Daaniyel 1 - NABUWWA KEE MALIKWA

BAABELON BAAXOL DAANIYEL KEE KATAYSIISIT ABEN BARITTO

¹ Yahoyaakim Yuudâ-malik yekkeemih sidochaytô-sanat yekke saaku, Malik Nabkadnessar deqsita numuy Baabelon malikih yenehiyya, Yarusalaam magaalat qeebi abeeh marot tet hee.

² Goyti, Yuudâ-malikih yen Yahoyaakim kee Yallih Qibaadah Qarih addal sugte duyyek garab, Baabelon malikih gabat akah tantixibbixe innah abe. Too malik sahdak tu takkem seewah gabat beeh, dannabah kaadu Yallih Qibaadah Qarik been duyye orbise. Too duyye yalla axcuk yaqbudeemih xise qarik duyye elle daanisan aracal hee.

³ Sarrak malik kay gubal taamita Asfanad deqsita numuk iyyeemih, «Gexay ama Israayil maray seewah gabat bahneh addak, malik nasab le furrayna kee muddaqih tan furrayna dooray bah.

⁴ Ta mari yi qarih addal taamita'gidih, xagar qax-maqaane leeh hebeltoh ayma aalle waa maray kas kee cubbiiy ixxiga kee baritto lehiyya yakkeenim faxxinta» iyye. Asfanad, Baabelon marih af kee woo afat tunkuttubem, too mara barsam faxximta.

⁵ Toh lih kaadu malik iyyeemih, «Anu elle akme aracak maaqo kee qinab-kamri keenih acuyaay, sidiica sanat nagay ken barseenik lakal, doolat-taamat ken culusa» iyye.

⁶ Tohuh dooren marak addat, Daaniyel kee Cananya kee Misaayel kee Qadarya deqsita maray Yuudâ-kedoh yoobokehiyya edde yen.

⁷ Malik gubal taamita num woo marah qusba migaq yeyyeeqe. Migaaqah keenik, Daaniyel deqsita numuk, Beltasaxxar iyyeeh; Cananyak Sadrak iyyeeh, Misaayelik Meesak iyyeeh, Qadarya deqsita numuk Qabednago 'yaanam keenih yeyyeeqe.

⁸ Daaniyel, malik buxah maaqo kee maqab nadaasak yanim yeexegeeh; tohih sabbatah, malik gubal yan numuy Asfanad deqsitahiyyah a maaqo faxe waam warse.

⁹ Too waqdi Yalli woo malik gubal yen numih bagut maqaane kee xuwaw kaah hee.

¹⁰ Takkay immay a numuy malik gubal yenehiyya malikik meysitak yeneemih sabbatah, Daaniyelik iyyeemih, «Malik ukuma siinik iyye maaqo akme wayteeniih, gersi furraynah innah xagarah gace wayteenik, wonnal malik yoo qidele» kaak iyye.

¹¹ Malik gubal yan num, Daaniyel kee kay kataysiisih sidocut dacayrih num heeh yen. Daaniyel tohuk lakal woo numih fan gexeeh, iyyemii,

¹² «Ku maganah kudra kee lee tabna ayroh neh ucuyaay; tohuk sarra xagar nek akah gaca'nna nek wagtetto.

¹³ Sarrak nee kee woo malik-buxah-maaqo-yakme-mara tittal wagga haay, cella inna tublek wadir, kot ceelinnaanim abetto» kaak iyye.

¹⁴ Woo numuuy, usuk kaa esserem tabna ayroh gideh keenih oggoleh.

¹⁵ Tabna ayro suggu 'yeenik lakal, qaafiyat kee qandeh malik-buxah-maaqo yakme marak aysuk sugen.

¹⁶ Tohuk gexxaamah woo ayrok wadir, dacayrih keenit yan num, malik yacee maaqo hinna'mmay, caxâ-miru yakmoonay ken iyye.

¹⁷ Yalli woo affara numuh falsafat kee kitaabal tunkuttubeemih ixxiga keenih yecee. Toh lih kaadu Yalli Daaniyelih suwaawur kee soonok maqna elle yaaxige'nna kaah yecee.

¹⁸ Keenih heen wakti gufe waqdi, malik gubal yan num woo furrayna inkih malikil xayyoose.

¹⁹ Malik yakkeenimik inkih ken lih yaabeh immay, gersi marak inkih Daaniyel kee Cananya kee Misaayel kee Qadarya yossokoote. Tonna-leemiik doolat-taamat culen.

²⁰ Malik faxe essero esseraah, waagiseenimik faxem taniimih, a affara num, baab-abeenit kee faal-qiday woo baaxol sugga 'tehiyyak inkih, tabna adda tayse ixxiga luk yenen.

²¹ Daaniyel Malik-Kooris deqsita malik Baabelon rasul dardaare saaku fanah doolat taamal elle suge.