih gacak gacele. Keenik qeebil agiirah tan qaskar kinni way, qeebi edde abta qande luk maraqta.

¹⁶ Suuriyah malikiy qeebi keenit abahiyya isih faxxa heem abeleeh; num kaat makoysita. Baaxooxak qaxa inkih tayse baaxo isi gabat heeleeh, too baaxo edde bayisu duuda qande luk sugele.

¹⁷ « ‹Tohuk lakal Suuriyah malik inkih tan qaskar haysitta heeh Masri fan gexaamal malsitele. Masri doolat baysa'gidih, qalla malikit haysiteleeh, baxá digibih kaah aceele. Takkay immay too malay usuk malsehiyya kaa macattaay, gabal kaak mabicta.

¹⁸ Tohuk lakal baddaafal tan baaxooxal yan marat qeebi abeleeh, mango marak keenik aysele. Takkay immay aki baaxok yemeete makaabanti kaak ayseleeh; luk suge kaxxiinat kaa macaba. Too num sinaamat abak suge kaxxiinak gexxaamah, sinam kaal akah kaxxiinitta'nna kaak abele.

¹⁹ Malik too waqdi isi baaxol tan magaalooliy gaso maroh edde tanihiyya fan aduurele'mmay, qeebil gaceh amaatele. Toh kaak ellecabo akkele.

²⁰ Too malikih lakal gersi malik amaatele. Usuk isi baaxol gaddaliino fayya inta'gidih, sahdat xukkutaah gersi maral gabbara osisa num ruubele. Too malik maraagay, xayih bayele. Elle kaa qidan inna sinam kaak mataaxigay, yambulle carbit maraba› yok iyye.

UMAM ABA MALIIKI

²¹ «A malaykatti kaadu qagseh yok iyyeemih, ‹Wohuk lakal Suuriyal malik yakkeemih, cakki alle waa malikiy umâ-yabulih tan taama lehiyya reedele. Num kaa cube'kal, garciik amma 'yeh sahda ayrisak malik akkele.

²² Naqboytiitih kaak tan qaskarat qeebi abeleeh baysele. Too qaskar dibuk hinna'mmay, kaxxa seekih agantah baysele.

²³ Lih bicca 'ye doolat wadir ganele. Abbah akak yakku waam qunxa doolata'mmay, toh kinniimih qandeh aysuk aysele.

²⁴ Kaxxa maalu le rasu garciik wararele. Kay kaxxa abbobti ahayduma abe waytem abele. Dannabah orbise duyye kee gadda, kaa kataata marih fanal kurele. Megdebitte elle tan aroocat qeebi abaanamih malat gacele'mmay, tohim inkih yimixxige wakti sugele.

²⁵ « ‹Sarrak Masri malikit qeebi aba'gidih kaxxa qaskar ugsele. Too waqdi Masri malik canê-gacsah nabam mangoh qande le qaskar haysitta heeh qeebi kaat abele. Takkay immay kaa ganeloonuh, tohih sabbatah faxem gabal kaah mabicta.

²⁶ Kay maray maaqo kaa'lih akamuk sugehiyya kaa ganele. Qaskarak mangom kaak duufut beeloonuuh; ambaxele.

²⁷ Sarrak a namma malik maaqo titta lih takme'gidih inki ikkel daffeele. Num numuh umam keenik acsubeleeh, num numul dirab keenik aceele. Wakti akak gufe'kal sugeemih sabbatah, faxak sugeenim mageyan.

²⁸ Suuriyah malik dannabah bee duyye luk isi baaxo fan adaaruk gitat yan waqdi, Yallih diinih mara baysaamal gaba kalele. Isih faxxa heem abak yeneek, isi baaxol gacele.

²⁹ « ‹Yalli doore waktil, Masri kaadu qagitak wararele. Too saaku caalat dumî bis kaal mayalla.

³⁰ Roomah mari maraakibit amaateleeh, saduh kaak gaceloonuh, tohih sabbatah meysi kaat radele. Tohuk lakal bagcarritak aduureleeh, Yallih marih diini baysam gabbatele. Yallih diini cine marih fayu aabbele.

³¹ Usuk ruube qaskar, megdeb kee Yallih Qibaadah-Qari culak, nadaasa abele. Kulli ayro aban sadgat abe ken kaleleeh, sadgat elle abak yenen aracal Kaxxam Umâ-Yabulih-Tanim elle heele.

³² A malik Yallih diini cine mara ayrisele. Too mari kay xaqut gacele. Takkay immay, Yalla oggole mariiy digga axcuk, qeebi kaat abele.

³³ Kasloytit isi kas ummatta lih haysitele. Keenik tu yakke mari, dago waktit carbit rabe kee girat ken carrise akkelon. Garabak kaadu midir buubeloonuuh seewah ken beelon.

³⁴ Sinam tittin qidiyyat tan waqdi, Yalla oggole mari catok dagoom geele. Mango mari isinni nabsih catoh keenit angalele.

³⁵ Ummatta agirribuk taahirrowta'gidih, woo kasloytiitih tan miracwak tu takkem annikissele. Taham ellecabô-waktiy Yalli yaaxigehiyya tamaatem fan akkuk sugele.

³⁶ « ‹Suuriyah malik isih faxxa heem abak sugele. Yallitte akak inxicci 'yaanamak nabiyoh axcuk tirtirisele. Yallittek naba Dagelta kinni way, uma'nnal xaafele. Yalli kaa digaalla haam fan toh abak sugele'mmay, Yalli hununuh abeyyo inxicca 'yem abele.

³⁷ A malik kay kaxxa abbobti yalla axcuk aqbuduk sugte duyye kee, agbi faxaamat baaqid mahaa. Yallitte 'yeenih yaqbudeenim maaqileleeh, wohuk inkih anu nabiyo axcele.

³⁸ Takkay immay megdebitte dacrisa yalla akak iyya yalla assakaxxele. Kay kaxxa abbobti aqbuduk sugtem hinnay, gersiimiy yalla akak iyyah, dahab kee lakqooy bila kee gersi duyye acayuk assakaxxele.

³⁹ Tonna leemiik, aki baaxoh mari yaqbudem kaa catak, qande le megdebitte qeebit abbixele. Atu nummah abba kinnitoh 'yaanam kaah axcinnaan marah, kaxxa arac abeleeh, kaxxa taama kee buqre keenih aceele.

ELLECABÔ-WAKTI

⁴⁰ « ‹Ellecabô-wakti xayyoowa waqdi, Masri malik qeebi kaat abeleeh, too waqdi Suuriyah malik gaariira kee faariisa kee mango maraakib haysitta heeh kaa'lih aamele. Mango baaxo weeqi'nnah duufut beyak wararele.

⁴¹ Baaxooxak qaxa inkih tayse baaxo kaadu wararele. Mango alfitte yakke mara qidele. Takkay immay Edom kee Mooyab rasih mara kee, tonnah, Qammon rasih marak raqtem asillimele.

⁴² Masri agantah warareleeh abbixele.

⁴³ Masri mari yooqoreh suge dahabaay lakqo kee gersi duyyey kaxxa limo lehiyya buubele. Liibiya kee Kuus rasuk qeebil aysele.

⁴⁴ Tohuk lakal ayrô-mawqa le kabu kee kilbat le kabuk yamaatu waa xaagi cunxo kaat qidele. Tonna leemiik kaxxa naqabu xagarat luk qeebi abeleeh mango mara qidele.

⁴⁵ Usuk isi kaxxa sirooqa bad kee taahirik tan qaley qaxmeqehiyyak fanal heele. Ellecabol rabele'mmay, rabak num kaa macata› yok iyye.