Caggay 2 - NABUWWA KEE MALIKWA

QIBAADÂ-QARI KAXXAM QAXA AMQELE

¹ YALLI too sanatak malcinhaytoh alsak labaatanna kee inikhaytoh ayro, nabi Caggayal qagseh farmo oobise.

² Kaak iyyeemih, «Ta farmo Darabbabeliy Yuudâ rasul abbah yanihiyya kee Yoosuway kaxxa seekih yanihiyya kee ayyuntah inkih warisaay, intaamah:

³ ‹A Qibaadah-Qari duma luk suge qax-maqaane kasa num siinit maay yanii? Away ceelam maay tablen? Wagga haytan waqdi tu ceele waam siinit maay celtaa?

⁴ Taway ugutay xisne qimbisa. Niya siinik rade waytay. Wakalih anu sin lih anik, xiso qimbisa.

⁵ Masrik tewqen saaku sin lih an 'yaanam siinik exceh sugeeh; tokkeey akke sin lih anik mameysitina. Toh siinik intam yooy YALLAY Nabaamak Nabahiyya› keenik inxic» iyye.

⁶ Kaadu qagseh kaak iyyeemih, « ‹Xayi waktih addat uxih qaran kee baaxooy bad kee bacari asgayyeyyo.

⁷ Baadal tan doolatwa asgayyeyyooh; luk sugen gadda keenik akke bahha heeyyooh; yi qari gaddaliinok kibbiimele.

⁸ A baadal eneyya 'ya dahab kee lakqo yiimi.

⁹ Away xissoonu waytan Qibaadah-Qari, duma suge Qibaadah-Qarik qaxah iysissa heeyyooh; inni ummatah gaddaliinoo kee amaana tokkel aceeyyo. Toh siinik intam yooy YALLAY Nabaamak Nabahiyya› 'yaanam keenik inxic» kaak iyye.

NABI SEEKAL MALA BAAHE

¹⁰ Daryawes tu edde taade malik edde yekke nammeyhaytô sanatak sagalhaytoh alsak labaatanna kee fereyhaytoh ayro, YALLAY Nabaamak Nabahiyya kaadu Caggayal farmo oobise.

^11-12 Kaak iyyeemih, «Ama seekak intaamah: ‹Away ceelalloh, numuk teeni sadgat elle aban aracak bee taahirik tan cadoyta bandiilit xambaqqa heek lakal, woo cadoyta edde tan bandiilih gaqambo xage kee saalo xage yekkek, hinnay kaadu, qinabak bicsen kamri xage yekkek, caxâ xaylok bicsen *zeyti (saliid) xage yekkek, akkinnaan maaqok xage kaa tekkek, a cadoytah sabbatah too maaqo taahirik tan maaqo kaah maay takke? Too yab yoh mekela› keenik inxic» iyye. Caggay seeka toh essere waqdi seeka, «Aleey matakka» iyyen.

¹³ Caggay kaadu qagseh ken essereemih, «Ginaada xageemih sabbatah nadaasa tibbixe num gaqambo akkiiy, saalo akkiiy, hinnay kaadu, qinabak bicsen kamri kee caxâ xaylok bicsen *zeyti gabah xagek, woo maaqo nadaasak cattinta?» iyye. Seeka «Macattintaay, woo maaqo yakmeenim caraamu» iyyen.

¹⁴ Caggay too way keenik iyyeemih, «Hay, tonnal, YALLI iyyaamah, ‹Ta maraa kee ken buqrek orba murti, tama taway siinih warisak suge ceelalloh gide. Tonna-kinnuk oson sadgat elle aban aracal sadgatah baahinnaan maaqo calaalak matanay; nadaasak taniih, caraamuk tan.

¹⁵ «Tonna leemiik ahak wadir cubbusa; tahak sarra caalat dumî-bis siinil mayalla. Yi Qarih xisne qimbissaanak duma,

¹⁶ siinit tekkem maay able waytan? Woo orbissen daro elle kobxissen arac gexxen saaku, too daro namma boolih kiilo akkelem elle akkaluk sugten ikkel, inki boolih kiilo akkuk siinih sugte. Qinab elle yaxmuumen aracal bool litri takke qinabay yuxmuumeenihiyya dagaak morootom litri akkuk siinih suge.

¹⁷ Uysubukku hayteenim siinik baysa kaxxa caacay kee arroqle le rob siinil ruubeeh; darot dalka ruube'mmay, tohuh toobittoonu cinteenih.

¹⁸ A saaki, yi Qarih rakiiboh xisnek gaba edde kalten ayrooy; yi Qarih rakiiboh xisnek gaba edde kalteenim, ta sanatak sagalhaytoh alsak labaatanna kee fereyhaytoh ayro. Tahak wadir anu siinih abu waam cubbusa.

¹⁹ Darok raqtem ane waytaah, qinab xala cooxuk raqtem ane waytaah, rummaana kee *daytuun kee *subla coox ahayduma xaylo xaleh suge waamah, ahak wadir barkat siinit heeyyooh, sin gaddaliseyyo» iyye.

YALLI DARABBABELIH CULE QAHDI

²⁰ Too alsak too ayrot kaadu, YALLI nammeyhaytô-farmo kaal oobiseeh; toh ayrok labaatanna kee fereyhaytoh ayrok ten.

²¹ Kaak iyyeemih, «Yuudâ rasuk abbah yan Darabbabelik intaamah: ‹Qaran kee baaxo edde asgayyu waa saaki xayiih;

²² Too saaku marin doolatwa deerik afah korseyyo. Luk suggu 'yen qande keenik bayseyyo. Carbi edde aban gaariira kee woo faras-gaariira beya mara kombobboliseyyo. Faroosa kee faroosah amot yan mari rabeleeh; seefit titta selele.

²³ Yi naqasu Saltiyál-Darabbabelow, too ayro bahha koo heeh, abba koo abeyyooh, migdi gabah ferranto koh acayuk, ummat yi migaaqal xiinisetto. Sinaamak addak doorem koo. Tahat yabtam yoo YALLAY Nabaamak Nabahiyya› » iyye.