Daaniyel 10 - NABUWWA KEE MALIKWA

DAANIYEL TIGRAS XAQUL SUGE SAAKU YUBLE SOONO

¹ Kooris Fursi-malik yekkeemih sidiica sanat yekke saaku, Daaniyelil farmo temeete. Malik, Daaniyelih migaaqah Beltasaxxar yeyyeeqeh suge. Kaal temeete farmo nummâ-farmok tene'mmay, xayih edde radoonu duudan farmok mananna. Yalli woo farmok maqna wacyi gurral kaa yuybulle.

² Anu sidooca ayyam rookat suge waqdi,

³ meqe maaqo maxagiyyooy, cado kaadu akme'kal suge. Qinabak bicsen kamri maaqabiyyooy, too sidooca ayyam gaba kalla haam fan amo file'kal suge.

⁴ Sanatak naharsi alsak labaatanna kee fereyhaytoh ayro, Tigras deqsita kaxxa weeqaytih xaqul soolak suge.

⁵ Wonnah wagga hee waqdi, *baftak bicsen meqe-sarot sartanah yan numuy agle sinni dahabak bicsen qarum bagul lehiyya uble.

⁶ Xagar kaak diifuh bilah inna luk yen. Fooci kaak cankaxi qidih innah urak yen. Intiita kaak urta girah inna luk ten. Ibitte kee gaboobi kaak isiffiyya heen nacaasih innah liliq axcuk ten. Anay kaadu kaak mango marih xongoloh inna luk yen.

⁷ Taham suwaawur gurral tublem dibuk yoo. Yo'lih yen mari tahak tu maballinna. Takkay immay kaxxa cunxo keenit hayteh, kudeenih yombooqoreenih.

⁸ Tonna leemiik anu tokkel ta suwaawur innah taniimiy qajiibik tanihiyya wagitak dibuk elle raaqe. Boolaateh, qande luk maraaqiyyo. Fooci yok gombod ceelot gace.

⁹ Kay anay oobbe waqdi, baaxok bagul afah radeeh inni kasat maraaqiyyo.

¹⁰ Sarrak gaba yoo tibbixeeh gulub kee gabah yoo cabte. Too waqdi axaxitak suge.

¹¹ Tohuk lakal malaykatti annah yok iyye. ‹Daaniyelow, Yalli koo kicnak, ugutaay anu kok axcem ankacis. Ku fanah yoo ruube›. Toh iyye waqdi axaxitak ugte.

¹² «Sarrak yok iyyeemih, ‹Daaniyelow, mameysitin. Kol temeete farmoh adda ceddi hayteeh, Yalla kinni ku Dageltih meysih rammitteeh miskiinitte ayrok wadirih, ku dooqa oggolsimtem koh warsa'gidih emeete.

¹³ Fursih doolatat dacayrih yan malaykatti labaatanna kee inki ayroh gide amaate yoo kalak suge. Woo Fursih-doolatak gexe yoo kalak yeneenimih sabbatah, Mikaayiliy malaykah abbobtik numuk teena kinni, yoo cata'gidih yemeete.

¹⁴ Away akah emeetem, sarra yan saaku ku marat takku waytam koh warsa'gidi. Ah sarra takku waytaamih wacyi› yok iyye.

¹⁵ «Usuk toh iyye waqdi, anu guduqqa maxcinniyoy baaxok addah wagte.

¹⁶ Sarrak sahdayti ceelo luk yen malaykatti sokto gabah yok xageeh; too waqdi yaabam duudeh. Foocal yok soolak suge malaykattuk exceemih, ‹Yi goytaw, a wacyiy ublehiyya kaxxam yoo biyaakeemih sabbatah boolaateh an.

¹⁷ Away qande luk maraaqiyyoy, ufuy qandeh ruubah anik, yi goytaw, yooy ku naqasu kinni ko'lih manni'nnal yaabu duuda?› exce.

¹⁸ «Sahdayti ceelo luk yen malaykatti kaadu qagisak gabah yoo xageh, too waqdi xagar yok qande baahe.

¹⁹ Too waqdi yok iyyeemih, ‹Yalli kaxxam koo kicnahak, atu tuk mameysitin. Yallih nagayna ko'lih tanayak, niya haysitaay digga inxic› yok iyye. Usuk ah iyye waqdi anu nagay ekkeh; kaak exceemih, ‹Intam faxxam inxicey, away nagay yoo abtek› kaak exce.

^20-21 «Usukuuy, ‹Anu koo fan akah emeetem maay taaxige? Woo Nummâ-Kitaabal tanim koh qaddoysa'gidi. Taway uduurra exceh, Fursih marat dacayrih yan malaykattut qeebi abeyyo. Woo malaykattuk gexa waqdi, Giriik marat dacayrih yan malaykatti amaatele. Mikaayiliy Israayil marat dacayrih yani, kalih malayka yoo macatta.