Caggay 1 - NABUWWA KEE MALIKWA

YALLI, «QIBAADÂ QARI XISA» IYYE

¹ Daryawes deqsita Malik Fursi-rasul tu edde taade malikih yen dabaanal, malik edde yekke nammayhaytô sanatak leceyhaytoh alsak inikhaytoh ayro, YALLIH farmo nabi Caggayal obte. Woo farmo YALLI akah ruubem, Darabbabel deqsita numuy Yuudâ rasul abbah sugehiyya kee Yoosuwa deqsita numuy woo rasul kaxxa seekih yenehiyyak ten. Darabbabel Saltiyal deqsita numih baxak ten. Yoosuwa kaadu Yahuuxadak deqsita numih baxak ten.

² YALLAY Nabaamak Nabahiyya Caggayak iyyeemih, «Ama mari, ‹YALLIH-Qibaadah-Qari edde xiseh meqe wakti ahayduma uxi magufinna› 'yaanam iyyaanak,

³ a farmo keenil qidaay, keenik intaamah:

⁴ ‹Yi qariy yoo elle taqbudeeni abuuruh elle yani'kkel, isin isinnih meqe xisneh xissitten qarwat gactaanam celtam kinni?

⁵ « ‹Away ah siinit akah takkem kinnim cubbussaanam meqe.

⁶ Buqreh mango daro qiddaanah, dagoom akak orbissan. Maaqo buxal allih, cayya akak mantan. Qinabak bicsen kamri geytaanah immay akak cayya mantan. Sartan litoonuh immay woo sartan waacak sin macata. Taamittaanah immay akak geytan lakqo booha lee giibit gacteh gide.

⁷ « ‹Ah siinit akah takkem kinnim cubbussaanam meqe.

⁸ Away uguta. Woo saagan elle yan qaleela fan gexay saagan baahaay, yi qari edde xisa. Tah abteenik, anu ruffu axceyyooh; tokkel yoh taguude qibaada yoh abetton. Tah intam yoo YALLA› keenik inxic» 'yaanam kaak iyye.

⁹ Tohuk kalah kaadu keenik iyyeemih: «Tubquren baaxok mango daro geettoonum tekkeleeni'mmay, dago daro siinih orobte. Geyteenim buxah orbissaanam tekkelen way caacayat siinik ruube. Toh siinik akah abem maca siinit celtaa? Yi qari abuuruh garil siinik yaniih, isin isinni qarwah bicsah agxittaanam siinik ubleeh; toh siinik uble waqdi, tamah siinil baahe.

¹⁰ Naafi akah rade waah, daro akah orbise waytaanam kaadu tohu.

¹¹ Baaxooy, koomaamiiy, buqreh aroocaay, qinab xaylo elle taabuke aroocaay, *daytuun xala cooxuuy, baaxol ubukka 'taamay tankammehiyya kee, ummataay laa kee saqal inkih qabar ruubeyyo. Abtan taamak tu morbissan» inta farmo keenih ruube.

UMMAT YALLIH AMRI OGGOLTEH

¹² Tohuk lakal Darabbabel kee kaxxa seekih yen Yoosuwa kee, wohuk kalah yan maray baatik saaboh raaqehiyyak yakkeenimiik, YALLI keenik aba elle inxicca 'ye innal, YALLI aba iyyem aben. Ayyunti YALLAY ken Dagelta kinnihiyyak meysitak yeneeh; tonna leemiik YALLI ruube nabi Caggay iyyem aben.

¹³ Too waqdi YALLIH farmoytah yen nabi Caggay kay farmo ummattah warseeh, keenik iyyeemih: «YALLI siinik iyyaamah: ‹Anu sin lih aniih, yi taamay abtaanal siinik baxsime waamah xagana siinih cula› siinik iyyah yan» keenik iyye.

¹⁴ Kay Qibaadah-Qari nammeyhaak xisaanamih fayxi YALLI keenit hee. Yuudâ-rasih amoytah yen Darabbabel kee, kaxxa seekih yen Yoosuwa kee, wohuk kalah yan maray baatik saaboh raaqehiyya yakkeemik, YALLAY Nabaamak Nabaah ken Dagelta kinnihiyyah Qibaadah-Qari bicsaanam qimbisen.

¹⁵ Too qarih xisne edde qimbiseenim, Daryawes tu edde taade malik edde yekke nammeyhaytô sanatak leceyhaytoh alsak labaatanna kee fereyhaytoh ayrok ten.